ព្រឹត្តិការណ៍កីឡាស៊ីហ្គេម លើកទី៣២ កម្ពុជាក្នុងនាមជាម្ចាស់ផ្ទះបានរក្សាជំហរសម្រេចក្នុងការប្រើឈ្មោះ«គុនខ្មែរ» ដោយមិនមានការកែប្រែសម្រាប់ការប្រកួតកីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះនាពេលខាងមុខ។
ក្នុងនាមជាម្ចាស់ផ្ទះកីឡាស៊ីហ្គេម លើកទី៣២ ឆ្នាំ២០២៣ នឹងសម្រេចប្រើពាក្យ «គុនខ្មែរ» នៅក្នុងព្រឹត្តិការណ៍ដ៏ធំ២ឆ្នាំមានម្ដងនេះ កម្ពុជាក៏បានផ្តល់ដំណឹងជាលាយលក្ខណ៍អក្សរទៅគណៈកម្មាធិការជាតិ (NOC) នៃប្រទេសអាស៊ានទាំង ១០ រួចហើយនិងមានប្រទេសជាសមាជិកនៅក្នុងតំបន់អាស៊ីអាគ្នេយ៍ចំនួន ៦ប្រទេស ដែលនឹងចូលរួមប្រកួតកីឡា «គុនខ្មែរ» មានដូចជា៖ ឥណ្ឌូណេស៊ី, វៀតណាម, ហ្វីលីពីន, ឡាវ, មីយ៉ាន់ម៉ា និងម៉ាឡេស៊ី។
លោក វ៉ាត់ ចំរើន អគ្គលេខាធិការ CAMSOC និងគណៈកម្មាធិការជាតិអូឡាំពិកកម្ពុជា (NOCC) បានលើកឡើងថា ការសម្រេចប្រើពាក្យ គុនខ្មែរ ជាផ្លូវការ នៅស៊ីហ្គេម ឆ្នាំ ២០២៣ នេះ គឺត្រូវបានធ្វើឡើង ទៅតាមឆន្ទៈរបស់កម្ពុជា។ ការប្រើ «Kun Khmer»គឺ សម្រាប់ការប្រកួតកីឡា Muay ក្នុងកីឡាស៊ីហ្គេម នៅប្រទេសកម្ពុជា។
ជុំវិញភាគីថៃ មិនពេញចិត្តចំពោះការប្រើពាក្យ «គុនខ្មែរ» ក្នុងព្រឹត្តិការណ៍កីឡាស៊ីហ្គេមលើទី៣២ និងមិនបញ្ជូនអត្ដពលិកមកប្រកួតលើវិញ្ញាសានេះ លោក វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ (CAMSOC) បានផ្ដល់បទសម្ភាសន៍ជាមួយសាព័ត៌មានថ្មីៗ កាលពីថ្ងៃទី២២ ខែមករាថា៖ ប្រទេសជាសមាជិកប្រកួតកីឡាស៊ីហ្គេម មានសិទ្ធិមិនចូលរួមប្រកួតលើប្រភេទវិញ្ញាសាកីឡាណាមួយ។ ភាគីថៃមានសិទ្ធិមិនចូលរួមប្រកួតក្នុងគុនខ្មែរ ក្នុងព្រឹត្តិការណ៍ស៊ីហ្គេម ឆ្នាំ២០២៣ ចំណែកកម្ពុជាក៏នឹងមិនចូលរួមប្រកួត Muay Thai ក្នុងព្រឹត្តិការណ៍ស៊ីហ្គេម ឆ្នាំ២០២៥ដូចគ្នា។ អគ្គលេខាធិការរូបនេះ បន្ថែមថា ក្នុងនាមជាម្ចាស់ផ្ទះ កម្ពុជាមានសិទ្ធិរក្សា និងប្រកាន់គោលការណ៍អត្ដសញ្ញាណជាតិរបស់ខ្លួន។
លោកបានបញ្ជាក់ថា បើទោះជាភាគីថៃ មិនពេញចិត្តចំពោះរឿងនេះ និងមិនបញ្ជូនអត្ដពលិកមកប្រកួតលើវិញ្ញាសានេះក៏ដោយ ប្រដាល់គុនខ្មែរ នៅតែជាវិញ្ញាសាប្រកួតក្នុងស៊ីហ្គេម លើកទី៣២ ដដែល ព្រោះមាន៦ប្រទេស បានគាំទ្រនិងចូលរួមប្រកួតលើវិញ្ញាសានេះ។ ៦ប្រទេស ដែលនឹងចូលរួមប្រកួតនោះមាន៖ឥណ្ឌូណេស៊ី, វៀតណាម, ហ្វីលីពីន, ឡាវ, មីយ៉ាន់ម៉ា និងម៉ាឡេស៊ី។
កីឡា Muay Thai ឬ Muay ត្រូវបានដាក់ក្នុងកីឡាស៊ីហ្គេម តាំងពីឆ្នាំ ២០០៧ ដោយកាលនោះថៃ ធ្វើជាម្ចាស់ផ្ទះ ហើយប្រទេសឡាវ ហ្វីលីពីន មីយ៉ាន់ម៉ា សិង្ហបុរី និងឥណ្ឌូនេស៊ី បានចូលរួមប្រកួតប្រជែងលើប្រភេទកីឡាមួយនេះ។
ក្នុងនាមជាម្ចាស់ផ្ទះកីឡាស៊ីហ្គេម ឆ្នាំ ២០២៣ សហព័ន្ធកីឡាប្រដាល់គុនខ្មែរបានរៀបចំលក្ខន្តិកៈ និងបទបញ្ជានៃប្រកួតដោយខ្លួនឯង ព្រមទាំងបានត្រៀមមន្រ្តីអាជ្ញាកណ្តាល និងចៅក្រម របស់ខ្លួនរួចរាល់សម្រាប់រៀបចំការប្រកួត។
ក្នុងការប្រកួតកីឡាស៊ីហ្គេមកន្លងមក ថៃបានដាក់ចូលវិញ្ញាសារប្រដាល់សេរី ដោយប្រើឈ្មោះ ម៉ឺយថៃ (Muay Thai) ទោះជាខាងកម្ពុជាទាមទារឳ្យប្តូរក៏គេមិនព្រម ។ រហូតថៃប៉ុនប៉ងដាក់ ម៉ឺយថៃ (Muay Thai) នេះចូលយូណេសស្កូទៀត តែមិនទាន់សម្រេច។
យោងតាមការសម្រេចជាផ្លូវការ កាលបរិច្ឆេទនៃការប្រកួតព្រឹត្តិការណ៍នេះ គឺគ្រោងនឹងធ្វើនៅពាក់ កណ្ដាល ឆ្នាំ២០២៣ ពោលគឺព្រឹត្តិការណ៍កីឡាអាស៊ីអាគ្នេយ៍ លើកទី៣២ (32nd SEA Games) នឹងធ្វើឡើងពីថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣ ចំណែកព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ (12th ASEAN Para Games) នឹងធ្វើឡើងពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣៕