សហព័ន្ធកីឡាបាល់ទាត់ហ្វីលីពីន បានប្រកាសតែងតាំងលោក Josep Ferré Ybarz ជនជាតិអេស្ប៉ាញ ជាគ្រូបង្វឹកថ្មីរបស់ក្រុម Azkals (Azkals ជារហស្សនាមរបស់ក្រុមជម្រើសជាតិហ្វីលីពីន) ដើម្បីជំនួសកៅអីលោក Thomas Dooley ត្រៀមចូលរួមព្រឹត្តិការណ៍ជើងឯកអាស៊ាន AFF Mitsubishi Electric Cup 2022។
លោក Josep Ferré Ybarz ឈ្មោះពេញ Josep María Ferré Ybarz កើតនៅទីក្រុង Barcelona ប្រទេសអេស្ប៉ាញ ថ្ងៃទី២៦ ខែវិច្ឆិកា ឆ្នាំ១៩៨៣ (បច្ចុប្បន្នមានអាយុ៣៩ឆ្នាំ) ចាប់ផ្ដើមអាជីពជាគ្រូបង្វឹកដំបូងនៅក្នុងសាលាបាល់ទាត់ CE Premià មុនពេលផ្លាស់ទៅធ្វើការនៅ FC Barcelona Escola។
នៅឆ្នាំ ២០១៣-១៤ លោក Josep Ferré Ybarz ត្រូវបានតែងតាំងជាគ្រូយុវជនថ្នាលរបស់ក្លិប Buriram United មុនផ្ទេទៅកាន់ Ratchaburi FC នៅឆ្នាំ ២០១៥ និងជាគ្រូជំនួយ BG Pathum United នៅឆ្នាំ ២០១៦, លុះឆ្នាំ ២០១៨ ឡើងជាគ្រូឈុតធំ BG Pathum United។
នៅឆ្នាំ ២០១៩ ផ្លាស់ទៅធ្វើជាគ្រូជំនួយ East Bengal Club របស់ឥណ្ឌា ខណ:ឆ្នាំដើម ២០២២ វិលត្រលប់ទៅស្រុកកំណើត ដើម្បីដឹកនាំក្រុម FC Ascó លីគលំដាប់ទី៥ របស់ប្រទេសអេស្ប៉ាញ។
លោក Josep Ferré Ybarz អ្នកចាត់ការទូទៅថ្មីរបស់ក្រុម Azkals ហ្វីលីពីន នឹងត្រូវដឹកនាំកូនក្រុមលើកដំបូងក្នុងជំនួបមិត្តភាពអន្តរជាតិ ប៉ះ វៀតណាម នៅថ្ងៃទី១៤ ខែធ្នូ ឆ្នាំ២០២២ ខាងមុន។
គួរដឹងថាក្រុមជម្រើសជាតិហ្វីលីពីន ស្ថិតក្នុងពូល A នៃពានរង្វាន់ AFF Mitsubishi Electric Cup ជាមួយក្រុមថៃ, ឥណ្ឌូណេស៊ី, កម្ពុជា និងប្រ៊ុយណេ។ ប្រកួតបើកឆាកនៅថ្ងៃទី២០ ខែធ្នូ ឆ្នាំ២០២២ ក្រុមហ្វីលីពីន ត្រូវធ្វើដំណើរមករាជធានីភ្នំពេញ ដោយប៉ះម្ចាស់ផ្ទះកម្ពុជា លើទីលានពហុកីឡដ្ឋានជាតិមរតតេជោ ក្នុងរាជធានីភ្នំពេញ៕