ក្លិបបាល់ទាត់ព្រះខ័នរាជស្វាយរៀង បានប្រកាសអំពីការបន្តកិច្ចសន្យាថ្មីជូនខ្សែប្រយុទ្ធ Marcus Haber និង ខ្សែការពារកណ្តាល Takashi Odawara ចំនួន១ឆ្នាំបន្ថែមទៀត គឺសម្រាប់រដូវកាល ២០២៣-២០២៤ នេះ។
Marcus Haber ខ្សែប្រយុទ្ធជនជាតិកាណាដា គឺជាកីឡាករសំខាន់របស់លោក Conor Nestor នៅលីគកំពូលកម្ពុជា កាលពីរដូវកាល ២០២២ បន្ទាប់ពីស៊ុតបញ្ចូលទីសរុបចំនួន២៥គ្រាប់ ក្នុងចំណោមការបង្ហាញខ្លួន២៧ប្រកួត ព្រមទាំងក្រសោបបានពានរង្វាន់ធំៗចំនួន៣ម្នាក់ឯង ក្នុងកម្មវិធី CPL FOOTBALL AWARD 2022។
ពានរង្វាន់៣របស់ Haber មានដូចជា៖
ពានរង្វាន់ទី១៖ ពានស្បែកជើងមាស បន្ទាប់ពីស៊ុតបញ្ចូលទីសរុបចំនួន២៥គ្រាប់ក្នុងចំណោម២៧ប្រកួត
ពានរង្វាន់ទី២៖ កីឡាករល្អទាំង១១នាក់ប្រចាំរដូវកាល
ពានរង្វាន់ទី៣៖ កីឡាករឆ្នើមជាងគេប្រចាំរដូវកាល។
ដោយឡែកខ្សែការពារ Takashi Odawara ខ្សែការពារជនជាតិជប៉ុន ធ្លាប់ប្រកបអាជីពទាំងនៅលីគកំពូលប្រទេសហ្វីលីពីន និងម៉ាល់ឌីវ ចូលរួមជាមួយព្រះខ័នរាជស្វាយរៀង កាលពីរដូវកាលមុន ដោយបង្ហាញខ្លួន ២៣លើក និងស៊ុតទាត់បញ្ចូលទីបាន ១គ្រាប់។ខណ:រូបគេក៏រួមចំណែកការពារសំណាញ់ទីមិនឲ្យរបូតច្រើនប្រកួតដូចគ្នាផងដែរ ក្នុងនាមជាខ្សែការពារកណ្តាល។
ក្នុងនោះក្លិបបាល់ទាត់ព្រះខ័នរាជស្វាយរៀង ក៏បាននាំចូលកីឡាករចំនួន៤រូប គឺអ្នកចាំទី វីរៈ ដារ៉ា ពីវិសាខា, ខ្សែប្រយុទ្ធ ណារ៉ុង កក្កដា ពី Tiffy Army, ខ្សែបម្រើ គួច ដានី ផ្លាស់ពីណាហ្គាវើលដ៍ និង ខ្សែការពារស្លាប សេត រ៉ស៊ីប ពីបឹងកេត ដើម្បីត្រៀមប្រកួតប្រជែងពានរង្វាន់នានានៅឆ្នាំ ២០២៣ នេះ។
ក្រៅពីនេះក្លិបបាល់ទាត់ព្រះខ័នរាជស្វាយរៀង ក៏បានប្រកាសចែកផ្លូវជាមួយកីឡាករខ្មែរចំនួនបួនរូបមានដូចជា៖ ឃៀង ម៉េងហួរ រស់ គង់សំរេច ត្រាយ វិចិត្រ និង ឡុង ភារ៉ាត់។
ក៏ដូចជាការចាកចេញរបស់គ្រូជំនួយសញ្ជាតិអេស្ប៉ាញ លោក Oriol Segura បន្ទាប់ពីមានការយល់ព្រមទាំងសងខាង រួមទាំងខ្សែប្រយុទ្ធស្លាប ម៉ុន វ៉ាន់ដា និងអ្នកចាំទី លី សុម៉េត។
ជាពិសេសខ្សែប្រយុទ្ធអេស្ប៉ាញ Victor Blasco និងអ្នកចាំទី អ៊ុំ សេរីរ័ត្ន ក្រោយកិច្ចសន្យាខ្ចីជើងពីក្លិប Tiffy Army FC ចំនួន១រដូវកាលត្រូវបានបញ្ចប់៕