សិល្បៈអន្តរជាតិ៖ Go Youn Jung បច្ចុប្បន្នអាចចាត់ទុកថាជាតារាសម្ដែងម្នាក់ដែលអ្នកគាំទ្រកំពុងតែផ្ដោតក្រសែភ្នែកចំពោះនាង ទោះជារឿងដំបូងៗដែលនាងសម្ដែងបានត្រឹមជាតួបន្ទាប់បន្សំឬតារាកិត្តិយសក្ដី។ ប៉ុន្តែភាពលេចធ្លោនៃទឹកដៃសម្ដែងរបស់នាងនៅក្នុងរឿងភាគនីមួយៗធ្វើឱ្យអ្នកគាំទ្រពេញចិត្តជាខ្លាំង រហូតដល់ថ្នាក់ឱ្យតែមានឈុតឆាកដែលមានសម្ដែងរមែងមានការយកមកចែករំលែកយ៉ាងគគ្រឹកគគ្រេងលើបណ្ដាញសង្គម។
កម្លាំងគាំទ្របានរុញច្រានឱ្យ Go Youn Jung ក្ដោបបានឱកាសសម្ដែងជាតួឯកជាលើកដំបូងនៅក្នុងសាច់រឿងបុរាណបែប អភិនិហារ Alchemy of Souls: Light and Shadow វគ្គ២។ នៅក្នុងសាច់រឿងនេះនាងដើរជាតួអង្គ Jin Bo Yeon ឬ Nak Su។
Go Youn Jung កើតនៅថ្ងៃទី២២ ខែមេសា ឆ្នាំ១៩៩៦ សព្វថ្ងៃមានអាយុ២៦ឆ្នាំ បញ្ចប់ការសិក្សាថ្នាក់បរិញ្ញាបត្រពីសកលវិទ្យាល័យស្ត្រីក្រុងសេអ៊ូល (Seoul Women University) ផ្នែកវិចិត្រសិល្បៈ។ យុវតីវ័យ២០ប្លាយរូបនេះគឺជាសិល្បករស្ថិតក្រោមផលិតកម្ម MAA Management ធ្លាប់ថតផ្សាយឃោសនាផលិតផលឱ្យផលិតផលធំៗជាច្រើនដូចជា Ritz Crakers, Nike, Dior, Giogio Armani និងផលិតផលសម្រាប់លេងកីឡាជាច្រើនមុខទៀត។
នៅឆ្នាំ២០១៩ នាងបានចាប់ផ្ដើមបោះជំហានចូលក្នុងវិថីសម្ដែងដោយបានសម្ដែងរឿង He is Psychometric គឺជារឿងដំបូង។ នៅក្នុងរឿងនេះនាងសម្ដែងជាតួក្មេងស្រីម្នាក់ដែលមានទម្ងន់នៅក្នុងវ័យសិក្សា។នៅក្នុងឆ្នាំដដែលនេះ នាងចាប់ផ្ដើមទទួលបានការចាប់អារម្មណ៍តាមរយៈឃ្លីបវីដេអូផ្សព្វផ្សាយរបស់ SK Telecom ដោយសាររូបសម្រស់ស្រស់ស្អាតឆើតឆាយទាក់ទាញខ្សែភ្នែកអ្នកមើល ពិសេសសម្រស់របស់នាងអាចធ្វើឱ្យបុរសៗឈ្លក់វង្វេងហើយចង់ដឹងចង់តាមដានតើនាងគឺជាអ្នកណា?
Go Youn Jung ធ្លាប់បានសម្ដែងរឿងភាគឱ្យ Netflix រហូតដល់ទៅពីររឿងកាលពីឆ្នាំ២០២០ រឿងទីមួយគឺរឿង The School Nurse File ដែលរឿងនោះនាងសម្ដែងជាតួអង្គក្មេងស្រីម្នាក់ត្រូវបានសត្វចម្លែកមានរូបរាងដូចជាចាហួយតាមវាយប្រហារ និងរឿងទីពីរគឺរឿង Sweet Home ដោយសម្ដែងជាតួអង្គអ្នកជំនាញមើលថែមនុស្សចាស់និងកុមារ។
នៅក្នុងរឿងនោះនាងបានប្រើប្រាស់ជំនាញរបស់ខ្លួនជួយដល់អ្នកស្នាក់នៅក្នុង Apartment ឱ្យរួចរស់ជីវិតនិងអាចរស់នៅជាមួយនឹងគ្នាបាន។ព្រោះតែថ្វីដៃសម្ដែងដ៏ល្អរបស់នាងនៅក្នុងរឿង Sweet Home ធ្វើឱ្យអ្នកទស្សនាកាន់តែផ្ដោតការចាប់អារម្មណ៍មកលើរូបនាងកាន់តែខ្លាំង ជាងនោះទៀតយុវតីរូបនេះក៏ត្រូវបានបណ្ដាសារព័ត៌មានចាត់ចំណាត់ថ្នាក់ជាតារាទើបនឹងរះដែលគួរឱ្យចាប់អារម្មណ៍បំផុតកាលពីឆ្នាំ២០២១។
នៅឆ្នាំ២០២១ Go Youn Jung បានចូលរួមសម្ដែងនៅក្នុងរឿងភាគ Law School ដោយដើរជាតួអង្គក្មេងស្រីម្នាក់ប្រឡងជាប់មហាវិទ្យាល័យនីតិសាស្ត្រ ប៉ុន្តែបែរជាត្រូវសង្សារប្រើហិង្សានិងធ្វើបាបជាញឹកញាប់ ដោយសារតែខ្មាសគេដែលសង្សារប្រឡងជាប់តែខ្លួនឯងបែរជាធ្លាក់។ តួអង្គដែលនាងសម្ដែងនេះ អាចចាត់ទុកជាតួអង្គសំខាន់ម្នាក់ ទោះជាមិនមែនជាតួអង្គឯកក្ដី ប៉ុន្តែតួអង្គរបស់នាងគឺជាតួអង្គដែលនាំឱ្យកើតមានរឿងក្ដីធំ ដែលធ្វើឱ្យនិស្សិតពូកែៗត្រូវចាប់ដៃគ្នាដើម្បីជួយឱ្យនាងអាចយកឈ្នះក្ដីឱ្យបាន។
ចូលមកដល់ដើមឆ្នាំ២០២២ ឈ្មោះរបស់ Go Youn Jung ត្រូវបានលើកយកមកនិយាយពីមាត់មួយទៅមាត់មួយជាថ្មីម្ដងទៀត ព្រោះនាងបានបង្ហាញវត្តមានសម្ដែងភាពយន្តខ្នាតធំរឿង Hunt គឺជារឿងដំបូងដែលដឹកនាំដោយកំពូលតារាសម្ដែងឈានមុខ Lee Jong Ja។ នៅក្នុងរឿងនេះនាងសម្ដែងជានិស្សិតម្នាក់ដែលមានជាប់ពាក់ព័ន្ធនឹងរឿងក្ដីតាមប្រមាញ់ជនបង្កប់ដែលមកបន្លំខ្លួនអង្គភាពមួយ ដោយសារតែហេតុការណ៍នោះមានទាក់ទងនឹងឪពុករបស់នាង។
ក្រៅពីស្នាដៃភាពយន្តនៅឆ្នាំ២០២២នេះ Go Youn Jung ក៏លេចធ្លោណាស់ដែរ ព្រោះស្នាដៃសម្ដែងជាតួអង្គ Nak Su ឃាតកក្រមុំដ៏អង់អាចក្លាហាន នៅក្នុងរឿង Alchemy of Souls ទោះជាតួអង្គរបស់នាងគ្រាន់តែបង្ហាញខ្លួនត្រឹមតែប៉ុន្មាននាទីក្នុងភាគមួយភ្លាមគឺទទួលបានការចាប់អារម្មណ៍ភ្លែតតែម្ដង។
យ៉ាងណាមិញ Alchemy of Souls: Light and Shadow វគ្គ២ ដែលជាទំព័រថ្មីមួយសម្រាប់ Go Youn Jung ក្នុងនាមជាតួឯកស្រី នៅតែមានការចាប់អារម្មណ៍ច្រើន សឹងអាចនិយាយបានថាលើសពីវគ្គទីមួយទៅទៀត។ នៅក្នុងវគ្គ២នេះ នាងត្រូវសម្ដែងជាតួអង្គនារីម្នាក់បាត់ការចងចាំ ហើយត្រូវបានគេស្គាល់ថាឈ្មោះឈ្មោះ Jin Bo Yeon កូនស្រីច្បងរបស់គ្រួសារត្រកូល Jin ប៉ុន្តែវិញ្ញាណពិតរបស់នាងគឺឃាតកស្រី Nak Su។ សម្រាប់ Go Youn Jung នៅក្នុងរឿងនេះបានបង្ហាញឱ្យអ្នកទស្សនាឃើញពីរូបសម្បត្តិស្អាតឥតទាស់រកកន្លែងរិះគន់គ្មាន ចំណែកឯថ្វីដៃសម្ដែងទៀតនោះរឹតតែល្អ រកចំណុចឆ្គាំឆ្គងគ្មានដូចគ្នា។
រឿងភាគវគ្គទីពីររបស់ Go Youn Jung មានចំនួនត្រឹមតែ ១០ភាគប៉ុណ្ណោះ ប្រសិនបើបងប្អូនដែលមិនទាន់បានទស្សនាអាចរកមើលបាននៅលើ App Netflix៕
