សិល្បៈជាតិ៖ ពេជ្រ វត្តីសារ៉ាវឌ្ឍី ក្ដាប់បានឱកាសមាសក្នុងដៃមួយថែមទៀតបន្ទាប់ពីលេចឮដំណឹងថាជិតក្លាយជា BA របស់ក្រុមហ៊ុនធំមួយដោយទទួលបានតម្លៃខ្លួនខ្ទង់លានបាត ស្រាប់តែពេលនេះលេចចេញដំណឹងច្បាស់ការមួយទៀត គឺកញ្ញានឹងបានចូលរួមសម្ដែងក្នុងរឿងភាគថៃជាលើកដំបូងផងដែរ។
MGC ឬ Miss Grand Cambodia 2022 ពេជ្រ វត្តីសារ៉ាវឌ្ឍី ហៅ Pichy ពិតជាមានប្រជាប្រិយភាពណាស់នៅក្នុងចំណោមអ្នកគាំទ្រ ពិសេសគឺក្ដីស្រលាញ់ដែលហ្វេនៗថៃបានផ្ដល់ឱ្យ រហូតអាចនិយាយបានថាកញ្ញាគឺជាតារាសម្ដែងដំបូងដែលបានបើកទ្វារចូលប្រឡូកក្នុងរង្វង់សិល្បៈថៃក៏បាន។
ដោយសារតែទទួលបានការនិយមគាំទ្រច្រើនពីមួយថ្ងៃទៅមួយថ្ងៃមិនស្រកស្រុត ធ្វើឱ្យនារីខ្មែរដំបូងដែលកំពុងតែហក់លោតក្នុងរង្វង់សិល្បៈថៃទទួលបានឱកាសការងារជារឿយៗ។ បើយោងតាមការប្រកាសផ្សព្វផ្សាយពីផេកដែលនិយមគាំទ្រ Pichy បានចេញមកទម្លាយឱ្យដឹងថាកញ្ញាជិតក្លាយជា BA របស់ផលិតផលធំមួយនៅកម្ពុជាដែលមានតម្លៃខ្លួនខ្ពស់រហូតដល់ខ្ទង់លាន។
កាន់តែអស្ចារ្យថែមទៀតនោះ Pichy ត្រូវបាន Big Boss របស់ MGI គឺលោក Nawat ប្រកាសទៀតថានឹងបានឱកាសសម្ដែងក្នុងរឿងតែមួយជាមួយនឹង Ingfah ម្ចាស់ជ័យលាភី Miss Grand Thailand លំដាប់ថ្នាក់លេខ១ និងជារង Miss Grand International 2022។
តាមដឹង Pichy អាចនឹងបានសម្ដែងនៅក្នុងរឿងភាគបែប Yuri ឬប្រភេទសាច់រឿងបែបស្រីស្រលាញ់ស្រីរឿង «แค่อยากบอกรัก (Show me love)» ដែលមានតួអង្គឯកគឺ Ingfah និង Charlotte Austin បេក្ខនារី Miss Grand Thailand រងលំដាប់ទី៥។ «គ្រាន់តែចង់ប្រាប់ថាស្នេហ៍» បានកំណត់ថ្ងៃចាក់ផ្សាយនៅអំឡុងខែកុម្ភៈ ឆ្នាំ២០២៣ ខាងមុខនេះ ដែលចំនឹងរដូវកាលបុណ្យនៃសេចក្ដីស្រលាញ់។
ប្រសិនបើ Pichy នឹងសម្ដែងក្នុងរឿងនោះ តើតួអង្គបែបណាដែលកញ្ញានឹងត្រូវសម្ដែង? ឱកាសនេះនឹងធ្វើឱ្យអ្នកគាំទ្រថៃកាន់តែស្គាល់ពីសមត្ថភាព និងស្នាដៃរបស់តារាស្រីកម្ពុជាយើងកាន់តែច្រើនថែមទៀត ហើយក៏ជាឱកាសមួយដែលនាំឱ្យផលិតករថៃចាប់អារម្មណ៍ចំពោះតារាស្រីកម្ពុជារូបនេះផងដែរ៕