ក្រុមជម្រើសជាតិអាហ្សង់ទីន ក្រោមការដឹកនាំរបស់លោក Lionel Sebastian Scaloni បានកក់កៅអីទៅកាន់វគ្គផ្តាច់ព្រ័ត្រ ក្នុងព្រឹត្តិការណ៍បាល់ទាត់ពិភពលោក FIFA World Cup ឆ្នាំ២០២២ ក្រោយឈ្នះក្រូអាត ក្នុងលទ្ធផល ៣-០ នៅកីឡដ្ឋាន Lusail កាលពីរាត្រីថ្ងៃទី១៤ ខែធ្នូ។
១គ្រាប់របស់ខ្សែប្រយុទ្ធ Lionel Messi បានធ្វើឲ្យគេក្លាយជាកីឡាករអាហ្សង់ទីនតែម្នាក់គត់ដែលអាចស៊ុតបាន១១គ្រាប់ ក្នុងព្រឹត្តិការណ៍ World Cup ហើយក៏បានបំបែកកំណត់ត្រាដែលត្រូវបានកាន់កាប់ជិត៣០ឆ្នាំរបស់អតីតកីឡាករអាហ្សង់ទីន Gabriel Batistuta ដែលរកបាន១០គ្រាប់នៅ World Cup។
គួរដឹងថាមុនមកដល់វគ្គពាក់កណ្តាលផ្តាច់ព្រ័ត្រ ក្រុមអណ្តាតភ្លើងក្រូអាត បានបង្កភាពភ្ញាក់ផ្អើលយ៉ាងខ្លាំងបំផុត ដោយបានទម្លាក់ក្រុមសាំបាប្រេស៊ីល ដែលជាក្រុមឈ្នះជើងឯក World Cup ច្រើនជាងគេបំផុតក្នុងប្រវត្តិសាស្ត្រ ដោយការយកឈ្នះ នៅវគ្គ៨ក្រុមចុងក្រោយ ក្នុងការប្រកួតដ៏តានតឹងបំផុត តាមរយៈការទាត់បាល់កាត់សេចក្តី១១ម៉ែត្រ ដោយលទ្ធផល ៤-២ នៅឯកីឡដ្ឋាន Education City បន្ទាប់ពីបញ្ចប់ការប្រកួត ១២០នាទី បានត្រឹមស្មើគ្នា លទ្ធផល ១-១។
ចំណែកឯ ក្រុមមេឃខៀវអាហ្សង់ទីន យកឈ្នះលើក្រុមមច្ចុរាជទឹកក្រូចហូឡង់ នៅក្នុងការប្រកួតដ៏តានតឹងដូចគ្នា ដោយការទាត់បាល់កាត់សេចក្តី១១ម៉ែត្រ ក្នុងលទ្ធផល ៤-៣ នៅកីឡដ្ឋាន Lusail Iconic បន្ទាប់ពីបញ្ចប់ការប្រកួត ១២០នាទី បានត្រឹមស្មើគ្នា លទ្ធផល ២-២។
វគ្គពាក់កណ្តាលផ្តាច់ព្រ័ត្រនារាត្រីនេះ៖
ថ្ងៃទី១៥ ខែធ្នូ បារាំង ប៉ះ ម៉ារ៉ុក វេលាម៉ោង ២:០០រំលងអធ្រាត្រ នៅកីឡដ្ឋាន Al Bayt៕