សិល្បៈជាតិ៖ បាត់មុខអស់មួយរយៈ ស្រាប់តែថ្មីៗនេះ អ្នកនាង ខ្ញុង លេចមុខមកបង្ហើបថា កូនប្រុសដែលមានវ័យ ១៦ ឆ្នាំ បានសុំអ្នកនាងទៅបួស ទាល់តែពេលសួរនាំទៅ ព្រោះមូលហេតុដើម្បីសងគុណម្ដាយដោយសារអាណិតម្ដាយដែលលំបាកពេក។ សម្ដីនេះបានធ្វើអ្នកនាង ខ្ញុង រន្ធត់ចិត្តជាពន់ពេក រហូតស្ទើរតែទប់ទឹកភ្នែកមិនជាប់។
តាមការបង្ហោះរបស់អ្នកនាង ខ្ញុង បានរៀបរាប់នៅលើគណនីហ្វេសប៊ុករបស់ខ្លួនថា៖ «មានកូនប្រុសអាយុ ១៦ ឆ្នាំម្នាក់ សុខៗស្រាប់តែកូនសុំម្តាយទៅបួស, សួរនាំទៅថា មកពីអាណិតម៉ាក់ពេក មួយរយៈនេះឃើញម៉ាក់លំបាកខ្លាំង ចង់សងគុណម៉ាក់ បើជាបងប្អូន តើសប្បាយចិត្តទេ? ចង់លស់ព្រលឹងហើយលោកអើយ អនុមោទនាកូនសម្លាញ់ ជាបុណ្យរបស់ម៉ាក់ណាស់ ម៉ែរកនិយាយអ្វីមិនចេញទេ ហូរទឹកភ្នែកដោយមិនបានដឹងខ្លួន»។
បន្ទាប់ពីទម្លាយរឿងកូនប្រុសមានបំណងចង់សងគុណខ្លួន និងសុំទៅបួសនាពេលនេះ គេសង្កេតឃើញមានមិត្តសិល្បៈ និងមហាជនជាច្រើនបញ្ចេញមតិគាំទ្រ និងពោលសរសើរពីទំហំចិត្តរបស់កូនប្រុសអ្នកនាង ខ្ញុង ខ្លាំងណាស់។ ខ្ញុង នៅមិនទាន់មានការឆ្លើយតបទេថា ព្រមឱ្យកូនទៅបួសពិតមែន ឬ មិនដាច់ចិត្តពីកូននាពេលនេះ។
គេនៅចាំបានថា កន្លងមកនេះ អ្នកនាង ខ្ញុង និងស្វាមី បានតស៊ូពុះពារគ្រប់មធ្យោបាយដើម្បីចិញ្ចឹមកូនប្រុស និងផ្គត់ផ្គង់ការសិក្សារបស់កូន។ បើទោះជាជួបរឿងបំណុលវន្តកយ៉ាងណាក៏ដោយ ខ្ញុង នៅតែលើដៃសំពះឱ្យមានការជួយជ្រោមជ្រែងឱ្យកូនអ្នកនាងបានបន្តការសិក្សា និងរស់នៅក្នុងស្ថានភាពណាមួយដែលទទួលយកបាន។
រហូតមកទល់ពេលនេះ គេនៅមិនទាន់ឃើញថា អ្នកនាង ខ្ញុង ឆ្លើយតបចំពោះបំណងល្អរបស់កូនប្រុសយ៉ាងណានោះទេ។ បើមានអ្វីថ្មីជាបន្តទៀត ត្រយងនឹងនាំសារមកប្រាប់ប្រិយមិត្តទាំងអស់គ្នាបានឱ្យជ្រាបជាដំណឹងបន្តទៀត៕