ក្លិបបាល់ទាត់ Everton សមាជិកលីគកំពូលអង់គ្លេស Premier League បានសម្រេចបណ្តេញលោក Frank Lampard ចេញពីតំណែង កាលពីយប់ថ្ងៃចន្ទ ទី២៣ ខែមករា ឆ្នាំ២០២៣ ក្រោយដឹកនាំក្រុមដែលមានមូលដ្ឋាននៅទីក្រុង Liverpool មួយនេះបានរយ:ពេល១២ខែ។
គួរដឹងថាលោក Frank Lampard ចូលកាន់តំណែង Everton ដំបូងនៅថ្ងៃទី១ ខែកុម្ភៈ ឆ្នាំ២០២២ ជាមួយកិច្ចសន្យារយ:ពេល ២ឆ្នាំកន្លះ ពោលគឺជំនួសកៅអីលោក Rafael Benitez បុរសសញ្ជាតិអេស្ប៉ាញ វ័យ៦២ឆ្នាំ។
ប៉ុន្តែលោក Lampard បានធ្វើឲ្យអ្នកគាំទ្រ និងប្រធានក្លិបលោក Farhad Moshiri អស់សេចក្តីទុកចិត្តក្នុងការបន្តលោកជាគ្រូបង្វឹក ក្រោយ Everton ធ្លាក់ដល់តំបន់គ្រោះថ្នាក់ ពោលគឺអាចនឹងត្រូវកាត់ចេញពីលីគកំពូល Premier League ទៅកាន់លីគ២ Championship ដោយឆ្លងកាត់២០ប្រកួត ឈ្នះ៣ ស្មើ៦ និងចាញ់១១លើក មាន១៥ពិន្ទុប៉ុណ្ណោះ ស្ថិតនៅលេខរៀងទី១៩។
មុនកាន់តំណែងជាគ្រូ Everton បុរសវ័យ ៤៤ឆ្នាំរូបនេះត្រូវបានក្លិប Chelsea បណ្តេញចេញពីតំណែងជាគ្រូបង្វឹក កាលពីថ្ងៃទី២៥ ខែមករា ឆ្នាំ២០២១ ក្រោយដឹកនាំក្រុមបានត្រឹមរយៈពេល ១៨ខែប៉ុណ្ណោះ បន្ទាប់ពីទទួលបានសេចក្តីទុកចិត្តឱ្យឡើងជំនួសលោក Maurizio Sarri។ ខណ:លោក Frank Lampard ក៏ធ្លាប់ដឹកនាំក្រុម Derby County F.C ចន្លោះឆ្នាំ ២០១៨-១៩៕
