ខេត្តក្រចេះ៖ យុវជនពីរនាក់ជិះម៉ូតូចេញពីមើលល្ខោន ក៏ស្រាប់តែជួបយុវជនមួយក្រុមទៀត ជិះម៉ូតូតាមពីក្រោយ កាន់កាំបិតផ្គាក់តាមកាប់ តែម្ចាស់ម៉ូតដឹងខ្លួនទាន់ ក៏ផ្ដួលម៉ូតូរត់គេចខ្លួននៅសល់តែម៉ូតូ ត្រូវក្រុមជនសង្ស័យកាប់ម៉ូតូជនរងគ្រោះខ្ទេច កាលពីវេលាម៉ោង២៣ៈ០៥នាទីយប់ថ្ងៃទី១៣ ខែ ធ្នូ ឆ្នាំ២០២២ នៅចំណុចមុខសាលាក្រុងក្រចេះ ស្ថិតនៅភូមិអូរឫស្សី១ សង្កាត់អូរឫស្សី។
តាមប្រភពព័ត៌មានពីជនរងគ្រោះបានឱ្យដឹងថា មុនពេលកើតហេតុ ខ្លួនបានចេញពីកន្លែងមើលគេលេងល្ខោន នៅចំណុចវត្តស្វាយជ្រះ ឃុំស្វាយជ្រះ ស្រុកស្នួល ចូលមកទីរួមខេត្តក្រចេះ ដោយបានជិះម៉តូ១គ្រឿង ម៉ាកហុងដាឌ្រីម សេរីឆ្នាំ២០១៨ ពាក់ស្លាកលេខ ក្រចេះ១D.៧៩៣៣ ពេលជិះមកដល់ចំណុចសាលាវិទ្យាល័យខូវប៊ុនស៊ុន ក៏ឃើញជនសង្ស័យ៣នាក់ ជិះម៉ូតូ១គ្រឿង ម៉ាក Exciter ពណ៌ស ដេញតាមពីក្រោយ ដោយមានកាន់កាំបិតផ្គាក់១ដើម ដេញតាមកាប់លើពួកខ្លួន ដោយឃើញសភាពមិនស្រួល ទើបរូបឡគេបានផ្ដួលម៉ូតូហើយរត់គេចខ្លួនចេញពីកន្លែងកើតហេតុ ពេលនោះជនសង្ស័យ ក៏បានយកកាំបិតផ្គាក់កាប់មកលើម៉ូតូខ្លួនតែម្ដងទៅ។
ជនរងគ្រោះ ឈ្មោះ អឿន សុចិត្រា ភេទប្រស អាយុ១៥ឆ្នាំ និងម្នាក់ទៀតឈ្មោះ ណន មេងហេង ភេទប្រុស អាយុ១៦ អ្នកទាំង២ មានទីលំនៅភូមិថ្នល់ ឃុំស្វាយជ្រះ ស្រុកស្នួល ខេត្តក្រចេះ។ ចំណែកជនបង្កមានគ្នា៣នាក់ ទី១-ឈ្មោះ ស្រាង អេ ភេទប្រុស អាយុ១៤ឆ្នាំ មានទីលំនៅភូមិអូរគ្រឿង ឃុំអូរគ្រឿង ស្រុកសម្បូរ ។ ទី២-ឈ្មោះ ភាព សុផៃ ភេទប្រុស អាយុ១៦ឆ្នាំ មានទីលំនៅភូមិក្រចេះ សង្កាត់ក្រចេះ ក្រុងក្រចេះ ។ និងទី៣ឈ្មោះ សេង វ៉ាខេង ភេទប្រុស អាយុ១៨ឆ្នាំ មានទីលំនៅភូមិអូរគគី ឃុំដារ ស្រុកចិត្របុរី។
ក្រោយកើតហេតុ ជនរងគ្រោះបានទៅដាក់ពាក្យបណ្តឹង នៅអធិការដ្ឋាននគរបាលក្រុងក្រចេះ បន្ទាប់ពីទទួលពាក្យបណ្តឹងភ្លាមៗ កម្លាំងអធិការដ្ឋាននគរបាលក្រុងក្រចេះ បានធ្វើការស្រាវជ្រាវរហូតឃាត់ខ្លួនជនសង្ស័យចំនួន៣នាក់ធ្វើការសាកសួរនៅថ្ងៃទី១៤ ខែធ្នូ ឆ្នាំ២០២២។ បច្ចុប្បន្ន ជនសង្ស័យនិងវត្ថុតាងត្រូវបាននាំយកទៅអធិការដ្ឋាននគរបាលក្រុងក្រចេះ ដើម្បីធ្វើការដោះស្រាយតាមផ្លូវច្បាប់៕
អត្ថបទ៖ ផ្នែកសង្គម