សិល្បៈជាតិ៖ ដំណឹងទទួលបានគ្រឿងឥស្សរិយយសថ្នាក់ធិបឌិន្ទរបស់នាយចឺម នាខណៈកំពុងតែក្លាយជាប្រធានបទក្ដៅដែលត្រូវបានអ្នកលេងបណ្ដាញសង្គមយកមកជជែកវែញញែកគ្នាយ៉ាងឆ្ងាញ់មាត់ ក្នុងនោះគេឃើញមានមន្ត្រីយោធាម្នាក់សម្ដែងអារម្មណ៍ហួសចិត្ត ដែលនាយចឺមច្រៀងយកលុយដាក់ហោប៉ៅ បានគ្រឿងឥស្សរិយយសថ្នាក់ខ្ពស់ ខណៈដែលខ្លួនដេកតែក្នុងព្រៃការពារព្រំដែនរាប់ឆ្នាំ បែរជាមិនទាន់ទទួលបានមេដាយឬបណ្ណសរសើរនៅឡើយ។
កាលពីពេលថ្មីៗនេះ ព្រះមហាក្សត្រនៃព្រះរាជាណាចក្រកម្ពុជាបានឡាយព្រះហត្ថលេខានៅលើព្រះរាជក្រឹត្យមួយដោយផ្ដល់គ្រឿងឥស្សរិយយសចំនួន៦ប្រភេទផ្សេងៗគ្នាដល់មនុស្សចំនួន៧០នាក់ ដោយក្នុងនោះមានអតីតអ្នកកំប្លែងនាយចឺមមួយរូបផងដែរ។
អានអត្ថបទ៖ សង្ស័យបំណងប្រាថ្នាមានងារឧកញ៉ារបស់នាយចឺម កាន់តែខិតជិតដល់ឆាប់ៗហើយមើលទៅ ក្រោយពី…
មិត្តភក្ដិ និង មនុស្សជិតស្និទ្ធបានចេញមកសារអបអរសាទរតារាចម្រៀងរូបនេះនៅលើបណ្ដាញសង្គមហ្វេសប៊ុកព្រោងព្រាតក្រោយដំណឹងនេះត្រូវបានប្រកាសផ្សព្វផ្សាយ។ ក្នុងចំណោមអ្នកដែលចូលរួមអបអរសាទរនោះក៏មានមនុស្សមួយក្រុមដែលទំនងជាមិនពេញចិត្តចំពោះដំណឹងនេះនោះឡើយ។ តួយ៉ាងដូចជាមន្ត្រីយោធាម្នាក់លោកបានថ្លែងពីចំណាប់អារម្មណ៍ផ្ទាល់ខ្លួនក្រោយដឹងដំណឹងថានាយចឺមទទួលបានគ្រឿងឥស្សរិយយសថ្នាក់ធិបឌិន្ទថាយ៉ាងដូច្នេះថា៖ «ខ្ញុំបោះតង់ដេកក្នុងព្រៃរាប់ឆ្នាំដើម្បីបម្រើជាតិ ការពារព្រំដែនមិនទាន់បានមេដាយឬបណ្ណសរសើរមួយផង អាប្អូននេះដើរតែច្រៀងយកលុយដាក់ហោប៉ៅខ្លួនសោះ បានគ្រឿងឥស្សរិយយសខ្ពស់ដល់ថ្នាក់ហ្នឹង បងសុំសរសើរហើយ»
មិនត្រឹមតែមន្ត្រីយោធារូបនេះនោះឡើយដែលមិនអបអរសាទរចំពោះអ្វីដែលនាយចឺមទទួលបាន ប៉ុន្តែគេឃើញមានមតិមិនគាំទ្រជាច្រើនទៀតដែលរិះគន់ចំពោះនាយចឺមដែលមិនធ្លាប់បានបញ្ចេញស្នាដៃបម្រើជាតិ តែគ្រាន់តែជាតារាចម្រៀងម្នាក់ប៉ុណ្ណោះបែរជាទទួលបានកិត្តិយសខ្ពង់ខ្ពស់ដល់ម្លឹង។
ដំណឹងដែលនាយចឺមទទួលបានគ្រឿងឥស្សរិយយសថ្នាក់ធិបឌិន្ទ ធ្វើឱ្យផ្ទុះប្រតិកម្មមិនពេញចិត្តពីសាធារណជន ខណៈដែលសាមីខ្លួនកន្លងមកធ្លាប់ព្រលយពាក្យលេងបន្លំមែនថាខ្លួនកំពុងសន្សំលុយដើម្បីបានទទួលងារជាឧកញ៉ា។បច្ចុប្បន្នតារាចម្រៀងជាច្រើនដួងហើយបានវិវត្តន៍ខ្លួនពីតារាចម្រៀងទៅជាឧកញ៉ា និងអ្នកជំនួញអចលនទ្រព្យដូចជាឧកញ៉ា ព្រាប សុវត្ថិ និង ឧកញ៉ា ខេមរៈ សិរីមន្ត ជាដើម៕