សិល្បៈជាតិ៖ ក្រោយពីបញ្ចប់ការប្រកួតបវរកញ្ញាចក្រវាលពិភពលោកលើកទី ៧១ នៅសហរដ្ឋអាមេរិក ទើបដល់ថ្ងៃទី ១៦ ខែមករា ឆ្នាំ ២០២៣នេះ កញ្ញា ហង្ស ម៉ានីតា បេក្ខភាពបវរកញ្ញាតំណាងឱ្យប្រទេសកម្ពុជា បានបង្ហោះសារបង្ហើបពីអារម្មណ៍នៃការខិតខំប្រឹងប្រែងរបស់ខ្លួន ឱ្យអ្នកគាំទ្របានដឹងពីជម្រៅចិត្តរបស់នាង។
ម៉ានីតា បានបង្ហោះសារនៅលើហ្វេសប៊ុកផេកផ្លូវការជាភាសារអង់គ្លេស ដែលមាអត្ថន័យទាំងស្រុងថា ៖ « កម្ពុជា ប្រទេសដែលខ្ញុំចាប់ផ្តើម..វាពិបាកសម្រាប់ខ្ញុំក្នុងការបង្ហាញពីអារម្មណ៍របស់ខ្ញុំនៅពេលនេះ ដែលការប្រកួតបានបញ្ចប់។ ខ្ញុំមិនអាចមានអារម្មណ៍ថាអរគុណដល់មនុស្សគ្រប់គ្នានៅទីនោះដែលបានគាំទ្រ លើកទឹកចិត្ត និងស្រលាញ់ខ្ញុំពេញមួយការធ្វើដំណើរនេះតាំងពីដើមដល់ចប់។ អ្នកបានជ្រើសរើសខ្ញុំជាអ្នកតំណាងនៃប្រទេសដ៏ស្រស់ស្អាតរបស់យើង ដែលខ្ញុំបានទទួលយកតួនាទី និងកិត្តិយសដ៏ខ្ពង់ខ្ពស់នេះ។ ខ្ញុំបានប្រឹងប្រែងអស់ពីសមត្ថភាពក្នុងគ្រប់សកម្មភាពដែលខ្ញុំបានធ្វើ ដើម្បីតំណាងឱ្យប្រទេសរបស់យើងអស់ពីសមត្ថភាព។ ខ្ញុំបានធ្វើអ្វីៗគ្រប់យ៉ាងក្នុងការគ្រប់គ្រង និងទំនួលខុសត្រូវរបស់ខ្ញុំ ដើម្បីបំពេញតួនាទី និងប្រទេសរបស់ខ្ញុំ»។
បវរកញ្ញាចក្រវាលកម្ពុជាឆ្នាំ ២០២២រូបនេះបានបន្តថា «ការឈរនៅលើឆាកនោះ ហើយកាន់ទង់ជាតិកម្ពុជា គឺជាឱកាសមួយក្នុងមួយជីវិត ដែលខ្ញុំមិនអាចឈប់ដឹងគុណ និងកិត្តិយសឡើយ។ ដំណើរនេះឈានដល់ទីបញ្ចប់ ខ្ញុំសូមថ្លែងការសុំទោសយ៉ាងស្មោះចំពោះអ្នករាល់គ្នា ដែលខ្ញុំអាចនឹងខកចិត្ត។ ប៉ុន្តែដោយការលើកឡើងនេះ ខ្ញុំក៏ចង់បញ្ជាក់ថា នេះមិនមែនជាទីបញ្ចប់ទេ។ ជំពូកខ្លះអាចនឹងបិទ ប៉ុន្តែជំពូកខ្លះទៀតហៀបនឹងត្រូវបានបង្ហាញ ហើយខ្ញុំមិនអាចរង់ចាំមើលថាតើសាកលលោករបស់យើងនឹងផ្តល់ជូនខ្ញុំនូវរឿងអ្វីនោះទេ។ សម្រាប់ប្រទេសយើង ទោះខ្ញុំជឿថាកម្ពុជាអាចធ្វើបានបែបណា ហើយកម្ពុជានឹងធ្វើវា សូមឲ្យពេលវេលាបង្ហាញពិភពលោកនូវអ្វីដែលយើងមានសមត្ថភាព។ ជូនចំពោះក្រុមគ្រួសារ បងប្អូន មិត្តភ័ក្តិ ក្រុមអ្នកគាំទ្រ ខ្ញុំសូមថ្លែងអំណរគុណយ៉ាងជ្រាលជ្រៅចំពោះអ្វីៗគ្រប់យ៉ាង»។
ថ្វីត្បិតតែថា កញ្ញាហង្ស ម៉ានីតា គ្មានឱកាសដណ្ដើមបាន Top ណាមួយពីកម្មវិធីប្រកួតសម្រស់ចក្រវាល MU ក៏ពិតមែន ប៉ុន្ដែគ្មានការស្តីបន្ទោស ឬដាក់បន្ទុកកំហុសលើកញ្ញាឡើយ បានន័យថា កញ្ញាបានឈ្នះក្នុងដួងចិត្តប្រជាជនកម្ពុជារួចស្រេចទៅហើយ ព្រោះអ្នកគាំទ្រទាំងអស់បានមើលឃើញពីការខិតខំប្រឹងប្រែងពិតរបស់នាង ដើម្បីលើកស្ទួយមុខមាត់ប្រទេសជាតិផងដែរ៕
