សិល្បៈជាតិ៖ Rapper ល្បីឈ្មោះ ម៉ាន់ វណ្ណដា បន្ទាប់ពីមមាញឹកការងារជាយូរ ពេលនេះមានពេលវេលាអាចសម្រាកលម្ហែខួរក្បាលនិងជូនអ្នកមានគុណទៅកម្សាន្តចុងឆ្នាំនាខេត្តសៀមរាប។យ៉ាងណាមិញ រឿងដែលគួរឱ្យចាប់អារម្មណ៍បន្ទាប់គឺហ្វេនៗរបស់តារារូបនេះបែរជានាំគ្នាសុំខ្លួនធ្វើជាកូនប្រសារម្ដាយឪពុករបស់វណ្ណដាគ្រប់ៗគ្នា។
កាលពីថ្ងៃទី១ ខែមករា ឆ្នាំ២០២៣ ម្សិលមិញនេះ ម្ចាស់បទ «J+O2» បានបង្ហោះសារចែករំលែកនៅលើហ្វេសប៊ុកពីក្ដីរីករាយរបស់ខ្លួន ដែលអាចឆ្លៀតឱកាសពីការងារដ៏មមាញឹកជូនអ្នកមានគុណទៅដើរលេងកម្សាន្តនៅតំបន់រមណីដ្ឋានមួយនាខេត្តសៀមរាប។ វណ្ណដា បានរៀបរាប់ពីអារម្មណ៍របស់ខ្លួនយ៉ាងដូច្នេះថា៖ «ជូនព្រះរស់ដើរលេងកម្សាន្ត បិទទំព័រឆ្នាំ២០២២ 
រីករាយឆ្លងឆ្នាំថ្មី ២០២៣ ជូនពរពុកម៉ែបងប្អូនទាំងអស់គ្នា សុខសប្បាយ មានសេចក្តីសុខក្នុងក្រុមគ្រួសារ ហេង ហេង សាធុៗៗ »
ជាមួយនឹងរូបភាពគ្រួសារដ៏រីករាយនោះ គេសង្កេតឃើញថាហ្វេនៗនារីដែលជាអ្នកគាំទ្រ វណ្ណដា ហាក់ដូចជានាំគ្នាសំរុកចង់ធ្វើជាកូនប្រសាររបស់ប៉ាម៉ាក់ វណ្ណដា ខ្លាំង ព្រោះរាល់ការបញ្ចេញមតិនីមួយៗសុទ្ធតែប្រើពាក្យថា ប៉ាម៉ាក់ក្មេកមិនដាច់ពីមាត់។
ក្នុងនោះត្រយងសូមដកស្រង់នូវមតិដែលបានលើកឡើងដោយហ្វេនខ្លះៗដូចតទៅ៖ «ប៉ាម៉ាក់ក្មេកចេះសម្តែងទៀត» «ប៉ាម៉ាក់ក្មេកខ្ញុំធ្វើម៉េចក៏សមដែរ» «ប៉ាៗកប្លែកស្ងួតណាស់ដែរនឹង» «ប៉ាម៉ាក់ក្មេកខ្ញុំពូកែលេងសើចដូចកូនប្រសារម្ល៉េះ» «ប៉ាក្មេកនិងម៉ាក់ក្មេកជំរាបសួរ»
