សិល្បៈអន្តរជាតិ៖ អ្នកស្នេហាវិស័យប្រកួតសម្រស់បវរកញ្ញាពិភពលោក ពិតជាភ្ញាក់ផ្អើលខ្លាំងមែនទែន នៅពេលបានឃើញកញ្ញា Harnaaz Sandhu ដែលអតីតម្ចាស់មកុដ Miss Universe ប្រចាំឆ្នាំ ២០២១ មកពីប្រទេសឥណ្ឌា មានសភាពរូបរាងប្រែប្រួលលើសគីឡូខ្លាំងជាងមុនដល់ម្លឹង។
ខុសពីបវរកញ្ញាជាម្ចាស់មកុដ Miss Universe ឆ្នាំមុនៗ កញ្ញា Harnaaz Sandhu បានប្រែប្រួលរូបរាងស្អាតពីតូចច្រលឹងបែជាបែកសាច់លើសទម្ងន់ រហូតធ្វើឱ្យអ្នកគាំទ្រព្រួយបារម្ភពីកញ្ញា។ អតីតម្ចាស់មកុដបវរកញ្ញាចក្រវាលឆ្នាំ ២០២១នេះ ត្រូវរងសម្ពាធផ្លូវចិត្ត និងមានជំងឺអាក្រក់ Celiac ដែលតម្រូវឱ្យនាងប្រើប្រាស់ថ្នាំព្យាបាលជាប្រចាំ ជាហេតុនាំឱ្យនាងឡើងសាច់ទ្រលុកទ្រលន់។
កញ្ញា Harnaaz Sandhu កើតមានអាការៈប្រតិកម្មជាមួយការញ៉ាំសារធាតុ Gluten ដែលជាប្រូតេអ៊ីនដែលមាននៅក្នុងស្រូវសាលី Barley និង Rye។ បវរកញ្ញាចក្រវាលសញ្ជាតិឥណ្ឌារូបនេះ បាននិយាយថា រូបនាង បានឡើងគីឡូយ៉ាងខ្លាំង ចាប់តាំងពីគ្រងមកុដកាលពីខែធ្នូ ឆ្នាំ ២០២១ មក ហើយការប្រែប្រួលរូបរាងរបស់នាងនេះហើយ បានធ្វើឱ្យមហាជននាំគ្នារិះគន់មកលើរូបនាង និងថែមទាំងចាត់ទុកនាងជាមនុស្សមិនមានទំនួលខុសត្រូវលើតំណែងរបស់ខ្លួនទៀត។
អ្នកជំនាញសុខភាពនិយាយថា ជំងឺ Celiac បានប្រឆាំងនិងបំផ្លាញប្រព័ន្ធភាពស៊ាំ ហើយវិវត្តទៅរកជំងឺទឹកនោមផ្អែម ខូចតម្រង់នោម និងជំងឺបេះដូង។ ស្ថានភាពកញ្ញា Harnaaz Sandhu នៅពេលនេះ មិនត្រូវបានព្រួយបារម្ភពីអ្នកគាំទ្រទេ តែបែជារងការរិះគន់ពីមជ្ឍដ្ឋានមហាជន រួមទាំងម្ចាស់ប្រេនមួយចំនួនដែលបានកំចាយការងារដើរម៉ូដរបស់នាង ដោយសំអាងថា រូបរាងមិនស័ក្ដសមនឹងប្រេនរបស់ពួកគេ។
ថ្មីត្បិតតែម្ចាស់មកុដបវរកញ្ញាចក្រវាល ២០២១ ឡើងផ្ទេរមកុដឱ្យម្ចាស់ថ្មីទាំងរូបរាងលើសគីឡូក៏ដោយ តែនាងហាក់មិនខ្វល់ពីមជ្ឍដ្ឋានមួយចំនួនដែលទាក់ទងនឹងការរិះគន់ មាក់ងាយតាមបណ្ដាញសង្គមឡើយ។ ព្រោះបវរកញ្ញាចក្រវាលរូបនេះ ក៏បានលើកឡើងដែរថា រូបនាងក៏ជាជនរងគ្រោះម្នាក់នៃបញ្ហាជំងឺមួយនេះដែរ។ កញ្ញា Harnaaz Sandhu នៅតែប្រកាន់ចិត្តគិតវិជ្ជមាន និងមានភាពក្លាហានប្រឈមគ្រប់បញ្ហាគ្រប់កាលៈទេសៈទាំងអស់៕
