សិល្បៈអន្តរជាតិ៖ តារាសម្ដែងទើបនឹងរះចិញ្ចែងចិញ្ចាំងក្នុងពិភពសិល្បៈវ័យ២៧ឆ្នាំ ប៉ុន្តែជាអកុសលទាំងមនុស្សនិងឆ្កែស្រាប់តែស្លាប់ជាមួយគ្នានៅក្នុងផ្ទះ ធ្វើឱ្យអ្នកគាំទ្រសោកសង្រេងនិងស្ដាយស្រណោះជាពន់ពេក។
មូលហេតុដែលបណ្ដាលឱ្យតារារូបនេះនិងឆ្កែស្លាប់គឺបណ្ដាលមកពីសារធាតុពុល Carbon monoxide នៅតំបន់ Lockport ខណៈមនុស្សម្នាក់ទៀតត្រូវបានគ្រូពេទ្យដឹកយកទៅព្យាបាលនៅមន្ទីរពេទ្យ St.Mary ដើម្បីសង្គ្រោះបាន។
ប៉ូលិសបានប្រាប់សារព័ត៌មានថាបានទទួលការហៅចូលរាយការណ៍ថាមានមនុស្ស២នាក់ និងឆ្កែ១ក្បាលបានសន្លប់ស្ដូកនៅក្នុងផ្ទះ នៅពេលដែលប៉ូលិសទៅដល់គេរកឃើញថាមានមនុស្ស២នាក់ស្រូបសារធាតុ Carbon Monoxide ច្រើនពេក។ ប៉ូលិសបានឱ្យដឹងទៀតថាតារាសម្ដែងនិងឆ្កែរបស់គេត្រូវបានរកឃើញថាបានស្លាប់នៅក្នុងផ្ទះ។ ខណៈមនុស្សម្នាក់ទៀតត្រូវបានបញ្ជូនទៅមន្ទីរពេទ្យដើម្បីជួយសង្គ្រោះ ប៉ុន្តែឈ្មោះ និងអត្តសញ្ញាណរបស់ជនរងគ្រោះមិនត្រូវបានទម្លាយនោះព្រោះគ្រួសារកំពុងចាត់ចែង។
សមត្ថកិច្ចបានឱ្យដឹងថាក្រុមស៊ើបអង្កេតបានទម្លាយមូលហេតុនៃការស្លាប់នេះថាអាចមកពីកម្រាស់ព្រិលធ្លាក់ខ្លាំងគ្របដណ្ដប់ឧបករណ៍ឡដុតកម្ដៅទើបធ្វើឱ្យបញ្ចេញឧស្ម័នកាបូនឌីអុកស៊ីតចូលទៅក្នុងផ្ទះ។ សមត្ថកិច្ចផ្នែកសង្គ្រោះបន្ទាប់បានក្រើនរំលឹកដល់ប្រជាពលរដ្ឋឱ្យឧស្សាហ៍ពិនិត្យឧបករណ៍ប្រើប្រាស់ដែលមានភ្ជាប់ទៅខាងក្រៅ រួចឧស្សាហ៍សំអាតព្រិលដែលអាចគ្របបិទជិតត្រង់កន្លែងណាមួយដែលអាចបង្កឱ្យកើតមានគ្រោះថ្នាក់ឬហានិភ័យចំពោះម្ចាស់ផ្ទះនិងអ្នករស់នៅ។
យោងតាមមជ្ឈមណ្ឌលគ្រប់គ្រងនិងការពារជំងឺបានឱ្យដឹងថាអាការៈដែលបង្កឡើងពីផ្សែងពុលកាបូនឌីអុកស៊ីតគឺបណ្ដាលឱ្យឈឺក្បាល វិលមុខ ខ្សោយ ឈឺពោះ ក្អួត ឈឺទ្រូង និងព្រិលភ្នែក ដោយឡែកអាការៈអ្នកពុលឧស្ម័ននេះគឺស្រដៀងគ្នានឹងមនុស្សកើតជំងឺផ្ដាសសាយ។ អ្នកគេងលក់ និងមនុស្សដែលផឹកគ្រឿងស្រវឹង អាចស្លាប់ដោយសារឧស្ម័ននេះមិនមានចេញអាការៈ។
យ៉ាងណាមិញអត្តសញ្ញាណរបស់តារារូបនេះនិងឆ្កែរបស់គេមិនត្រូវបានទម្លាយចេញមកខាងក្រៅនោះឡើយ ដោយសារក្រុមគ្រួសារសុំឱ្យរក្សាការសម្ងាត់ឯកជន។ ថ្វីត្បិតអត្តសញ្ញាណត្រូវបានលាក់ប៉ុន្តែនៅពេលដំណឹងស្លាប់របស់តារារូបខាងលើនិងឆ្កែត្រូវបានផ្សព្វផ្សាយ សាធារណជនបានចូលរួមសោកស្ដាយនិងរំលែកទុក្ខក្រុមគ្រួសារសព។
ងាកមកអត្តសញ្ញារបស់តារារូបនោះទោះជាមានការលាក់បាំងយ៉ាងជិតក្ដី ក៏នៅមានអ្នកខ្លះចេញមកបញ្ជាក់ថាជាតារាវ័យក្មេងដែលសម្ដែងភាពយន្តបែប Web Movie ខណៈដែលមិត្តភក្ដិរបស់សពបានឱ្យដឹងថាអ្នកស្លាប់គឺជាតារាសម្ដែងកូនកាត់កូរ៉េ អាមេិក ហើយថ្មីៗនេះដែរ គេក៏បានចូលរួមសម្ដែងរឿងជាច្រើនទៀតនៅលើអនឡាញនិង Netflix ផងដែរ។
ប្រភព៖ LOVEKPOP95
