អាជ្ញាធរបាននិយាយនៅថ្ងៃ អង្គារ នេះថា មនុស្សចំនួន ៦នាក់បានស្លាប់ ក្នុងនោះមានមន្រ្តីប៉ូលីស ២នាក់ នៅក្នុងហេតុការណ៍ផ្ទុះអាវុធនៅឯតំបន់ជនបទមួយនៃរដ្ឋ Queensland បន្ទាប់ពីប៉ូលីសធ្វើដំណើរទៅកាន់កន្លែងកើតហេតុ ដើម្បីស៊ើបអង្កេតពីសេចក្ដីរាយការណ៍ថា មានមនុស្សម្នាក់បានបាត់ខ្លួន។ នេះបើយោងតាមការចេញផ្សាយដោយសារព័ត៌មាន CNA នាថ្ងៃ អង្គារ ទី ១៣ ខែ ធ្នូ ឆ្នាំ ២០២២។
ប៉ូលីសរដ្ឋបាននិយាយនៅក្នុងសេចក្ដីថ្លែងការណ៍មួយថា ព័ត៌មានបឋមបានបង្ហាញថា មន្រ្តីប៉ូលីសរងការបាញ់ប្រហារពីជនដៃដល់ ២នាក់ កាលពីល្ងាចថ្ងៃ ចន្ទ ដើមសប្ដាហ៍នេះ នៅពេលដើរចូលតម្រង់ទៅរកផ្ទះមួយក្នុងតំបន់ Wieambilla ស្ថិតនៅចម្ងាយ ៣០០គីឡូម៉ែត្រ ពីភាគពាយព្យនៃទីក្រុង Brisbane នៃរដ្ឋ Queensland។
នាយករដ្ឋមន្រ្តីអូស្រ្តាលី លោក Anthony Albanese បានចាត់ទុកថា ឧបទ្ទវហេតុនេះជារឿងជារឿងគួរឲ្យភ័យខ្លាច និង ចូលរួមរំលែកទុក្ខជាមួយគ្រួសារសាច់ញាតិជនរងគ្រោះដែលបានបាត់បង់ជីវិត។
ដោយឡែកស្នងការប៉ូលីសរដ្ឋ Queensland លោកស្រី Katarina Carroll បាននិយាយថា ការបាញ់ប្រហារនេះ គឺជាការបាត់បង់ជីវិតដ៏ធំបំផុត ដែលប៉ូលីសរដ្ឋបានលះបង់ជីវិតនៅក្នុងឧប្បត្តិហេតុមួយនេះ។ ប៉ុន្ដែមិនទាន់មានព័ត៌មានលម្អិតអ្វីបន្ថែមនោះទេខណៈការស៊ើបអង្កេតមួយកំពុងធ្វើឡើងជាបន្ដ៕