សិល្បៈជាតិ៖ រឿងភាគបុរាណបែបប្រវត្តិសាស្ត្រ «អប្សរាមហានគរ» ដែលជាស្នាដៃផលិតដោយអ្នកដឹកនាំ និងនិពន្ធដ៏ល្បីល្បាញ លោក ហ្វៃ សំអាង គឺជាវណ្ណកម្មភាពយន្តដ៏ធំដែលប្រមូលដួងតារាទូទាំងប្រទេសកម្ពុជា និង ត្រៀមបញ្ចាំងនៅលើកញ្ចក់ទូរទស្សន៍ហង្សមាស។ ជាថ្មីម្ដងទៀតលោក ហ្វៃ សំអាងបានបញ្ចេញតួអង្គសំខាន់ចំនួន២ដួងទៀត គឺអ្នកនាង សារ៉ាយ សក្ខិណា និងអ្នកនាង កែវ ឡាវីញ ដែលត្រូវសម្ដែងជាតួអង្គម្ដាយកូននិងគ្នានៅក្នុងសាច់រឿង។ យ៉ាងណាមិញអ្វីដែលធ្វើឱ្យអ្នកគ្រប់គ្នាមានការភ្ញាក់ផ្អើលនោះ លោក ហ្វៃ សំអាង បានរៀបរាប់ថាកូនស្រីអ្នកស្រី កែវ កល្យាណ នឹងសម្ដែងជាតួអង្គ អម្ពរមាស-អម្ពរពេជ្រ តួអង្គកូនភ្លោះដែលមានចរិតលក្ខណៈខុសគ្នាដាច់ស្រឡះ។ តើមានមូលហេតុអ្វីទើបធ្វើឱ្យកញ្ញា សេង រដ្ឋា របូតតំណែងតួអង្គកូនភ្លោះនេះហើយធ្លាក់ទៅលើដៃអ្នកនាង កែវ ឡាវីញ ទៅវិញ?
គេនៅចាំបានថាលោក ហ្វៃ សំអាង បានប្រគល់សេចក្ដីទុកចិត្តនិងប្រកាសតួអង្គដំបូងៗដែលមានវត្តមាននៅក្នុងសាច់រឿងរបស់លោកគឺប្រជុំទៅដោយស្រីស្អាតដូចជាកញ្ញា ពេជ្រ វត្តីសារ៉ាវឌ្ឍី កញ្ញាប៉ូគីមថេង សុតធីតា កញ្ញាសេង រដ្ឋា និងកញ្ញា រឿន ណាត ជាដើម។ បើយោងតាមការបង្ហោះរបស់លោក ហ្វៃ សំអាង នៅលើហ្វេសប៊ុកកាលពីថ្ងៃទី១០ ខែធ្នូ ឆ្នាំ២០២២ កន្លងមក លោកបានរៀបរាប់ថា៖ «អបអរសាទរ Miss Grand Cambodia 2020 កញ្ញា សេង រដ្ឋា ត្រូវបានជ្រើសរើសសម្តែងនៅក្នុងខ្សែភាពយន្តភាគខ្នាតធំរឿង អប្សរាមហាអង្គរ របស់ផលិតកម្មហង្សមាស ។ កញ្ញាត្រូវសម្តែងជាតួអង្គពីរដែលមានព្រះរាជចរិយាខុសគ្នាដូចមេឃហេីយនិងដី ជារាជបុត្រីដែលមានព្រះនាមថា ព្រះធីតា វរនន្ទ អម្ពរពេជ្រ ព្រះធីតា វរនន្ទ អម្ពរមាស បេីនិយាយពីព្រះរូបឆោមវិញដូចជាស្រីទេពអប្សរច្បុតមកពីឋានសួគ៍ ប្រិយមិត្តអ្នកគាំទ្រកញ្ញានឹងបានឃេីញទេពកោសល្យដ៏ថ្មីសន្លាងរបស់កញ្ញា ទ្រង់ព្រះនច្ចារបាំអប្សរានៅក្នុងខ្សែភាពយន្តភាគខ្នាតធំនេះតាមរយៈអ្នកដឹកនាំសម្ដែងនិងក្រុមការងារដែលផ្តល់ទំនុកចិត្ត នៅលេីកញ្ចក់ទូរទស្សន៍ និងប្រព័ន្ធផ្សព្វផ្សាយរបស់ ផលិតកម្មហង្សមាសនិងរស្មីហង្សមាស សូមគោរពអរគុណចំពោះការគាំទ្រនិងចូលរួមផ្ដល់មតិយោបល់»។
បើងាកមកមើលការចាប់អារម្មណ៍ពីអ្នកគាំទ្របានបង្ហាញមតិគាំទ្រច្រើនចំពោះការសម្រេចចិត្តយកអ្នកនាង កែវ ឡាវីញ មកដើរតួជាកូនស្រីអ្នកនាង សារ៉ាយ សក្ខិណា ព្រោះតារាទាំងពីរដួងមានទម្រង់មុខស្រដៀងគ្នាធ្វើឱ្យអ្នកទស្សនាស្រួលនឹងជឿថាគឺជាម្ដាយកូននឹងគ្នាពិតៗ។ ក៏ប៉ុន្តែក៏នៅមានអ្នកខ្លះដែលនៅចាំបានថាតួអង្គ អម្ពរមាស និងអម្ពរពេជ្រ ពីដំបូងឡើយលោក ហ្វៃ សំអាង បានប្រគល់ឱ្យកញ្ញា សេង រដ្ឋា សម្ដែងនោះក៏បានសាកសួរលោកចំពោះករណីនេះ ដោយលោកហ្វៃ សំអាងគ្រាន់តែឆ្លើយតបយ៉ាងខ្លីថា៖ «យើងមានការផ្លាស់ប្ដូរ»។
អ្នកគាំទ្រភាគច្រើនបានកោតសរសើរចំពោះអ្នកដឹកនាំជើងចាស់រូបនេះដែលពូកែ ជ្រើសរើសតួសម្ដែងជាពិសេសតាមរយៈរៀបរាប់ខ្លីៗពីចរិតតួអង្គនីមួយៗនៅក្នុងសាច់រឿង ធ្វើឱ្យអ្នកទស្សនាកាន់តែអន្ទះសារចង់ទស្សនារឿងភាគដ៏ល្បីល្បាញនេះ។ ប៉ុន្តែក៏នៅមានអ្នកចង់ដឹងដូចគ្នាដែរ ពេលនេះតួអង្គដែលកញ្ញា សេង រដ្ឋា ធ្លាក់ទៅលើដៃអ្នកនាង កែវ ឡាវីញ ហើយ ចុះកញ្ញា សេង រដ្ឋា នឹងសម្ដែងជាអង្គអ្វី? ឬក៏កញ្ញា សេង រដ្ឋា មិនបានសម្ដែងនៅក្នុងរឿងនេះទេ?
គួរដឹងដែរថាអ្នកនាង កែវ ឡាវីញ និងគូស្នេហ៍ទើបតែដឹកដៃគ្នាចូលរោងការកាលពីថ្ងៃទី១៥ ខែធ្នូ ឆ្នាំ២០២២ កន្លងទៅ ដូច្នេះនេះអាចចាត់ទុកថាជាឱកាសការងារសម្ដែងដ៏ធំមួយសម្រាប់អ្នកនាងក្រោយរៀបអាពាហ៍ពិពាហ៍៕