ក្រុម​បាល់ទាត់​ជម្រើសជាតិ​អាហ្សង់ទីន រក​បាន​កៅអី​ឡើង​ទៅ​ជុំ​បន្ត​បាន​មុន​គេ ក្រោយ​បន្ត​ជ័យជម្នះ​ក្នុង​ពានរង្វាន់​បាល់ទាត់​ជើង​ឯក​ប្រចាំ​ទ្វីប​អាមេរិក​ខាង​ត្បូង 2021 Copa Américaបើ​ទោះបី​ជា​វគ្គ​ប្រកួត​ជម្រុះ​តាម​ពូល​នៅ​មិន​ទាន់​បាន​បញ្ចប់​ក៏​ដោយ។

លទ្ធផល​ប្រកួត​ក្នុង​ពូល A នៅ​ព្រឹក​ថ្ងៃ​អង្គារ នេះ​មាន៖
-អ៊ុយរុយហ្គាយ ១-១ ឈីលី
-អាហ្សង់ទីន ១-០ ប៉ារ៉ាហ្គាយ

សម្រាប់​ប្រកួត​បន្ត​ក្នុង​ពូល B នឹង​ធ្វើ​ឡើង​នៅ​ព្រឹក​ថ្ងៃ​ពុធ នេះ​ដោយ៖
-អេក្វាទ័រ Vs ប៉េរ៉ូ ម៉ោង​៤ព្រឹក
-ប្រេស៊ីល Vs កូឡុំប៊ី ម៉ោង​៧ព្រឹក

បើ​តាម​ការ​កំណត់​របស់​គណៈកម្មការ​ប្រកួត​ក្រុម​​លេខ១​ដល់​លេខ​៤​តាម​ពូល​នីមួយៗ​មាន​ឈ្មោះ​ឡើង​ទៅ​ជុំ​បន្ត ខណៈ​បើធៀប​នៅ​ពូល A រវាង​ក្រុម​បាត​តារាង​បូលីវី ​និង​ក្រុម​កំពូល​តារាង​​អាហ្សង់ទីន មាន​គម្លាត​ដល់​ទី​៧​ពិន្ទុ ព្រោះ​ការ​ប្រកួត​នៅ​សល់​២ប្រកួត​ក្នុង​ដៃ​មុន​បិទ​ពូល​ក៏​ដោយ។

ចំណែក​អ្នក​ទាត់​បាល់​បញ្ជូល​ទី​បាន​ច្រើន​ជាង​គេ​នៅ​ឆ្នាំ​នេះ គឺ​រក​បាន​ម្នាក់២គ្រាប់​មាន Neymar របស់​ប្រេស៊ីល Eduardo Vargas របស់​ឈីលី និង​ Ángel Romero របស់​ប៉ារ៉ាហ្គាយ។

ព្រឹត្តិការណ៍​នេះ​​មាន​ក្រុម​ចូលរួម​ចំនួន​១០ក្រុម បែងចែក​ជា​២ពូល ​​នឹង​ចាប់​ផ្ដើម​ពី​ថ្ងៃ​ទី​១៣ ខែ​មិថុនា ដល់​ថ្ងៃ​ទី​១០ ខែ​កក្កដា ឆ្នាំ​២០២១។ ​ពូល A អាហ្សង់ទីន,​ប៉ូឡាវី,​អ៊ុយរុយហ្គាយ,​ប៉ារ៉ាហ្គាយ ចំណែក​ពូល B កូឡុំប៊ី,ប្រេស៊ីល,​វេណេហ្ស៊ុយអេឡា,អេក្វាទ័រ និង​ប៉េរូ។

ពានរង្វាន់ Copa America រៀបចំ​ឡើង​តាំង​ពី​ឆ្នាំ​១៩១៦ ហើយ​ក្រោយ​មក​វិវត្តន៍​រៀបចំ​នៅ​រាល់​៣ឆ្នាំ​ម្តង ដោយ​ប្រទេស​អ៊ុយរ៉ាហ្គាយ ឈ្នះ​ពានរង្វាន់​បាន​ច្រើន​ជាង​គេ គឺ​រហូត​ដល់​១៥លើក ខណៈ​ក្រុម​ប្រេស៊ីល ជា​ម្ចាស់​ជើង​ឯក​ឆ្នាំ​ចាស់​​កាល​ពី​ឆ្នាំ​២០១៩។ ចំណែក​ក្រុម​អាហ្សង់ទីន ធ្លាប់​ឈ្នះ​បាន​១៤លើក ក្រុម​ប៉ារ៉ាហ្គាយ និង​ឈីលី ឈ្នះ​បាន​ម្នាក់​២លើក និង​កូឡុំប៊ី និង​បូលីវី ឈ្នះ​ម្នាក់​១លើក៕

Telegram-Troryorng
Share.