សិល្បៈជាតិ៖ តាមរយៈរូបភាពអង្គុយកាន់ឧបករណ៍ភ្លេងហ្គីតាញញឹមមករកកាមេរ៉ា ស្រាប់តែរាជិនីសំឡេងមាស ម៉េង កែវពេជ្ជតា ភ្ជាប់ជាមួយពាក្យពេចន៍យ៉ាងវែងអន្លាយប្រកាសថា មានអ្នកប៉ុនប៉ងបង្អាក់ដំណើរ និងចង់បិទផ្លូវឱ្យបាត់មុខពីពិភពសិល្បៈ ក៏ដោយសារតែរឿងគុំគួន។
អ្នកនាង ម៉េង កែវពេជ្ជតា បាននិយាយរៀបរាប់នៅលើហ្វេសប៊ុកឱ្យមិនបង្ហាញឈ្មោះបុគ្គលចំៗនោះទេ តែសង្កត់ធ្ងន់ថា «គឺអ្នកបំពានខ្ញុំមុន!!»។ តារាចម្រៀងស្រីចាស់វស្សារូបនេះបានបន្ថែមថា ការពិតអ្នកនាងបានដាក់វាចុះតាំងពីយូរហេីយ ព្រោះស្តាប់ចាស់ទុំ ទេីបអ្នកនាងអហោសិកម្មឱ្យ និងខិតខំបង្កេីតតែស្នាដៃសិល្បៈជាមួយបងប្អូនកូនចៅគ្រួសារដេីម្បីសង្គម ។
អ្នកនាងបន្តថា «ខ្ញុំឃេីញអ្នកស្ងាត់ក៏គិតថាអ្នកដូចខ្ញុំដែរ ប៉ុន្តែមិនអីចឹងទេ គឺអ្នកសំងំរកវិធីកំចាត់ខ្ញុំទៅវិញ ជាក់ស្តែងថ្ងៃនេះបានបង្ហាញ ។ ទង្វេីអ្នក គឺអ្នកមិនចង់ឱ្យខ្ញុំបន្តដំណេីរលេីវិស័យសិល្បៈដោយសម្រួលទេ ។ គំនិតអាក្រក់របស់អ្នក គឺចង់បំបាត់ខ្ញុំឱ្យបាត់មុខពីសិល្បៈ បន្តិចម្តងៗ ។ ខ្ញុំមិនមែនចោទ តែគឺអ្នកខ្លួនឯងតែម្តងដែលបង្ហាញឱ្យពិភពលោកបានឃេីញយ៉ាងច្បាស់ក្រឡែតថាអ្នកគឺអញ្ចឹងមែន ។ អ្នកមិនបានធ្វេីឱ្យវិស័យសិល្បៈខ្មែររីកលូតលាស់ទេព្រោះអ្នកបានបដិសេធអ្នកមានធនធានសិល្បៈចាស់ឬថ្មីក៏ដោយឱ្យតែមិនស្របនឹងអ្នក ។ អ្នកល្មោភមុខមាត់ គ្រវាត់អ្នកចេះដឹងចោលកៀនជញ្ជាំង រារាំងបិទខ្ទប់គុណសម្បត្តិគេ បង្ហាញបង្អួតតែខ្លួនឯង ។ អ្នកចូលចិត្តសង្គ្រាម និងមិនចង់បានសន្តិភាពឡេីយ ។ ក្នុងទ្រូងអ្នកពេញដោយភ្លេីងគំនុំ ការសងសឹក និងភ្លេីងព្យាបាទគ្មានទីបញ្ចប់ ។ ដូច្នេះបេីមានការរេីបំរាស់ណាមួយកេីតឡេីងនោះ សូមអ្នកកុំរំអួយធ្វេីជាតួកំសត់ឱ្យសោះ និងសូមកុំប្រេីទឹកភ្នែកបោកប្រាស់ដេីម្បីឱ្យគេមេីលឃេីញថាអ្នកជនរងគ្រោះទៀត ព្រោះអ្នកទេដែលជាអ្នកចាប់ផ្តេីមវ៉ៃគេមុនរាល់លេីក »។
សំណេរដ៏វែងអន្លាយរបស់អ្នកនាង ម៉េង កែវពេជ្ជតា បានធ្វើឱ្យអ្នកគាំទ្រនិងមជ្ឍដ្ឋានមហាជន ងឿងឆ្ងល់គ្រប់គ្នា និងចង់ដឹងច្បាស់ថា តើអ្នកនាងបានសំដៅទៅលើអ្នកដឹកនាំក្នុងពិភពសិល្បៈគឺបុគ្គលណាឱ្យពិតប្រាកដ។ រហូតដល់ថ្ងៃទី ១២ ខែមករា ឆ្នាំ ២០២៣នេះ អ្នកនាង ម៉េង កែវពេជ្ជតា បានបង្ហោះសារមួយទៀតថា ៖ « ចិត្តចង្អៀតចង្អល់ គំនុំ និន្ទាឈ្នានិស ព្យាបាទ បំបិទឱកាសអ្នកមានជំនាញចំណេះដឹងសិល្បៈពិតប្រាកដ បក្សពួកនិយម រើសអើង.. ទាំងអស់នេះ មិនគួរមានក្នុងខួរក្បាល និងបេះដូងរបស់អ្នកដឹកនាំសិល្បៈទេ ! »។
តែដោយឡែក តាមការសង្កេតគេបានមើលឃើញការបង្ហោះរបស់អ្នកនាង ម៉េង កែវពេជ្ជតា ចេញមកទម្លាយរឿងត្រូវគេបិទផ្លូវក្នុងពិភពសិល្បៈបែបនេះ បន្ទាប់ពីអ្នកនាងមានរឿងអន់ចិត្តចំពោះបទចម្រៀង «ទុក្ខស្រីប្ដីព្រាត់» ដែលវណ្ណកម្មថ្មីទើបតែប្រកាសសម្ពោធជាផ្លូវការមិនគឺមិនមានវត្តមានអ្នកនាងចូលរួម និងផ្ដល់តម្លៃឱ្យក្នុងនាមជាម្ចាស់សំនៀងដើមកាលពី៣០ឆ្នាំមុន។
ពាក់ព័ន្ធជាមួយការករណីរសើបខាងនេះដែរ ត្រយងកំពុងព្យាយាមសុំសម្ភាសន៍កំពូលតារាចម្រៀងស្រី ម៉េង កែវពេជ្ជតា ដើម្បីមកផ្សាយជូនអ្នកគាំទ្របានដឹងបន្ថែមទៀតនាពេលក្រោយ៕
