រឿងរ៉ាវទំនាស់ដ៏ក្ដៅគគុករហូតប្រើប្រាស់ដៃជើងរវាង សុទ្ធ បញ្ចកា និង លោក អេដវីន ហាក់មិនទាន់សម្លឹងឃើញកោះត្រើយព្រោះ ភាគីទាំងសងខាង បន្តចេញមកអាក្រាតគ្នាទៅវិញទៅមកពាក់ព័ន្ធនឹងជនទីបី ព្រោះក្រោយលោក អេដវីន បង្ហោះរឿងនាំប្រុសមកបន្ទប់ អ្នកនាង សុទ្ធ បញ្ចកា ទម្លាយរឿង លោក អេដវីន លួចស៊ីចុកជាមួយនឹង រ៉ូស។
អ្នកនាង សុទ្ធ បញ្ចកា បានទម្លាយឆាតឯកជន របស់រ៉ូស ដែលមានឈ្មោះជាភាសាអង់គ្លេសថា An Na Rose ដោយក្នុងនោះគឺជាការជជែកគ្នា ពីបុគ្គលទីបីដែលត្រូវបានមហាជនសន្មតថាគឺជាលោក អេដវិន តារាសម្ដែងមុខសង្ហា។ ពាក្យសន្ទនានោះគឺបានបញ្ជាក់យ៉ាងច្បាស់ពីទំនាក់ទំនងស៊ីជម្រៅរវាងលោក អេដវីន និង កញ្ញា រ៉ូស។ សូមអានពាក្យសន្ទនារវាងរបស់រ៉ូស ដែលរំលឹកពីលោក អេដវីន ដូចខាងក្រោម៖
ក្រៅពីទម្លាយឆាត ដែលបញ្ជាក់ពីទំនាក់ទំនងស៊ីជម្រៅរវាងលោក អេដវីន និង រ៉ូសហើយនោះ អ្នកនាង សុទ្ធ បញ្ចកា ក៏បានបង្ហោះសារថ្លែងអំណរគុណ មនុស្សពិសេស (មិត្តភក្តិ) ដែលតែងតែនៅក្បែរ និង យកចិត្តទុកដាក់លើរូបអ្នកនាងគ្រប់ពេលវេលា ទាំងសុខនិងទុក្ខផងដែរ។ ក្នុងនោះអ្នកនាង មិនភ្លេចឆ្លៀតផ្កែផ្កា ឱ្យអ្នកដែលស្អប់អ្នកនាង ដោយលើកឡើងថា អ្នកទាំងនោះចាំតែអបអរនិងរីករាយ ពេល អ្នកនាងវេទនា និងដួល។
រំលឹកឡើងវិញ អ្នកនាង សុទ្ធ បញ្ចកា អ្នកជំនួញជោគជ័យ គឺជាអតីតភរិយាលោក លៀក លីដា បានលែងលះគ្នា ដោយបន្សល់ទុកកូនពីររូបនៅក្រោមបន្ទុកថែទាំរបស់អ្នកនាង។ មុនផ្ទុះរឿងរ៉ាវហិង្សា ស្នេហាចតុកោណកែង ដូចបានរៀបរាប់ខាងលើ អ្នកនាង និង លោក អេដវីន បានជួបស្រលាញ់គ្នា ហើយសម្រេចចិត្ត រួមរស់ក្រោមដំបូលតែមួយប្រៀបដូចជាប្ដីប្រពន្ធ គ្រាន់តែមិនទាន់បានក្រាបផ្ទឺមក្បាលដល់កន្ទេលប៉ុណ្ណោះ៕
