នៅថ្ងៃអាទិត្យ ទី១៥ ខែមករា ឆ្នាំ២០២៣ ក្លិបបាល់ទាត់អង្គរថាយហ្គឺរ ក្រោមការដឹកនាំរបស់លោក Alistair Heath បានប្រកាសនាំចូលខ្សែប្រយុទ្ធអេស្ប៉ាញ Victor Blasco ក្រោយចាកចេញពីព្រះខ័នស្វាយរៀង បន្ទាប់ពីចប់លីគកំពូលកម្ពុជា រដូវកាល ២០២២។
ក្នុងនោះអង្គរថាយហ្គឺរ បានថ្លែងក្នុងសេចក្តីប្រកាសថាកីឡាករ BLASCO នឹងចូលរួមហ្វឹកហាត់ផ្លូវការជាមួយក្លិប ត្រៀមសម្រាប់រដូវកាលថ្មី នៅក្នុងខែមេសា ឆ្នាំ២០២៣ ខាងមុន ខណ:បច្ចុប្បន្នរូបគេកំពុងស្ថិតនៅប្រទេសអេស្ប៉ាញ។
ខ្សែប្រយុទ្ធ Victor Blasco ជាអតីតកីឡាករ Deportivo y Social VIDA ម្ចាស់ជើងឯក ២សម័យលីគកំពូលហុងឌូរ៉ាស មុនចូលរួមជាមួយព្រះខ័នរាជស្វាយរៀង នៅជុំទី២ នៃពានរង្វាន់ Cambodian Premier League 2022។
កីឡាករវ័យ២៧ឆ្នាំរូបនេះ ជាអតីតយុវជនថ្នាលរបស់ក្រុមអ្នកមានបុណ្យ FC Barcelona ដោយរូបនេះមានដើមកំណើតនៅទីក្រុង Barcelona ប្រទេសអេស្ប៉ាញ តួនាទីជាខ្សែប្រយុទ្ធស្លាបឆ្វេង មានកម្ពស់ ១.៧៨ម៉ែត្រ។
គួរដឹងថា Victor គឺជាមិត្តភក្តិដ៏ជិតស្និតរបស់ Marcus Haber អំឡុងពេលដែលគេប្រកបអាជីពបាល់ទាត់នៅក្របខណ្ឌ Canadian Premier League លីគកំពូលកាណាដា Pacific FC និងនៅព្រះខ័នរាជស្វាយរៀង ក្របខណ្ឌ Cambodian Premier League លីគកំពូលកម្ពុជា៕