ក្លិបបាល់ទាត់ព្រះខ័នរាជស្វាយរៀង ក្រោមការដឹកនាំរបស់លោក Conor Nestor បានប្រកាសខ្សែប្រយុទ្ធថ្មី ណារ៉ុង កក្កដា អតីតកីឡាកររបស់ Tiffy Army FC និងក្រុមជម្រើសជាតិអាយុក្រោម២៣ឆ្នាំ។
ណារ៉ុង កក្កដា គឺកីឡាករទី៣ ដែលព្រះខ័នរាជស្វាយរៀងនាំចូល បន្ទាប់ពីខ្សែបម្រើ គួច ដានី ផ្លាស់ពីណាហ្គាវើលដ៍ និងខ្សែការពារស្លាប សេត រ៉ស៊ីប ពីបឹងកេត ដើម្បីត្រៀមប្រកួតប្រជែងពានរង្វាន់នានានៅឆ្នាំ ២០២៣ នេះ។
ក្រៅពីនេះក្លិបបាល់ទាត់ព្រះខ័នរាជស្វាយរៀង ក៏បានប្រកាសចែកផ្លូវជាមួយកីឡាករខ្មែរចំនួនបួនរូបមានដូចជា៖ ឃៀង ម៉េងហួរ រស់ គង់សំរេច ត្រាយ វិចិត្រ និង ឡុង ភារ៉ាត់។
ក៏ដូចជាការចាកចេញរបស់គ្រូជំនួយសញ្ជាតិអេស្ប៉ាញ លោក Oriol Segura បន្ទាប់ពីមានការយល់ព្រមទាំងសងខាង រួមទាំងខ្សែប្រយុទ្ធស្លាប ម៉ុន វ៉ាន់ដា និងអ្នកចាំទី លី សុម៉េត។
ជាពិសេសខ្សែប្រយុទ្ធអេស្ប៉ាញ Victor Blasco និងអ្នកចាំទី អ៊ុំ សេរីរ័ត្ន ក្រោយកិច្ចសន្យាខ្ចីជើងពីក្លិប Tiffy Army FC ចំនួន១រដូវកាលត្រូវបានបញ្ចប់៕