ទោះបីជាពេលនេះលោកអ្នកនៅមិនទាន់ជោគជ័យមានលុយហូរហៀរដូចគេ តែបើលោកអ្នករៀបចំហុងស៊ុយផ្ទះតាមរបៀបនេះអាចនឹងជួយលោកអ្នកបាន។ តាមតម្រាហុងស៊ុយចិនបានចារទុកថាផ្ទះដែលមានហុងស៊ុយល្អចាំបាច់ត្រូវមានវត្ថុ ៤យ៉ាងនេះ។
អ្នកណាៗក៏ចង់បានផ្ទះដែលរស់នៅមានក្ដីសុខ ចម្រុងចម្រើនដូច្នេះរឿងហុងស៊ុយផ្ទះចាត់ទុកថាជារឿងសំខាន់មួយដែលលោកអ្នកមិនគួរមើលរំលងជាដាច់ខាត។ តោះបើកទ្វាររៀបហុងស៊ុយ ហៅទ្រព្យនិងសិរីមង្គលចូលក្នុងផ្ទះ ដើម្បីឱ្យអ្នករស់នៅមានជីវិតដែលស្រស់បំព្រងមានហូបចុកគ្រប់គ្រាន់មិនខ្វះខាត។
១. កណ្ដឹង៖
ចាប់តាំងពីសម័យបុរាណមក ជនជាតិអាស៊ីមានជំនឿលើសំឡេងរបស់កណ្ដឹងពីកណ្ដឹងខ្យល់ ឬកណ្ដឹងហុងស៊ុយ គេជឿថាសំឡេងកណ្ដឹងនឹងធ្វើឱ្យទីតាំងដែលអ្នករស់នៅមានជីវិតជីវ៉ា បណ្ដេញអមនុស្ស និងវត្ថុកខ្វក់ចេញ ហើយហៅតែវត្ថុល្អៗចូលមក ដូចជាហៅលុយកាក់ ហៅទ្រព្យ ហៅមាសពេជ្រ ហៅលាភសំណាង ធ្វើឱ្យម្ចាស់ផ្ទះមានឈ្មោះបោះសំឡេង ដូច្នោះហើយទើបអ្នកស្រុកនិយមព្យួរកណ្ដឹងខ្យល់ឬកណ្ដឹងហុងស៊ុយ នៅខាងមុខផ្ទះ ដើម្បីជាសិរីសួស្ដី។ សំឡេងកណ្ដឹងខ្យល់បង្កើតឱ្យមានកម្លាំងរំញ័រដែលជួយជំរុញកម្លាំងជីវិតមនុស្សឱ្យដំណើរការទៅកាន់ផ្លូវល្អ ហើយចំណុចដែលស័ក្ដិសមសម្រាប់ព្យួរកណ្ដឹងខ្យល់នេះមាន មុខផ្ទះ របៀងមាត់បង្អួច ទ្វារផ្ទះ(ឈើឬកញ្ចក់) ដើរឈើ និងរបងផ្ទះ។ គេមានជំនឿទៀតថាការដែលព្យួរកណ្ដឹងតូចមានចងខ្សែក្រហមនៅមុខទ្វារក្រៅផ្ទះនឹងជួយឱ្យមាសប្រាក់ហូរចូលក្នុងផ្ទះ។ របស់ល្អៗបែបនេះលោកអ្នកគួរប្រញាប់ទៅរកមកព្យួរមុខផ្ទះហើយ។
២.កាក់ចិនបុរាណ៖
គេចាត់ទុកថាវាគឺជាវិជ្ជាមូលដ្ឋានដ៏សំខាន់របស់តម្រាហុងស៊ុយ។ គេជាថាវាជាវត្ថុមង្គលដែលជួយនាំលាភសំណាងចូលមកក្នុងផ្ទះ វាក៏ជាវិធីសាស្ត្រមួយដែលចិនសែគ្រប់គ្នាចាំបាច់ត្រូវតែយកទៅប្រើប្រាស់ដើម្បីជួយបង្កើតលាភសំណាងនិងភាពមានបានដល់កូនសិស្សទាំងអស់ដែលមកទទួលសេវាមើលហុងស៊ុយ។ កាក់ចិនបុរាណចំនួន៣ក្រងដោយខ្សែក្រហម គឺជាកាក់ចិនបុរាណក្នុងសម័យស្ដេចឈានឡុង ដែលជាយុគសម័យកាលដ៏រុងរឿងបំផុតរបស់ ប្រទេសចិន។ វិជ្ជានេះគេចាត់ទុកជាវិជ្ជាដែលមានកម្លាំងមហាមង្គលដែលល្អជាទីបំផុត ព្រោះជាវត្ថុដែលហុងស៊ុយចាត់ទុកថាមានភាពសំខាន់អាចជួយការពារបុគ្គលដែលមានវត្ថុនេះជាប់ខ្លួនឱ្យជួបតែក្ដីសុខ សម្រេចជោគជ័យ និងមានភាពចម្រុងចម្រើន លុយកាក់ទ្រព្យសម្បត្តិ និងលាភសំណាងឧត្តុង្គឧត្តម។ សម្រាប់វិជ្ជាហុងស៊ុយគេចាត់ទុកកាក់ចិនថាជាវត្ថុល្អនាំសំណាង បើការរៀបហុងស៊ុយវិញ កាក់៣ក្រងដោយខ្សែក្រហមនេះ ជួយឱ្យកើតមានសំណាងល្អ មានលាភ មានមាសប្រាក់មានលុយកាក់ និងជាវិជ្ជាជួយឱ្យមានទ្រព្យល្អបំផុត។ (សូមជំរាបថាសម្រាប់អ្នកដែលចង់មានលាភ ចង់មានទ្រព្យសម្បត្តិស្ដុកស្ដម្ភ ចាំបាច់ត្រូវប្រើកាក់ចិនបុរាណចំនួន៣ក្រងដោយខ្សែអំបោះក្រហមដាក់ជាប់ខ្លួន។ ជាពិសេសសម្រាប់អ្នកដែលជាម្ចាស់ហាង ម្ចាស់អាជីវកម្ម ចាំបាច់ត្រូវតែប្រើប្រាស់កាក់ចិនបុរាណក្រងអំបោះក្រហមនេះ)។កាក់ចិនបុរាណមានរូបរាងមូល មានប្រហោងបួនជ្រុងនៅចំកណ្ដាល ព្រមទាំងមានក្រងដោយអំបោះក្រហមភ្ជាប់កាក់ចូលគ្នា គេជឿថាបើយកទៅព្យួរនៅបវិវេណខាងមុខផ្ទះ នឹងជួយហៅទ្រព្យចូលផ្ទះ ប៉ុន្តែត្រូវចាំថាកុំព្យួរកាក់លើសពី៣ ព្រោះនឹងនាំឱ្យមានបញ្ហាច្រើនជាងសំណាងល្អ។
៣. ត្រីខយ ឬ រូបធម្មជាតិ៖
តាមវិជ្ជាហុងស៊ុយមានជំនឿថាការចិញ្ចឹមត្រីខយ ឬការយករូបភាពដែលពាក់ព័ន្ធនឹងធម្មជាតិដូចជារូបភាពផ្កា រូបភាពទឹក រូបភាពទេសភាពធំទូលាយ មកព្យួរនៅក្នុងផ្ទះនឹងជួយហៅទ្រព្យសម្បត្តិ និងលុយកាក់ចូលក្នុងផ្ទះ។
៤. ដាក់តាំងដើមឈើក្នុងផ្ទះ៖
ដើមឈើក្រៅពីជួយឱ្យផ្ទះមើលទៅត្រជាក់ត្រជុំហើយនោះ នឹងជួយហៅមាសប្រាក់បានទៀតផង ដូច្នោះហើយកុំបណ្ដោយឱ្យដើមឈើនៅក្នុងបរិវេណផ្ទះស្វិតស្រពោន ព្រោះនឹងធ្វើឱ្យគ្មានលាភសំណាងហូរចូលក្នុងផ្ទះ ចាំបាច់ម្ចាស់ផ្ទះត្រូវតែឧស្សាហ៍ស្រោយទឹក ពូនដី ដាក់ជី បើសិនជាដើមឈើនាំលាភទៀតនោះនឹងកាន់តែល្អជួយនាំសំណាងថែមទៀត។
