រថយន្តធុនធំ២គ្រឿងបុកគ្នានៅតាមបណ្តោយផ្លូវជាតិលេខ៤ ចន្លោះគីឡូម៉ែត្រ១៣៨-១៣៩ស្ថិតក្នុង ភូមិបឹងត្រាច ឃុំចំការហ្លួង ស្រុកកំពង់សីលា ខេត្តព្រះសីហនុ វេលាម៉ោង៦ព្រឹកថ្ងៃ១៨មិថុនា២០២១នេះ បណ្តាលឲ្យអ្នកបើកបររថយន្តម្នាក់ស្លាប់កៀបជាប់ក្នុងរថយន្ត។
សមត្ថកិច្ចបញ្ជាក់ថា គ្រោះថ្នាក់ចរាចរណ៍កើតឡើង រវាង រថយន្តផ្ទុកកុងតឺន័រ ក្បាលពណ៌ស លាយបៃតង ម៉ាក HINO ពាក់ស្លាកលេខ ភ្នំពេញ 3A-2887 បុកប៉ះជាមួយ រថយន្តផ្ទុកកុងតឺន័រ ក្បាលពណ៌ ស ម៉ាកFrightliner ពាក់ស្លាកលេខ ព្រះសីហនុ 3A-1427 អ្នកបើកបរ(រត់គេចបាត់)ក្នុង ទិសដៅផ្ទុយគ្នា បណ្ដាល អោយអ្នកបើកបរឈ្មោះ លី រ៉ាវី អាយុ ៣៣ឆ្នាំ ភេទប្រុស មានទីលំនៅ ឃុំជីរោទ៍ ស្រុកត្បូងឃ្មុំ ខេត្តត្បូងឃ្មុំ ស្លាប់នៅនឹងកន្លែង។
ចំណែកអ្នករួមដំណើរក្នុងរថយន្តHINO ចំនួន ០២នាក់ រងរបួសមានឈ្មោះ ៖
១ -ឆាយ ឡែន ភេទ ស្រី អាយុ ៣៥ឆ្នាំ មានទីលំនៅខេត្តព្រៃវែង រងរបួសស្រាល ត្រូវជាប្រពន្ធអ្នកបើកបរខាងលើ ។
២ -ឯល សុខហេង ភេទប្រុស អាយុ ១៦ឆ្នាំមានទីលំនៅខេត្តព្រៃវែង រងរបួសស្រាល ។ អ្នករងរបួសទាំងពីរត្រូវបានបញ្ចូនទៅព្យាបាលនៅមន្ទីរពេទ្យបង្អែកស្រុកស្រែអំបិល។
ក្រោយកើតហេតុ កម្លាំង អាវុធស្នាក់ការ សន្តិសុខ ៤០២ សហការ ជាមួយ កម្លាំងអធិការដ្ឋាន នគរបាលស្រុកកំពង់សីលា ចុះអន្តរាគមន៍ជួយគាស់យកសាកសពដែលកៀបជាប់ក្នុងរថយន្ត និងបញ្ជូនអ្នករបួសទៅមន្ទីរពេទ្យ ការពារកន្លែងកើតហេតុ រៀបចំសណ្តាប់ធ្នាប់ សម្រួលចរាចរណ៍ និងដោះស្រាយបន្តតាមនិតិវិធី៕
