សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួង ការពារជាតិ និងជាប្រធានគណៈកម្មាធិការជាតិ CAMSOC ជំរុញលើការបំពាក់ប្រព័ន្ធអ៊ិនធឺណេតឲ្យបានគ្រប់កន្លែង ក្នុងអំឡុងពេលប្រកួត ដែលប្រព័ន្ធអ៊ិនធឺណេត ជាចំណុចគន្លឹះក្នុងការផ្សព្វផ្សាយឲ្យកាន់តែមានប្រសិទ្ធភាពខ្ពស់នៅ ទូទាំងប្រទេស និងទៅកាន់បរទេសផងដែរ។
ការលើកឡើងដូចនេះ ធ្វើឡើងនៅក្នុងកិច្ចប្រជុំបូកសរុបលទ្ធផលការងារឆ្នាំ២០២២ និងលើកទិសដៅឆ្នាំ២០២៣ សម្រាប់ការទទួលធ្វើម្ចាស់ផ្ទះ ស៊ីហ្គេម-អាស៊ានប៉ារ៉ាហ្គេម កាលពីល្ងាចថ្ងៃទី២០ ខែមករា ឆ្នាំ២០២៣។
សម្តេចពិជ័យសេនា ទៀ បាញ់ បានបន្ថែមថា ប្រសិនមិនមានប្រព័ន្ធអ៊ិនធឺណិតគ្រប់គ្រាន់ទេ នោះការផ្សព្វផ្សាយនេះ មិនមានប្រសិទ្ធភាពខ្ពស់នោះឡើយ ហើយក៏មិនអាចផ្សាយផ្ទាល់ពីកន្លែងពិធីបានល្អនោះដែរ។
ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) បានអះអាងដែរថា ជាមួយគ្នានេះ ឯកឧត្តមរដ្ឋលេខាធិការ ក្រសួងប្រៃសណីយ៍ និងទូរគមនាគមន៍ បានកំណត់បង្ហាញជូនកិច្ចប្រជុំថា នឹងមានការបំពាក់ឧបករណ៍ Wi-Fi នៅគ្រប់ទីកន្លែង និងមានរថយន្ត Wi-Fi ចល័តទៀត ដើម្បីជួយបន្ថែមកម្លាំងលើប្រព័ន្ធអ៊ិនធឺណិតនេះ។
ជាមួយគ្នានេះ អាជ្ញាធររាជធានី-ខេត្តទាំងអស់ ជាពិសេសខេត្តគោលដៅរៀបចំប្រភេទកីឡាមួយចំនួន ក៏កំពុងត្រៀមរៀបចំកែលម្អ លើការងារផ្សព្វផ្សាយឲ្យកាន់តែទូលំទូលាយផងដែរ៕