ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិ CAMSOC-CAMAPGOC កាលពីថ្ងៃទី៣ ខែមករា ក្រោយកិច្ចប្រជុំគណៈអចិន្ត្រៃយ៍ បានមានប្រសាសន៍ថា៖ «ក្នុងនាមជាម្ចាស់ផ្ទះ រៀបចំ ព្រឹត្តិការណ៍ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ គឺនៅគ្រប់បណ្តារាជធានី-ខេត្តទាំងអស់ នឹងត្រូវរៀបចំតុបតែងផ្សព្វផ្សាយ នៅតាមទីសាធារណៈនានា ចាប់ពីពាក់កណ្តាលខែមករា ឆ្នាំ២០២៣ នេះតទៅ ដើម្បីបញ្ជ្រាបការផ្សព្វផ្សាយឱ្យកាន់តែទូលំទូលាយបន្ថែម ជូនដល់ប្រជាពលរដ្ឋទូទាំងប្រទេស ក៏ដូចជាបង្ហាញដល់បណ្តាប្រទេសនានា បានមើលឃើញពីការត្រៀមខ្លួនរបស់កម្ពុជា មុនពេលពិធីរាប់ថយក្រោយ១០០ថ្ងៃចូលមកដល់»។
ឯកឧត្តម វ៉ាត់ ចំរើន គូសបញ្ជាក់ថា៖ «សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិ CAMSOC-CAMAPGOC បានផ្តល់អនុសាសន៍ណែនាំដ៏ខ្ពង់ខ្ពស់ឱ្យខាងជំនាញគ្រប់ផ្នែកទាំងអស់ ត្រៀមខ្លួនឱ្យបានរួចរាល់ និងច្បាស់លាស់ ដោយទទួលបានការគាំទ្រពីអាជ្ញាធររាជធានី-ខេត្តទាំងអស់ ក្នុងការរៀបចំតុបតែង ផ្សព្វផ្សាយអំពីស៊ីហ្គេម-អាស៊ានប៉ារ៉ាហ្គេម ឆ្នាំ២០២៣។ សម្រាប់ការរៀបចំការតុបតែងនៅភ្នំពេញ នឹងរៀបចំចាប់ផ្តើមពីអាកាសយានដ្ឋានអន្តរជាតិភ្នំពេញ និងនៅតាមដងផ្លូវ ទីសាធារណៈផ្សេងៗ»។
ឯកឧត្តម វ៉ាត់ ចំរើន បានបន្ថែមថា៖ «ជារួម គណៈកម្មាធិការជាតិ CAMSOC-CAMAPGOC កំពុងត្រៀមរៀបចំរួចរាល់ហើយ ដែលយើងបានផ្តល់ជូនដល់ក្រុមហ៊ុន តាមរយៈការផ្ទេរសិទ្ធិមុខងារមួយចំនួនដល់ក្រុមហ៊ុនជាដៃគូ ដែលសម្តេចពិជ័យសេនា ទៀ បាញ់ តែងតែផ្តល់អនុសាសន៍ឱ្យគណៈកម្មាធិការជាតិ CAMSOC ធ្វើកិច្ចសន្យាឱ្យបានច្បាស់លាស់ជាមួយក្រុមហ៊ុន ក្នុងការផ្គត់ផ្គង់សេវាកម្មនានា។ កិច្ចការទាំងអស់នេះ យើងបានរៀបចំធ្វើយ៉ាងយកចិត្តទុកដាក់ខ្ពស់ ត្រៀមរៀបចំតុបតែងផ្សព្វផ្សាយតាមទីតាំងគោលដៅនីមួយៗ»។
សម្រាប់កាលបរិច្ឆេទ យោងតាមការសម្រេចជាផ្លូវការកាលបរិច្ឆេទនៃការប្រកួតព្រឹត្តិការណ៍ កីឡា ទាំង២នេះ គឺគ្រោងនឹងធ្វើនៅពាក់កណ្ដាល ឆ្នាំ២០២៣ ពោលគឺការប្រកួតស៊ីហ្គេម ចាប់ផ្ដើមមុន រួចទើបការប្រកួតអាស៊ានប៉ារ៉ាហ្គេម ចាប់ផ្ដើមជាក្រោយ បានសេចក្ដីថា រំលងពីគ្នារយៈពេល ១៧ថ្ងៃ។ ព្រឹត្តិការណ៍កីឡាអាស៊ីអាគ្នេយ៍ លើកទី៣២ (32nd SEA Games) នឹងធ្វើឡើងពីថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣ ចំណែកព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ (12th ASEAN Para Games) នឹងធ្វើឡើងពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣៕