យោងតាមការចុះផ្សាយរបស់ Main Stand – International សារព័ត៌មានរបស់ប្រទេសថៃ បានឲ្យដឹងថា ប្រយុទ្ធថៃ Teerasil Dangda អាចនឹងអវត្តមាន សម្រាប់ជំនួបវគ្គផ្តាច់ព្រ័ត្រ ជើងទី២ ទល់នឹងវៀតណាម ក្នុងពានរង្វាន់ AFF Mitsubishi Electric Cup 2022 នៅថ្ងៃទី១៦ ខែមករា វេលាម៉ោង ៧:៣០នាទីយប់។
តារាឆ្នើមរបស់ក្រុមជម្រើសជាតិថៃ វ័យ៣៤ឆ្នាំរូបនេះត្រូវបានលោក Alexandré Pölking អនុញ្ញាតឲ្យចូលហ្វឹកហាត់ក្នុងកម្រិតស្រាលដាច់ដោយឡែកពីក្រុម មូលហេតុគឺដោយសារតែ Teerasil Dangda មានបញ្ហារបួសត្រង់សរសៃពួរភ្លៅខាងក្រោយ។
បច្ចុប្បន្ន Teerasil Dangda កំពុងស្ថិតក្នុងបញ្ជី Top Scorers ក្នុងនាមជាកីឡាករស៊ុតបញ្ចូលទីច្រើនជាងគេ ក្នុងព្រឹត្តិការណ៍ AFF Mitsubishi Electric Cup 2022 សរុប៦គ្រាប់ ស្មើគ្នាជាមួយ Nguyễn Tiến Linh ខ្សែប្រយុទ្ធវៀតណាម។
គួរដឹងថាកាលពីជើងទី១ ក្រុមជម្រើសជាតិវៀតណាម បានប្រកួតស្មើ ២-២ ជាមួយថៃ នៅវគ្គផ្តាច់ព្រ័ត្រ AFF Mitsubishi Electric Cup 2022 ក្នុងកីឡដ្ឋាន My Dinh ទីក្រុងហានណូយ ប្រទេសវៀតណាម នារាត្រីថ្ងៃទី១៣ ខែមករា ឆ្នាំ២០២៣។
យប់នេះផងដែរ គឺជាដឹកនាំលើកចុងក្រោយរបស់លោក Park Hang Seo គ្រូបង្វឹកសញ្ជាតិកូរ៉េខាងត្បូង ក្នុងនាមជាអ្នកចាត់ការក្រុមជម្រើសជាតិវៀតណាម ដោយកុងត្រារបស់នឹងផុតកំណត់នៅថ្ងៃទី៣១ ខែមករា ឆ្នាំ២០២៣ ខាងមុននេះ ពោលគឺបន្ទាប់ពីចប់ព្រឹត្តិការណ៍ AFF Mitsubishi Electric Cup 2022។
លោក Park Hang Seo បច្ចុប្បន្នមានវ័យ៦៥ឆ្នាំ លោកបានមកដឹកនាំក្រុមជម្រើសជាតិវៀតណាមដំបូងនៅថ្ងៃទី២៩ ខែកញ្ញា ឆ្នាំ២០១៧ ជាមួយកិច្ចសន្យារយ:ពេល២ឆ្នាំ បន្ទាប់ពីដឹកនាំបានល្អសហព័ន្ធកីឡាបាល់ទាត់វៀតណាម ក៏បន្ថែមកិច្ចសន្យាថ្មីជូនគាត់៣ឆ្នាំជាបន្តទៀត រហូតដល់នៅថ្ងៃទី៣១ ខែមករា ឆ្នាំ២០២៣។
ខណ:កីឡាករ Poramet Arjvirai របស់ក្រុមជម្រើសជាតិថៃ គឺជាកីឡាករដំបូងគេបង្អស់ដែលអាចស៊ុតបញ្ចូលទីអ្នកចាំទី Dang Van Lam របស់ក្រុមជម្រើសជាតិវៀតណាម ក្នុងព្រឹត្តិការណ៍ AFF Mitsubishi Electric Cup 2022។
ក្នុងនោះក្រុមជម្រើសជាតិវៀតណាម ក្រោមការដឹកនាំរបស់លោក Park Hang-seo ជាក្រុមតែមួយគត់ដែលឆ្លងកាត់៦ប្រកួត ដោយគ្មានក្រុមណាស៊ុតចូលទីសម្បី១គ្រាប់ និងស៊ុតចូលគូប្រកួតបាន១៤គ្រាប់។
វគ្គជម្រុះក្នុងពូល៖
ប្រកួតទី១ ឈ្នះឡាវក្នុងលទ្ធផល ៦-០
ប្រកួតទី២ ឈ្នះម៉ាឡេស៊ី ក្នុងលទ្ធផល ៣-០
ប្រកួតទី៣ ស្មើជាមួយសិង្ហបុរី ០-០
ប្រកួតទី៤ ឈ្នះមីយ៉ាន់ម៉ា ក្នុងលទ្ធផល ៣-០
វគ្គពាក់កណ្ដាលផ្ដាច់ព្រ័ត្រ៖
ជើងទី១ ស្មើជាមួយឥណ្ឌូណេស៊ី ០-០
ជើងទី២ ឈ្នះឥណ្ឌូណេស៊ី ក្នុងលទ្ធផល ២-០
***វគ្គផ្តាច់ព្រ័ត្រ៖
ជើងទី១ ស្មើជាមួយថៃ ២-២
របូត២គ្រាប់ស៊ុតដោយកីឡាករ Poramet Arjvirai និង Sarach Yooyen៕