ក្រុមជម្រើសជាតិហ្វីលីពីន ក្រោមការដឹកនាំរបស់លោក Josep Ferré Ybarz បានធ្វើដំណើរមកដល់រាជធានីភ្នំពេញ តាមច្រកព្រលានយន្តហោះអាកាសយានដ្ឋានអន្តរជាតិភ្នំពេញ នៅរសៀលថ្ងៃទី១៥ ខែធ្នូ ពោលគឺមានរយ:ពេល៥ថ្ងៃ មុនប៉ះកម្ពុជា។
មុនធ្វើដំណើរមកប្រកួតបើកឆាកពូល A ជាមួយកម្ពុជា ក្នុងពានរង្វាន់ AFF Mitsubishi Electric Cup 2022 នៅថ្ងៃទី២០ ខែធ្នូ នៅពហុកីឡដ្ឋានជាតិមរតតេជោ ខាងមុខក្រុមជម្រើសជាតិហ្វីលីពីន បានប្រកួតចាញ់វៀតណាម ក្នុងលទ្ធផល ១-០ ការប្រកួតមិត្តភាពអន្តរជាតិ កាលពីល្ងាចម្សិលមិញ នៅប្រទេសវៀតណាម។
គួរដឹងថាកាលពីថ្ងៃទី៨ ខែធ្នូ សហព័ន្ធកីឡាបាល់ទាត់ហ្វីលីពីន បានប្រកាសតែងតាំងលោក Josep Ferré Ybarz ជនជាតិអេស្ប៉ាញ ជាគ្រូបង្វឹកថ្មីរបស់ក្រុម Azkals (Azkals ជារហស្សនាមរបស់ក្រុមជម្រើសជាតិហ្វីលីពីន) ដើម្បីជំនួសកៅអីលោក Thomas Dooley ដែលបានចាកចេញ។
ពានរង្វាន់ AFF Mitsubishi Electric Cup 2022 មាន១០ក្រុមចូលរួម បែងចែកជា២ពូល ដោយប្រកួតចាប់ពីថ្ងៃទី២០ ខែធ្នូ ឆ្នាំ២០២២ ដល់ថ្ងៃទី១៦ ខែមករា ឆ្នាំ២០២២។ សម្រាប់ពូល A មានថៃ ហ្វីលីពីន ឥណ្ឌូណេស៊ី កម្ពុជា និងប្រ៊ុយណេ ខណ:ពូល B មានវៀតណាម ម៉ាឡេស៊ី សិង្ហបុរី មីយ៉ាន់ម៉ា និងឡាវ៕
