សិល្បៈជាតិ៖ ម្ចាស់បទ «នៅទីនេះមានមនុស្សខូចចិត្ត» អ្នកនាង អេដា ទើបតែសម្រាលកូនដំបូងរបស់ខ្លួននៅថ្ងៃទី១០ ខែមករា ឆ្នាំ២០២៣ ម្សិលមិញនេះ នាមន្ទីរពេទ្យ បាំរ៉ុងរ៉ាត់ ប្រទេសថៃ។ កូនង៉ែតតូចដែលទើបតែកើតនេះមានមុខមាត់ស្អាត និង Cute គួរឱ្យខ្នាញ់បំផុត ចំណែកឯឈ្មោះវិញក៏ពីរោះនិងមានអត្ថន័យពិសេសមិនធម្មតាដែរ។
ថ្វីត្បិតតែម៉ាក់ៗថ្មោងថ្មីរូបនេះ មិនបានបញ្ជាក់ថាកូនរបស់ខ្លួនជាទារកឬទារិកា ប៉ុន្តែមនុស្សជាច្រើនយល់ថាកូនង៉ែតដែលទើបនឹងកើតនេះគឺជាក្មេងប្រុស ដោយសារតែកន្លងមកអ្នកនាងធ្លាប់បានបង្ហោះរូបថតឈុតទារកតូចៗសម្រាប់ត្រៀមឱ្យកូនខ្លួន ហើយលើកឡើងទៀតថា «តើចាំបាច់ត្រូវប្រកាសពីភេទរបស់កូនទៀតឬ?»។ ឈុតទារកដែលអ្នកនាងលើកបង្ហាញនោះមានរូបខ្លាឃ្មុំនៅពីខាងមុខ ដោយភាគច្រើនមានពណ៌ខៀវ (ពណ៌ទឹកសមុទ្រ) ធ្វើឱ្យមតិភាគច្រើនទស្សន៍ទាយថាកូនរបស់តារារូបនេះ និងស្វាមីគឺជាកូនប្រុស ព្រោះបើកូនស្រីភាគច្រើនឪពុកម្ដាយនឹងប្រើពណ៌ផ្កាឈូកជាចម្បង។
កូនតូចដែលទើបនឹងកើតរបស់អ្នកនាង អេដា មានឈ្មោះថា Atlas Netra Tan។ តាមរយៈការស្រាវជ្រាវនៅលើប្រព័ន្ធអ៊ីនធឺណិត atlas មានអត្ថន័យច្រើនបែបច្រើនយ៉ាងណាស់។ Atlas អាចបកប្រែបានថាផែនទី ឬបណ្ដុំផែនទី ខណៈនៅក្នុងសម័យក្រិចបុរាណ Atlas គឺអាទិទេពទ្រពិភពលោក ឬ ទ្រស្ថានសួគ៌នៅលើស្មា។ ទេវកថាក្រិចបានសរសេររៀបរាប់ទៀតថា អាទិទេព Atlas គឺជាកូនកាត់រវាងអាទិទេព និង យក្សក្នុងត្រកូលទីតាន់។ ក្នុងន័យផ្សេងទៀត Atlas ក៏អាចជាព្រះចន្ទ Titan ដំបូងរបស់ភពសៅរ៍ ព្រះច័ន្ទធំជាងគេបង្អស់ ដែលត្រូវបានរកឃើញ ក្នុងចំណោមព្រះច័ន្ទទាំង ៦២ ដែលគោចរជុំវិញភពសៅរ៍នោះ។
តារាចម្រៀងដែលធ្លាប់តែច្រៀងបទ «ពីរនាក់បានហើយ» ប៉ុន្តែពេលនេះមានគ្នាឡើងដល់ទៅ ៣នាក់រូបនេះកំពុងតែញញឹមយ៉ាងមានក្ដីសុខជាមួយនឹងអំណោយដ៏ពិសិដ្ឋគឺកូនតូចដ៏គួរឱ្យស្រលាញ់ ដែលខ្លួននឹងស្វាមីទទួលបានសម្រាប់ដើមឆ្នាំ២០២៣នេះ៕
ប្រភព៖ Addaangelmusic IG