ការទទួលធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម នាឆ្នាំ២០២៣ គឺជាព្រឹត្តិការណ៍នឹងបង្កឱកាសឱ្យកម្ពុជាពង្រឹង និងពង្រីកសក្ដានុពលផ្នែកកីឡារបស់ខ្លួនដែលក្នុងនោះក៏មានកីឡាករ កីឡាការិនីជម្រើសជាតិមួយចំនួនមានសមាសភាពចេញពីក្រុមប្រឹក្សាកីឡាក្រសួងមហាផ្ទៃនេះដែរ។
នេះជាការលើកឡើងរបស់សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងក្នុងនាមប្រធានក្រុមប្រឹក្សាកីឡាក្រសួងមហាផ្ទៃ អញ្ជើញជាអធិបតីក្នុងពិធីសំណេះសំណាលជាមួយថ្នាក់ដឹកនាំ ប្រតិភូ គ្រូបង្វឹក និងកីឡាករ កីឡាការិនី នៃអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ នៅថ្ងៃទី៥ ខែមករា ឆ្នាំ២០២៣ ប្រារព្ធនៅសាលប្រជុំ នៃសាកលវិទ្យាល័យភូមិន្ទភ្នំពេញ។
សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក៏បានសន្យាថានឹងពិនិត្យលទ្ធភាពដើម្បីផ្ដល់ក្របខណ្ឌមន្រ្តីរាជការ ពិសេសក្របខណ្ឌនគរបាលជាតិ ដល់កីឡាករ កីឡាការិនី ដោយជាបឋមនឹងផ្ដល់អាទិភាពលើកីឡាករ និងកីឡាការិនីមានស្នាដៃដណ្ដើមបានមេដាយមាស ប្រាក់ និងសំរិទ្ធ។ សម្ដេចបានទទូចជាថ្មីទៀតឱ្យកីឡាករ កីឡាការនី បន្តខិតខំប្រឹងប្រែងដើម្បីទទួលបានឱកាសអភិវឌ្ឍន៍ខ្លួន។
ក្នុងពិធីសំណេះសំណាលនេះ ក្រុមកីឡាករ កីឡាការិនីក្រសួងមហាផ្ទៃ ក៏មានត្រៀមឈុតឆាកខ្លីៗ នៃកីឡាករ កីឡាការីនីទាំង០៨ប្រភេទផ្សេងគ្នា ដើម្បីសម្តែង និងបង្ហាញជូនថ្នាក់ដឹកនាំ អំពីសក្កានុពល និងភាពរីកចម្រើន នៃវិស័យកីឡារបស់ក្រសួងមហាផ្ទៃ ផងដែរ។
សូមបញ្ជាក់ថា ព្រឹត្តិការណ៍កីឡាជាតិលើកទី១ ឆ្នាំ២០១៦ ក្រុមប្រឹក្សាកីឡាក្រសួងមហាផ្ទៃ ទទួលបានមេដាយសរុប៥៣គ្រឿង (មាស២៧ ប្រាក់១២ និងសំរឹទ្ធ១៤) កីឡាជាតិលើកទី២ ឆ្នាំ២០១៨ ទទួលបានមេដាយសរុប ១៤៩គ្រឿង (មាស៨៣ ប្រាក់៤៣ និងសំរឹទ្ធ២៣) និងព្រឹត្តិការណ៍ប្រកួតកីឡាជាតិលើកទី៣ ឆ្នាំ២០២២ ទទួលបានមេដាយសរុប២១១គ្រឿង (មាស១០៣ ប្រាក់៥៨ និងសំរឹទ្ធ៥០) នាំឱ្យក្រសួងមហាផ្ទៃឈរនៅលំដាប់ទី១ទូទាំងប្រទេស។
ចំពោះព្រឹត្តិការណ៍នៃការប្រកួតកីឡាស៊ីហ្គេមលើកទី៣១ នៅប្រទេសវៀតណាម កាលពីខែឧសភា ឆ្នាំ២០២២កន្លងទៅ កម្ពុជាទទួលបានមេដាយសរុប ៣៥គ្រឿង (មាស០៧ ប្រាក់០៨ និងសំរឹទ្ធ២០) ។ ចំពោះការប្រកួតក្នុងព្រឹត្តិការណ៍ផ្សេងៗនៅឆាកអន្តរជាតិវិញ អគ្គលេខាធិការដ្ឋាន បានបញ្ជូនអត្តពលិកទៅចូលរួមការប្រកួតនៅប្រទេសមួយចំនួនដូចជា៖ ចិន, ហូឡង់ដ៍, កូរ៉េ, និងថៃជាដើម ដោយទទួលបានមេដាយសរុប ១៥៦គ្រឿង (មាស៤២ ប្រាក់៦៨ និងសំរឹទ្ធ៤៦)៕
