សិល្បៈអន្តរជាតិ៖ កញ្ញា R’Bonney Gabriel គឺជាអ្នករចនាម៉ូដហ្វេសសិនសម្លៀកបំពាក់ និងជាតារាម៉ូដែលបានដណ្ដើមមកុដបវរកញ្ញាចក្រវាល ឆ្នាំ២០២២ មកគ្រង។ កញ្ញាគឺជាស្ត្រីទី៣តំណាងឱ្យក្រុងហូស្តុន រដ្ឋតិចសាស់សហរដ្ឋអាមេរិក ដំបូងគេបង្អស់ដែលមានឈាមជ័រ ហ្វីលីពីន-អាមេរិកដែលទទួលបានជ័យលាភី។
សាវតាររបស់ម្ចាស់មកុដ MU ជំនាន់ថ្មី ត្រូវបានបញ្ជាក់ជាផ្លូវការនៅលើគេហទំព័រ Miss Universe ថា កញ្ញាគឺនាយកប្រតិបត្តិក្រុមហ៊ុនសម្លៀកបំពាក់មួយកន្លែង។ កញ្ញាមានវ័យ ២៨ឆ្នាំ បានក្លាយជាម្ចាស់មកុដជំនាន់ទី ៩ តំណាងឱ្យសហរដ្ឋអាមេរិក ។ បន្ទាប់ពីទទួលបានភាពជោគជ័យលើឆាកអន្តរជាតិមួយនេះ បវរកញ្ញាចក្រវាលអាមេរិករូបនេះ ត្រូវបានមហាជន និងហ្វេនៗដែលតែងតែតាមដានកម្មវិធីប្រកួតសម្រស់ យកចិត្តទុកទៅលើសមត្ថភាព សម្រស់ ក៏ដូចជាប្រវត្តិដ៏គួរឱ្យចាប់អារម្មណ៍ទៀតផង។
កញ្ញា R’Bonney Gabriel បានបង្ហាញមោទកភាពជាលើកដំបូង ខណៈដែលបានលើកមុខមាត់ឱ្យស្រីស្អាតក្នុងរដ្ឋហូស្តុនថា កញ្ញាគឺជាស្ត្រីទី ៣ហើយដែលដណ្ដើមមកុដ Miss Universe តំណាងឱ្យស្រីស្អាតក្នុងរដ្ឋហូស្តុន ហើយអារម្មណ៍កញ្ញារំភើបស្ទើហោះអណ្ដែតដល់ឋានព្រះច័ន្ទបាត់ទៅហើយ។ រយៈពេល ១៥ ថ្ងៃនៃការប្រកួតនេះ កញ្ញាទទួលបានបទពិសោធន៍ក្នុងការផ្លាស់ប្ដូរជីវិតជាច្រើន។ កញ្ញាថាបានកាន់តំណែងថ្មីនេះ ក៏ព្រោះតែកម្លាំងឥទ្ធិពលរបស់ស្ត្រីទាំងអស់ ដែលវាពិតជាកិត្តិយសដ៏ធំធេងក្នុងការបំពេញបេសកកម្មឱ្យសកលលោកយ៉ាងមានមោទកភាព។
គួររំលឹកថា នៅពេលចូលក្នុងលំដាប់ Top 5 កញ្ញា R’Bonney Gabriel នាងត្រូវបានគេសួរថា ថ្មីៗនេះកម្មវិធីបវរកញ្ញាចក្រវាល បានធ្វើការផ្លាស់ប្តូរលក្ខន្តិក: ដែលអនុញ្ញាតឱ្យស្រ្តីជាម្តាយ និងស្ត្រីដែលរៀបការហើយ អាចចូលរួមប្រកួតប្រជែងនៅឆ្នាំនេះបាន។ ដូច្នេះ តើការផ្លាស់ប្តូរបន្ថែមទៀតដែលនាងចង់ឃើញគឺជាអ្វី ហើយហេតុអ្វី?។ ពេលនេះ ម្ចាស់មកុដបានតបថា អ្នករៀបចំការប្រកួត នឹងបង្កើនដែនកំណត់អាយុរបស់បេក្ខនារី។ សម្រាប់ខ្ញុំ ខ្ញុំចង់ឃើញការបង្កើនអាយុ ព្រោះខ្ញុំមានអាយុ ២៨ឆ្នាំ ហើយនោះគឺជាអាយុដែលចាស់ជាងគេក្នុងការប្រកួតប្រជែងនេះ។ ខ្ញុំគិតថា វាជារឿងដ៏ស្រស់ស្អាត។ ប្រយោគចំណូលចិត្តខ្ញុំ បើសិនមិនមែនឥឡូវនេះ តើនៅពេលណាទៅ? ដោយសារតែជាមនុស្សស្រីម្នាក់ ខ្ញុំជឿថា អាយុមិនកំណត់យើងឡើយ។ វាមិនមែនជាថ្ងៃស្អែកទេ វាមិនមែនជាថ្ងៃម្សិលមិញទេ ប៉ុន្តែវាជាពេលបច្ចុប្បន្ន។ ពេលវេលាគឺឥឡូវនេះ។
សូមជម្រាបថា កញ្ញា R’Bonney Gabriel គឺជារាជិនីកំពូលសម្រស់ដែលមានដើមកំណើតនៅទីក្រុងហូស្តុន គឺជាតារាបង្ហាញម៉ូដ អ្នករចនាម៉ូដ និងជាគ្រូបង្រៀនផ្នែកដេរ ដែលផ្តល់អាទិភាពដល់បរិស្ថានក្នុងការងាររបស់នាង៕