សិល្បៈជាតិ៖ ថ្វីត្បិតតែអ្វីដែលកញ្ញា មាន សូនីតា លើកឡើងមានមិត្តនារីជាច្រើនពេញចិត្តនិងគាំទ្រចំពោះសម្ដីរបស់កញ្ញា ប៉ុន្តែបើក្រឡេកមើលមតិបងប្អូនបុរសៗវិញ ទំនងជាមិនគាំទ្រនិងបដិសេធចោលការយល់ឃើញរបស់កញ្ញាថែមទៀត។
កាលពីថ្ងៃបុណ្យគ្រីស្តស្មាស់ ម្សិលមិញនេះ កញ្ញា មាន សូនីតា បានបង្ហោះទស្សនៈផ្ទាល់ខ្លួនដោយលើកឡើង២ចំណុច។ ចំណុចទីមួយ «មនុស្សប្រុសដែលជោគជ័យ គឺជាមនុស្សប្រុសដែលរកលុយបានច្រើនជាងការចំណាយរបស់ប្រពន្ធ» និងចំណុចទីពីរ «មនុស្សស្រីដែលទទួលបានជោគជ័យគឺជាមនុស្សស្រីដែលរកស្វាមីបែបនេះបាន។» ដោយភ្ជាប់ជាមួយនឹងឃ្លា រីករាយថ្ងៃបុណ្យណូអែលអ្នកទាំងអស់គ្នា។
បើសង្កេតមើលការបញ្ចេញយោបល់របស់អ្នកលេងបណ្ដាញសង្គមភាគីនារី គឺបានបង្ហាញសារគាំទ្រនិងសាទរចំពោះគំនិតនិងទស្សនៈដែលបានលើកឡើងខាងលើរបស់កញ្ញា មាន សូនីតា។ ប៉ុន្តែបើក្រឡេកមើលភាគីបុរសៗដែលទោះជា Top Fan របស់ផេកកញ្ញាក្ដី គឺមិនគាំទ្រចំពោះការលើកឡើងរបស់កញ្ញាទាល់តែសោះ។ ត្រយងសូមលើកយកទស្សនៈផ្ទុយពីការយល់ឃើញរបស់កញ្ញា សូនីតា មកបង្ហាញខ្លះៗ:
– មិនគាំទ្រគំនិតនេះទេ ធម្មតាអ្នករកលុយមិនដូចអ្នកចាយលុយទេ ទោះប្តីខំរកយ៉ាងណាបើប្រពន្ធគិតតែពីចំណាយក៏គ្មានថ្ងៃដែលប្តីអាចជោគជ័យដែល និយមន័យចេញមកគឺទុកលុយជាធំបាត់ហើយ
– លុយមិនមែនជាអ្វីគ្រប់យ៉ាងនោះទេ។ ការជោគជ័យក៏មិនមែនលុយតែម្យ៉ាងនោះដែរ។
– មានតែមនុស្សមានបញ្ហាសតិអារម្មណ៍ទេ ទើបអាចនិយាយភាសានេះបាន
– មនុស្សប្រុសដែលជោគជ័យគឺមនុស្សប្រុសដែលជួបមនុស្សស្រីមិនគិតបែបនឹង?
ក្នុងចំណោម Comment ជាច្រើនដែលបានចូលមកបង្ហាញការយល់ស្រប និងមិនយល់ស្របខ្លះចំពោះអ្វីដែលកញ្ញា មាន សូនីតា បានលើកឡើង គេឃើញអតីតពិធីករយុវវ័យដ៏ពេញនិយម តាប៊ុយ ក៏បានបង្ហាញពីការយល់ឃើញដូចគ្នាដែរថា៖ «OK ចាំដេកផ្ទះធ្វើជាប្រពន្ធដ៏ល្អ យើងធ្វើជាប្តីវិញទៅ លុយចាយអត់គ្រប់ត្រូវហើយប៉ាវា»
តាមពិតការលើកឡើងរបស់ កញ្ញា មាន សូនីតា មិនខុសនោះទេ ចំណែកការយល់ឃើញផ្ទុយពីកញ្ញាក៏មិនខុសនោះដែរ ព្រោះមនុស្សយើងម្នាក់ៗរមែងមានគំនិតខុសប្លែកពីគ្នា មិនអាចយល់ឃើញដូចគ្នាទាំងស្រុងនោះឡើយ។ ប៉ុន្តែអ្វីដែលសំខាន់គឺយើងគ្រប់គ្នាប្រព្រឹត្តិតែអំពើល្អមិនបៀតបៀន មិនបំពាន និងធ្វើបាប មិនបង្ខិតបង្ខំអ្នកដទៃ នោះគឺជាការល្អណាស់ទៅហើយ៕
