សិល្បៈជាតិ៖ ក្រោយអត់ទ្រាំមិនតបតមកជាយូរ អតីតបេក្ខនារី The Voice Kid Cambodia ចាន់ ស្រីខួចដែលពេលនេះពេញរូបពេញរាងក្រមុំស្ដូក បានចេញមកប្រតិកម្មចំពោះអ្នកតិះដៀលនិងរិះគន់រូបសម្បត្តិរបស់ខ្លួន ព្រមទាំងចេញមុខការពារនិងលើកទឹកចិត្តចំពោះមនុស្សដែលរងសម្ពាធផ្លូវចិត្តព្រោះរូបសម្បត្តិខាងក្រៅផងដែរ។
កាលពីថ្ងៃទី១០ ខែមករា តារាចម្រៀងវ័យក្មេង ចាន់ ស្រីខួច បានបង្ហោះសារឆ្លើយតបចំពោះពាក្យសម្ដីតិះដៀលនិងរិះគន់ដែលខ្លួនបានទទួលកន្លងមកពិសេសគឺរឿងរូបសម្រស់នេះផ្ទាល់តែម្ដង។ តារាចម្រៀងរូបនេះបានលើកឡើងយ៉ាងវែងអន្លាយថា៖ «អឹម កែច្រមុះ ចាក់ថ្គាម ចាក់ថ្នាំឱ្យស បើជ្រុលចឹងមិនព្រមថាខ្ញុំចាប់ជាតិជាថ្មី តាហ្មងទៅ??? កាលនៅខ្មៅដៀលខ្ញុំខ្មៅ មុខចឹង តែងខ្លួនសម្រែចឹង ចង់ធ្វើសុទ្ធតារា ដល់ពេលផ្លាស់ប្ដូរបន្តិច មានលុយធ្វើអីក៏សម បានបញ្ឈប់គំនិតនេះភ្លាម បើមិនចេះស្រលាញ់ខ្លួនឯងដូចដែលខ្ញុំបានស្រលាញ់ខ្លួនខ្ញុំទេ កុំនិយាយបំបាក់អ្នកដទៃ ដើម្បីឱ្យខ្លួនឯងមើលទៅល្អជាងគេ ចូរបង្កើតតម្លៃដោយខ្លួនឯង ហើយសូមបញ្ឈប់រាល់ការតិះដៀលអ្នកដទៃតទៅទៀត។ សូមទោសតែអត់ទ្រាំអត់បានមែន ហើយមួយទៀត រាល់ការផ្លាស់ប្ដូរសុទ្ធតែមានហេតុនិងផល តែខ្ញុំសូមឈរជាមតិ ក៏ដូចជាផ្ដល់ជាកម្លាំងចិត្តដល់អូនៗនិងបងៗស្រីដែល ត្រូវបានគេមើលងាយនូវរូបសម្រស់ខាងក្រៅដូចដែលខ្ញុំធ្លាប់បានឆ្លងកាត់កន្លងមក (ចូរយកពាក្យមើលងាយទាំងអស់នោះ ហើយផ្លាស់ប្ដូរវាមកជាការស្រឡាញ់ខ្លួនឯងអោយខ្លាំងជាងមុន នៅពេលដែលយើងចេះស្រឡាញ់ខ្លួនឯង នោះយើងនឹងចេះស្វែងរកវិធីដើម្បីកែប្រែខ្លួនឯងអោយកាន់តែប្រសើរហើយល្អជាងមុនជាមិនខាន) stay positive speak for urself n love urself។
យុវតីដ៏ក្មេងខ្ចីរូបនេះបានបន្ថែមទៀតថា កញ្ញាមិនមែនប្រឆាំងឬក៏មិនទទួលការរិះគន់ទេ ប៉ុន្តែពេលខ្លះបើកចិត្តឱ្យទូលាយស្ដាប់ម្ខាងទៀតគេបកស្រាយហើយយកទៅពិចារណាខ្លះក៏ល្អ អ្នកទាំងអស់គ្នាមិនមែនកើតមកធំតែម្ដងទេ តែងតែឆ្លងកាត់ការលូតលាស់ នឹង វិវត្តន៍ទៅមុខហើយ តែបើសួរថា កាន់តែធំ កាន់តែចាស់គ្មានភាពរីកចម្រើនអីសោះ ដែលសួរខ្លួនឯងទេថា មានអ្វីថ្មីសម្រាប់ជីវិត ហើយរឺនៅ? ដូចដែលបាននិយាយ post នេះគ្រាន់តែចង់ផ្ដល់ជាកម្លាំងចិត្ត ដល់បងៗអូនៗនារី ដែលកំពុងតែមានសម្ពាធពីការជាន់ឈ្លីនូវរូបរាង ដូចដែលខ្ញុំធ្លាប់បានឆ្លងកាត់ប៉ុណ្ណឹងឯង ចឹងឈប់ស្អប់ខ្លួនឯង ឈប់បន្ទោសខ្លួនឯង យើងម្នាក់ៗសុទ្ធតែមានភាពស្រស់ស្អាតរៀងខ្លួន ចឹងចូរស្រឡាញ់ខ្លួនឯងអោយបានច្រើន។
ការប្រែប្រួលរូបរាងរបស់ស្រីខួច មិនមានអ្វីចម្លែកនោះឡើយ ព្រោះបើរំលឹកកាលពី៥ឆ្នាំមុនសម័យចូលប្រឡង ប្អូនស្រីគ្រាន់តែជាកុមារីវ័យ១២ឆ្នាំមួយប៉ុណ្ណោះ ប៉ុន្តែនៅពេលនេះប្អូនមានវ័យ១៧ឆ្នាំគឺជាបុប្ផាក្រពុំមួយទង រួមផ្សំនឹងការចេះថែទាំសម្អាតខ្លួននិងតុបតែងខ្លួនទៀត រឿងអីមិនប្រែប្រួលនោះ។ ក្រោពីសំបុត្រស្បែកភ្លឺសជាងមុនហើយនោះ ស្រីខួចបានរំលេចឱ្យដឹងដែរថាខ្លួនបានពត់ធ្មេញរយៈពេញ៣ឆ្នាំទើបដោះដែកចេញ ដូច្នេះទម្រង់មុខក៏មានការប្រែប្រួលទៅតាមនោះដែរ។
ពាក្យដ៏មានន័យកើតចេញពីបទពិសោធដែលខ្លួនបានជួបផ្ទាល់នេះត្រូវបានអ្នកលេងបណ្ដាញសង្គមពិសេសអ្នកគាំទ្រប្អូនស្រីបង្ហាញនូវការសាទរនិងយល់ស្របចំពោះអ្វីដែលប្អូនស្រីបានលើកឡើង ជាពិសេសប្អូនស្រីក៏ទទួលបានការសរសើរច្រើនផងដែរថានៅក្មេងពិតតែមានគំនិតចេះគិតគូរបានវែងឆ្ងាយនិងម៉ត់ចត់គួរឱ្យគោរព។
សារអប់រំនិងលើកទឹកចិត្តរបស់ ចាន់ ស្រីខួច ពិតជាមានសារៈសំខាន់ណាស់សម្រាប់មនុស្សដែលកំពុងតែបាក់ទឹកចិត្ត ព្រោះតែរងសម្ពាធផ្លូវចិត្ត និងអស់សង្ឃឹមចំពោះរូបរាងខាងក្រៅរបស់ខ្លួន។ មនុស្សគ្រប់យើងម្នាក់ សុទ្ធតែមានរូបសម្បត្តិស្អាតទាំងអស់ សំខាន់គឺលើការចេះតុបតែងលម្អរខ្លួនបន្ថែមទៀតប៉ុណ្ណោះ។ រឿងតិះដៀល និងមើលងាយលើរូបសម្បត្តិដទៃនេះកំពុងតែជាប្រធានបទក្ដៅមួយដែលអាណាព្យាបាល និងសាលារៀនជាថ្នាលបណ្ដុះទំពាំងស្នងឬស្សីមានការគិតគូរនិងយកចិតុតទុកដាក់ ព្រោះយុវជនទាំងអស់គឺជាសសរទ្រូងដ៏រឹងមាំសម្រាប់ប្រទេសជាពេលខាងមុខ៕