ការប្រកួតកីឡាហែលទឹកជ្រើសរើសជើងឯកថ្នាក់ជាតិ ប្រចាំឆ្នាំ២០២២ នៅពហុកីឡដ្ឋានជាតិអូឡាំពិកបានបញ្ចប់ជាស្ថាពរ ដោយក្រសួងសាធារណការ និងដឹកជញ្ជូនឈរនៅចំណាត់ថ្នាក់លេខ១ជាមួយនឹងមេដាយច្រើនជាងគេ ក្នុងចំណោមក្លិបចូលរួមសរុបចំនួន៨។
លោក ហែម គីរី អគ្គលេខាធិការ សហព័ន្ធខ្មែរកីឡាហែលទឹកបានបញ្ជាក់ថា ដោយទទួលបានថវិកាគាំទ្រពីក្រសួងអប់រំ យុវជន និងកីឡា សម្រាប់ពន្លឿនការអភិវឌ្ឍសហព័ន្ធកីឡាជាតិ ឆ្ពោះទៅស៊ីហ្គេមលើកទី៣២ ឆ្នាំ២០២៣ សហព័ន្ធខ្មែរកីឡាហែលទឹកបានរៀបចំការប្រកួតកីឡាហែលទឹកជ្រើសរើសជើងឯកថ្នាក់ជាតិ ប្រចាំឆ្នាំ២០២២ ពីថ្ងៃទី១៨ ដល់ថ្ងៃទី២០ ខែមករា ឆ្នាំ២០២៣ នៅអាងហែលទឹកពហុកីឡដ្ឋានជាតិអូឡាំពិក។
ការប្រកួតនេះមានក្លិបហែលទឹក៨ស្ថាប័នបានចូលរួម ដែលមានកីឡាករ កីឡាការិនីចូលរួមប្រកួតសរុប មានចំនួន ១០៣នាក់ (កីឡាករ ៥៧នាក់ និងកីឡាការិនី ៤៦នាក់) និងគ្រូបង្វឹក គ្រូជំនួយចំនួន១៦នាក់ នឹងមានវត្តមានមន្រ្តីគណៈកម្មការបច្ចេកទេសចំនួន ៥០នាក់ ចូលរួមដឹកនាំ និងកាត់សេចក្តីក្នុងការប្រកួត។ សម្រាប់ការប្រកួតនេះ មាន២០វិញ្ញសា កីឡាករ ១០វិញ្ញាសា និងកីឡាការិនី ១០វិញ្ញាសា។
សម្រាប់ការរៀបចំការប្រកួតនេះ គឺប្រើប្រាស់ថវិកាឧបត្ថម្ភគាំទ្រពីក្រសួងអប់រំ យុវជន និងកីឡាលើការងាររៀបចំការប្រកួត ៤៥% ផ្តល់មកសហព័ន្ធខ្មែរកីឡាហែលទឹក រៀងរាល់ឆ្នាំ ដើម្បីពន្លឿនការអភិវឌ្ឍសហព័ន្ធកីឡាជាតិ ឆ្ពោះទៅស៊ីហ្គេម លើកទី៣២ ឆ្នាំ២០២៣។
ឆ្លងកាត់ការប្រកួត៣ថ្ងៃ លទ្ធផលជ័យលាភីរួមមាន ក្លិបក្រសួងសាធារណការ និងដឹកជញ្ជូន ឈរនៅចំណាត់ថ្នាក់លេខ១ ដោយដណ្តើមបានមេដាយសរុប ២០គ្រឿង ក្នុងនោះ មេដាយមាស ៩ មេដាយប្រាក់ ៩ និងសំរឹទ្ធ២, លេខ២ ក្លិបក្រសួងមហាផ្ទៃ មេដាយមាស៨ និងសំរឹទ្ធ២, លេខ៣ ក្លិបព្រឹទ្ធាចារ្យ ហែម ថុន មេដាយមាស ២ ប្រាក់៥ និងសំរឹទ្ធ៦, លេខ៤ ក្លិបក្រសួងសេដ្ឋកិច្ច និងហិរញ្ញវត្ថុ មេដាយមាស១ ប្រាក់៤ និងសំរឹទ្ធ៤ ខណៈលេខ៥ ក្លិបហែលទឹកក្រសួងព័ត៌មាន មេដាយប្រាក់២ និងសំរឹទ្ធ៤៕