ក្លិប Neftçi សមាជិកក្នុងពានរង្វាន់លីគកំពូលនៃប្រទេសអាហ្សេបៃហ្សង់ Azerbaijan Premier League ក្នុងទ្វីបអឺរ៉ុប បានប្រកាសចែកផ្លូវគ្នាជាមួយអ្នកចាត់ការទូទៅក្រុមជម្រើសជាតិកម្ពុជា Keisuke Honda ក្រោយភាគីទាំង២ផុតកិច្ចសន្យាជាមួយគ្នា។ នេះបើតាមការបង្ហោះលើបណ្តាញសង្គមរបស់ក្លិប ក្លិប Neftçi នារសៀលនេះ។
Keisuke Honda បានធ្វើដំណើរទៅកាន់ទីក្រុងបាគូ ប្រទេសអាហ្សេបៃហ្សង់ តាំងពីខែមីនា មកម៉្លេះ ហើយបានក្លាយជាផ្នែកមួយជួយឱ្យក្រុម Neftçi ឈ្នះពានលីគកំពូលប្រទេសខ្លួនជាលើកទី៩ ក្រោយបង្ហាញខ្លួនបាន៧លើក រកបានគ្រាប់បាល់២គ្រាប់។ ក្នុងនាមជាក្រុមជើងឯក ក្លិបNeftçi ទទួលបានកៅអីចូលរួមប្រកួតក្នុងពានរង្វាន់ UEFA Champion League នៅឆ្នាំក្រោយផងដែរ។
យ៉ាងណាមិញ Keisuke Honda បានធ្វើដំណើរមកដឹកនាំក្រុមជម្រើសជាតិកម្ពុជា ចូលរួមប្រកួតក្នុងវគ្គជម្រុះប្រចាំទ្វីបអាស៊ី នៃពានរង្វាន់ បាល់ទាត់ពិភពលោក 2022 FIFA World Cup ប្រចាំទ្វីបអាស៊ី ក្នុងប្រទេសបារ៉ែន កាលពីពេលថ្មី ក្រោយក្រុម Neftçi លើកពានលីគកំពូលប្រទេសអាហ្សេបៃហ្សង់៕