ជារៀងរាល់ឆ្នាំ ចន្លោះខែធ្នូ ដល់ខែកុម្ភៈ គឺរដូវរងារចាប់ផ្តើមចូលមកដល់ហើយនៅប្រទេសឡាវ ហើយអ្វីដែលគេសង្កេតឃើញនៅតាមផ្សារ គឺប្រជាពលរដ្ឋតែងតែជុំៗគ្នានៅកន្លែងលក់ខោអាវរងា ដោយម្នាក់ៗខ្លះទិញ២ទៅ៣កំប្លេ ដើម្បីពាក់បំបាត់រងា អំឡុងពេលទៅសិក្សា ឬធ្វើការជាដើម ចុះពេលទៅទស្សនាបាល់ទាត់វិញ?
ជាក់ស្តែងនៅប្រទេសឡាវ ថ្វីត្បិតតែសីតុណ្ហភាពត្រជាក់ជាង១៥អង្សាសេក៏ដោយ ប៉ុន្តែមានអ្នកគាំទ្រជាច្រើនបានធ្វើដំណើរទៅកីឡដ្ឋាន Xieng Khouang ដើម្បីចូលរួមទស្សនាការប្រកួតបាល់ទាត់ក្នុងព្រឹត្តិការណ៍កីឡាជាតិលើកទី១១។
នៅក្នុងសីតុណ្ហភាពត្រជាក់ជាង១៥អង្សាសេ នៅខេត្តព្រំប្រទល់ជាមួយប្រទេសវៀតណាម មួយនេះធ្វើឱ្យអ្នកគាំទ្រជាច្រើននាំគ្នាពាក់អាវរងា ប៉ុន្តែខ្លះទៀតសុខចិត្តដណ្តប់ភួយ ពីលើអាវរងា ទស្សនាបាល់ទាត់នៅប្រទេសឡាវ យ៉ាងកក់ក្តៅ និងប្រកបដោយភាពរីករាយបំផុត។
យ៉ាងណាក្តីនៅក្នុងពិធីបើកកីឡាជាតិរបស់ឡាវឆ្នាំនេះដែរ មានពលរដ្ឋជាច្រើនបានសម្រុកចូលរួមគាំទ្រនៅកីឡដ្ឋានផ្ទាល់ រហូតមានការកកស្ទះចរាចរណ៍ យ៉ាងខ្លាំងថែមទៀតផង។
គួរដឹងថាព្រឹត្តិការណ៍កីឡាជាតិលើកទី១១ ត្រូវបានរដ្ឋាភិបាលឡាវកំណត់ឲ្យបើកការប្រកួតជាផ្លូវការសារជាថ្មីនៅថ្ងៃទី១៣ ខែធ្នូ និងបិទបញ្ចប់វិញនៅថ្ងៃទី២២ ខែធ្នូ ឆ្នាំ២០២២ ខាងមុខ បន្ទាប់ពីបានផ្អាកអស់រយៈពេល ៨ ឆ្នាំ ពោលគឺតាំងពីឆ្នាំ ២០១៤ មកម្ល៉េះ។
ដោយមានការចូលរួមពីអត្តពលិកទូទាំងប្រទេសសរុប៥៧៦នាក់ អត្តពលិកបុរស៣០៤នាក់ និងអត្តពលិកនារី២០៩នាក់ និងគ្រូបង្វឹក៦៣នាក់ ក្នុងចំណោម២៥ប្រភេទកីឡាផ្សេងៗគ្នា៕