សិល្បៈជាតិ៖ កាលពីថ្ងៃទី១៩ ខែមករា ឆ្នាំ២០២៣ តារាចម្រៀងវ័យក្មេងប្រចាំផលិតកម្ម ហង្សមាស និងរស្មីហង្សមាសបានចេញមកបង្ហោះរូបថតនិងសំណេរខ្លីមួយដែលធ្វើឱ្យអ្នកគាំទ្រមានការភ្ញាក់ផ្អើលជាខ្លាំងព្រោះមិននឹកស្មានថាឡុង លីងគ័ង្គ ដែលធ្លាប់តែជាកុមារាតូចក្នុងក្រសែភ្នែកអ្នកគាំទ្រ ពេលនេះប្រែប្រួលរូបរាងពេញកំលោះស្ដូកទៅហើយ។
ពិតណាស់សម្រាប់ លីងគ័ង្គ ដែលចូលប្រកួតកម្មវិធី The Voice Kids កាលពីឆ្នាំ ២០១៧ គឺមានអាយុត្រឹមតែ៩ឆ្នាំប៉ុណ្ណោះ ប៉ុន្តែធ្មេចបើកធ្មេចបើកពេលវេលាពិតជាដើរលឿនរហ័សណាស់ចូលមកដល់ឆ្នាំ២០២៣នេះ លីងគ័ង្គ ចម្រើនវ័យឈានចូលអាយុ១៥ឆ្នាំហើយ ចំណែកឯរូបរាងវិញក៏ធំខ្ពស់ប្លែកខុសពីកាលពី៦ឆ្នាំមុនដែរ។
តាមពិតទៅបើសិមជាសាមីខ្លួន មិនបង្ហោះរូបភាពនិងរៀបរាប់ថា៖ «ភ្លេចៗខ្លួនខ្ញុំពេញកំលោះបាត់» អ្នកគាំទ្រច្បាស់ជាមិនបានចាប់ភ្លឹកទេថា អាយដលតូចរបស់ពួកគាត់នៅពេលនេះធំធាត់ឈានចូលវ័យកំលោះមិនមែនជាកុមារាដូចជាពីមុននោះទៀតឡើយ។
អ្នកគាំទ្របានចូលមកពោលសរសើរចំពោះលីងគ័ង្គ ដែលធំពេញកំលោះហើយថែមទាំងមានរូបរាងសង្ហា ខណៈដែលអ្នកខ្លះទៀតបានលើកឡើងថា «មែនហ្នឹងឃើញ កូនក្មេងម៉ាងៃណោះសោះ» «កំលោះហើយសង្ហាទៀត Idol» «ក្មួយពេញកំលោះហើយសង្ហាណាស់ក្មួយប្រុស» និង «ទើបតែឃើញប្រលង រលឹមស្រិចបងលូកដៃក្តិច ថ្ងៃមុនសោះឥលូវធំពេញវ័យសង្ហាខ្លាំងទៀត ប្អូនប្រុស ស្រលាញ់ប្អូនតាំងពីនៅតូច» ជាដើម។
ទស្សនិកជនជឿថានាអនាគតដ៏ខ្លី ឡុង លីងគ័ង្គ ប្រហែលជានឹងអាចទទួលបានតំណែងជាតួឯកប្រុសនៅក្នុងខ្សែភាពយន្តណាមួយរបស់ផលិតកម្មហង្សមាសជាក់ជាមិនខាន ព្រោះយុវជនវ័យក្មេងរូបនេះមិនត្រឹមតែមានសំឡេងល្អរីឯរូបសម្បត្តិក៏ស្រស់សង្ហានិងលេចធ្លោមិនធម្មតាដែរ៕
