សិល្បៈជាតិ៖ សិល្បករជើងចាស់ លោកគ្រូ នូ ស៊ិប កាលពីពេលថ្មីៗនេះបានបង្ហាញវត្តមានក្នុងវីដេអូសម្ភាសន៍មួយរបស់ សាវិន ហ្វីលីព លាតត្រដាងជីវិតត្រដាបត្រដួសក្នុងវ័យ ៧០ឆ្នាំប្លាយ ដែលមានទាំងជំងឺប្រចាំកាយ ចំណែកកន្លែងជ្រកកោនផ្ទាល់ខ្លួនក៏គ្មាន ត្រូវផ្ញើខ្លួនដោយសារគេ។
រឿងរ៉ាវជីវិតពិតរបស់បុរសវ័យចំណាស់មកពីខេត្តកំពង់ធំ ដែលត្រូវបានបង្ហោះចែកចាយដោយ សាវិន ហ្វីលីព ថ្វីត្បិតតែរំលងទៅជិតពីរខែក្ដី ប៉ុន្តែខ្សែជីវិតរបស់សិល្បករជើងចាស់រូបនេះនៅតែមានការចាប់អារម្មណ៍និងតាមដានច្រើន។ ត្រយងសូមសង្ខេបសាច់រឿងជីវិតរបស់លោកគ្រូ នូ ស៊ិប ជាថ្មីម្ដងទៀត ក្រែងបងប្អូនសប្បុរសជនដែលមានធនធានចង់ចូលរួមជួយសម្រាលបន្ទុករបស់លោកបន្ថែមទៀត។
បច្ចុប្បន្នសិល្បករជើងចាស់រូបនេះមានជំងឺប្រចាំកាយ (ជំងឺលើសឈាម) និងមានជំងឺបន្ទាប់បន្សំច្រើនមុខទៀត ដូច្នេះហើយទើបលោកគ្រូពិបាកនឹងឡើងច្រៀងនៅតាមកម្មវិធីផ្សេងៗទៀត ទោះជាមានអ្នកផលិតកម្មវិធីជាច្រើនព្យាយាមចង់ជួយហៅលោកគ្រូឱ្យឡើងនៅតាមកម្មវិធីនានាក្ដី។ លោកគ្រូ នូ ស៊ិប សព្វថ្ងៃមិនមានកូននោះឡើយ លោកអាស្រ័យនៅផ្ទះរបស់កូនធម៌ ជាមួយនឹងភរិយានិងចៅម្នាក់។
ក្រោយទស្សនាវីដេអូសម្ភាសន៍របស់សិល្បករវ័យ៧៦ឆ្នាំខាងលើ រួចអ្នកគាំទ្របានចូលរួមជាថវិកាបន្តិចបន្តួចទៅតាមលទ្ធភាព ដោយផ្ញើចូលទៅក្នុងលេខគណនីធនាគារដែលមានលេខ ABA : 012 958 054 NOU SIP។ បន្ទាប់ពីបានដឹងរឿងរ៉ាវនៃជីវិតរបស់លោកហើយបងប្អូនដែលនៅចង់ជួយលោកគ្រូ នូ ស៊ិប ជាបន្តទៀតហើយវេរប្រាក់តាមគណនីខាងលើនេះ៕
ទស្សនាវីដេអូពេញខាងក្រោមនេះ៖