សិល្បៈអន្តរជាតិ៖ ថ្មីៗនេះសារព័ត៌មានកូរ៉េបានបង្ហោះលទ្ធផលបោះឆ្នោតពីអ្នកកាសែតក្នុងកម្មវិធី Golden Raspberry Festival ដែលជាកម្មវិធីមួយផ្ដល់ពានដល់តារាដែលមានលទ្ធផលអាក្រក់បំផុតប្រចាំឆ្នាំ។
នៅក្នុងការបោះឆ្នោតនោះសារព័ត៌មានមួយរបស់កូរ៉េ Sport Kyunghyang បានទទួលលទ្ធផលបោះឆ្នោតពីអ្នកកាសែតចំនួន៣៤រូបនៅក្នុងរង្វង់ព័ត៌មានសិល្បៈ ដោយបានផ្ដល់ឱ្យតារាចំនួន៣រូបដែលឈ្នះពានក្នុងផ្នែកធំៗចំនួន៣គឺ តារាដែលចរិតឈ្លើយជាងគេបំផុត តារាដែលសម្ដែងអន់ជាងគេបំផុត និងភាពយន្តដែលអន់បំផុត។
នៅក្នុងឆ្នាំទី៦ នៃការរៀបចំពានរង្វាន់នេះ គេឃើញមានភាពខុសប្លែកពីឆ្នាំមុនៗដែលពានរង្វាន់តារាចរិតឈ្លើយរមែងបានទៅ Director តែឆ្នាំនេះក្រុមអ្នកសារព័ត៌មានបានផ្ដល់ពាននេះដល់តារារហូតដល់ទៅ៣ដួងមិនមែនតែម្នាក់នោះឡើយ។
១. Don Lee (51) ទទួលបានសំឡេងបោះឆ្នោត២០សំឡេង
តារាទីមួយដែលត្រូវបានអ្នកកាសែតបោះឆ្នោតឱ្យជាតារាដែលចរិតឈ្លើយនោះគឺបានទៅលើពូម៉ាប់ Don Lee បុរសមាឌយក្សពីភាពយន្ត «Train to Busan»។ តារាវ័យ ៥១ឆ្នាំរូបនេះ ទទួលបានការបោះឆ្នោតចំនួន២០សំឡេង។ ការដែលតារារូបនេះទទួលសំឡេងឆ្នោតច្រើនលើសលប់ដូច្នេះព្រោះតែលោកបានបដិសេធមិនផ្ដល់សម្ភាសន៍ និងបង្ហាញវត្តមានក្នុងការសម្ពោធភាពយន្តចំនួន២ដែលលោកបានសម្ដែងក្នុងឆ្នាំ២០២២នេះ។ រឿងទាំងពីរនោះគឺ «The Roundup» និង «Men of Plastic»។
ក្រុមអ្នកកាសែតបានរិះគន់ថាតារារូបនេះមិនសមជាតារាសម្ដែងវិជ្ជាជីវៈ មានភាពខ្ជិលច្រអូស ចំណែកអាកប្បកិរិយាទៀតសោតក៏មិនសមនឹងតំណែងតួឯក និងផលិតករនោះដែរ។ លោកគ្រាន់តែប្រាប់ពីមូលហេតុខ្លីៗថា មិនមានបញ្ហាផ្ទាល់ខ្លួនមិនអាចផ្ដល់សម្ភាសន៍បាន ហើយផ្ដល់ដល់អ្នកកាសែតនូវ Press Release ដែលជាសំនួរចម្លើយលោកបង្កើតឡើងដោយខ្លួនឯង។
២. Kim Tae Ri (32) ទទួលបានសំឡេងបោះឆ្នោត១១សំឡេង
ថ្មីៗនេះ Kim Tae Ri ទើបតែទទួលបានពានរង្វាន់ជាតារាសម្ដែងស្រីឆ្នើមពីកម្មវិធី Baeksang Art Award តាមរយៈតួអង្គ សិស្សវិទ្យាល័យឈ្មោះ Na Hee Do ពីភាពយន្ត «Twenty-Five Twenty-One»។ ថ្វីត្បិតបានទទួលពានរង្វាន់ធំក្ដី ក៏មិនអាចជួយឱ្យ Kim Tae Ri គេចផុតពីការរិះគន់ពីអ្នកសារព័ត៌មានដោយសារតែអាកប្បកិរិយានិងចរិតមិនសូវសមរម្យរបស់នាង ក្នុងអំឡុងសន្និសីទកាសែត។
តំណាងរបស់អ្នកកាសែតបានរិះគន់ថា Kim Tae Ri មិនផ្ដោតអារម្មណ៍សោះនៅពេលផ្ដល់បទសម្ភាសន៍នៅក្នុងកម្មវិធីសម្ពោធភាពយន្ត «Alienoid» ដោយធ្វើចរិតមើលតែក្មេងរៀនវិទ្យាល័យ។ ខណៈដែលអ្នកកាសែតម្នាក់ថា Kim Tae Ri ចូលតួនិងវិញ្ញាណជាតួអង្គ Ne Hee Do។
៣. Nam Joo Hyuk (28) ទទួលបានសំឡេងបោះឆ្នោត៦សំឡេង
ចំណាត់ថ្នាក់លេខ៣បានទៅតារាសម្ដែងសំណព្វចិត្តយុវវ័យ Nam Joo hyuk ដោយលោកបានសំឡេងបោះឆ្នោតចំនួន៦។ ការដែលបុរសសង្ហារូបនេះទទួលបានពាននឹងដែរនោះគឺមិនមែនដោយសារតែលោកធ្វើចរិតមិនល្អដាក់អ្នកកាសែតនោះទេ ប៉ុន្តែឈ្មោះរបស់លោកមានជាប់ពាក់ព័ន្ធនឹងករណី Bully នៅមុនពេលដែលលោកចាប់ផ្ដើមប្រូម៉ូតភាពយន្តថ្មី «Remember»។
តំណាងអ្នកសារព័ត៌មានបានលើកឡើងថាបញ្ហាចម្រូងចម្រាសនេះបានធ្វើឱ្យជះឥទ្ធិពលយ៉ាងខ្លាំងដល់ភាពយន្តដែលសម្ដែងដោយតារារូបនេះ។ ជាពិសេសនៅក្នុងកម្មវិធីសន្និសីទកាសែតផ្សព្វផ្សាយភាពយន្តរបស់លោក ដែលមានអ្នកកាសែតចូលរួមកុះករនោះ មិនមានវត្តមាន Nam Jok Hyuk នោះឡើយ៕
ប្រភព៖ KBizoom
