តុក្កតាសម្រាប់ព្រឹត្តិការណ៍កីឡាស៊ីហ្គេម ឆ្នាំ២០២៣ នៅប្រទេសកម្ពុជា គឺរូបសត្វទន្សាយ២ មានឈ្មោះថា បុរី (ឈ្មោល) និង រំដួល (ញី) ដែលមានក្នុងក្បាច់គុនបុរាណខ្មែរ ល្បុក្កតោ។ ទន្សាយឈ្មោលឈ្មោះ បុរី តំណាងឱ្យសាមគ្គីភាព ហើយទន្សាយញីឈ្មោះ រំដួល ជាផ្កាតំណាងឱ្យប្រទេសកម្ពុជា។
ចំពោះប្រភេទកីឡាដាក់ឱ្យប្រកួត ក៏មានការបែងចែកដាច់ពីគ្នាផងដែររវាង ស៊ីហ្គេម និងអាស៊ានប៉ារ៉ាហ្គេម ដោយស៊ីហ្គេម មានប្រភេទកីឡាច្រើនជាង អាស៊ានប៉ារ៉ាហ្គេម។ ព្រឹត្តិការណ៍ស៊ីហ្គេម ត្រូវបានប្រកាសជាផ្លូវការថា នឹងមានកីឡាចំនួន ៣៧ប្រភេទ បូកនឹងកីឡាសម្ដែង ១ប្រភេទ (Demonstration) ដាក់ឱ្យប្រកួត ដែលស្មើនឹង ៦០៨វិញ្ញាសា (៦០៨ មេដាយមាស)។
ចំណែកអាស៊ានប៉ារ៉ាហ្គេម ត្រូវបានប្រកាសជាផ្លូវការថា មានកីឡាចំនួន ១៣ប្រភេទ បូកនឹងកីឡាសម្ដែង ១ប្រភេទ ដាក់ឱ្យប្រកួត ស្របពេលដែលវិញ្ញាសាប្រកួតស្ថិតក្នុងការពង្រាងមានប្រមាណជាង៤០០វិញ្ញាសា។ កីឡា ១៣ប្រភេទ ដែលត្រូវបានអនុម័តរួចរាល់ រួមមានកីឡាអត្តពលកម្មជនពិការ, ហែលទឹកជនពិការ, វាយសីជនពិការ, បាល់ទាត់ ៥ម្ខាង, បាល់ទាត់ ៧ម្ខាង, លើកទម្ងន់ជនពិការ, បូស្យាជនពិការ, វាយកូនឃ្លីលើតុជនពិការ, យូដូជនពិការ, បាល់បោះជិះរទេះជនពិការ, បាល់បោះជនពិការភ្នែក, បាល់ទះអង្គុយ និងកីឡាអុក រីឯកីឡាសម្ដែង ១ប្រភេទ (Demonstration) ដែលកំណត់យកកីឡាអេឡិចត្រូនិក (E-Sports) តែមិនរាប់បញ្ចូលមេដាយនោះទេ។
ប្រទេសចូលរួម គឺត្រូវបានបញ្ជាក់ថា រួចហើយថា ប្រទេសជាសមាជិកសហព័ន្ធកីឡាអាស៊ីអាគ្នេយ៍ ទាំង១០ រួមមាន ព្រុយណេ ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ ទីម័រខាងកើត និងវៀតណាម សុទ្ធតែនឹងមកចូលរួមការប្រកួតស៊ីហ្គេម លើកទី៣២ ឆ្នាំ២០២៣ នៅកម្ពុជា។
សូមបញ្ជាក់ថា ព្រឹត្តិការណ៍កីឡាអាស៊ីអាគ្នេយ៍ លើកទី៣២ (32nd SEA Games) នឹងធ្វើឡើងពីថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣ ចំណែកព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ (12th ASEAN Para Games) នឹងធ្វើឡើងពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣៕