សិល្បៈជាតិ៖ ថ្មីៗនេះតារាកំប្លែងវ័យក្មេងដែលបានវិវត្តន៍ខ្លួនមកជាតារាចម្រៀងប្រចាំផលិតកម្មសាន់ដេ នាយចឺម ត្រូវបានព្រះមហាក្សត្រប្រោសព្រះរាជទានគ្រឿងឥស្សរិយយសមួយគ្រឿងឱ្យដល់តារារូបនេះ ដែលដំណឹងនេះធ្វើឱ្យអ្នកតាមដានជីវិតតារារូបនេះកាន់តែមានជំនឿថាបំណងប្រាថ្នាមានងារជាឧកញ៉ារបស់គេច្បាស់ជាខិតជិតដល់ក្នុងពេលឆាប់ៗនេះ។
យោងតាមព្រះរាជក្រឹត្យដែលចេញកាលពីថ្ងៃទី១២ ខែមករាឆ្នាំ២០២៣ មានគឡាយព្រះហត្ថលេខាដោយព្រះមហាក្សត្រនៃព្រះរាជាណាចក្រកម្ពុជាសម្ដេចព្រះបរមនាថ នរោត្តម សីហមុនី សន្លឹកទីពីរបានបង្ហាញឱ្យឃើញថាឈ្មោះ សុខ មេសា ទទួលបានគ្រឿងឥស្សរិយយសថ្នាក់ធិបឌិន្ទមួយគ្រឿង។ បើត្រឹមតែឈ្មោះនោះសាធារណជននោះមិនអាចសន្និដ្ឋានថាឈ្មោះ សុខ មេសា នេះគឺជាតារាចម្រៀងនាយចឺមនោះឡើយ ព្រោះអ្នកដែលមានឈ្មោះនិងនាមត្រកូលដូចគ្នាក៏មានច្រើនដែរ។ ប៉ុន្តែគេអាចប្រាកដចិត្តថាឈ្មោះ សុខ មេសា ដែលទទួលបានគ្រឿងឥស្សរិយយសគឺនាយចឺម ព្រោះឧកញ៉ា «លី សាមឺឌី» បានបង្ហោះរូបភាពខ្លួននិងនាយចឺមដោយភ្ជាប់ជាមួយនឹងសារថា៖ «អបអរសាទរប្អូន ចឺម ដែលត្រូវបានត្រូវបានព្រះមហាក្សត្រប្រោសប្រទានគ្រឿងឥស្សរិយយស ព្រះរាជាណាចក្រកម្ពុជាថ្នាក់ ធិបឌិន្ទ»។
ក្រៅពីពាក្យជូនពរនិងអបអរសាទររបស់ឧកញ៉ាខាងលើ គណនីឈ្មោះក្រុមតន្ត្រីនាយចឺម ក៏បានចេញមកស៊ែរបន្តផុសរបស់ឧកញ៉ា លី សាមឺឌឺ ដោយភ្ជាប់ឃ្លាអបអរសាទរចំពោះអ្វីដែលតារាចម្រៀងវ័យក្មេងរូបនេះសម្រេចបាននៅដើម ឆ្នាំ២០២៣នេះ។
កន្លងមកឧកញ៉ា សុខ មេសា ហៅនាយចឺម ធ្លាប់ចេញមកនិយាយបែបលេងបន្លំមែនថា លោកកំពុងតែសន្សំលុយដើម្បីត្រៀមខ្លួនឡើងជាឧកញ៉ា ហើយបើពិតជាដូចអ្វីដែលនាយចឺមធ្លាប់បានលើកឡើងមែន ប្រហែលជាមិនយូរមិនឆាប់ទៀតនោះទេ តារាចម្រៀងរូបនេះអាចនឹងដើរតាមដានជើងរៀមច្បង ព្រាប សុវត្ថិ និងខេមរៈ សីរីមន្ត ស្ថិតក្នុងចំណោមសិល្បករចម្រៀងល្បីឈ្មោះមានងារជាឧកញ៉ា៕