សិល្បៈជាតិ៖ តារាចម្រៀង ម៉ា ច័ន្ទបញ្ញា ស្រាប់តែចេញមកប្រកាសនាពេលថ្មីៗនេះថា លោកមិនមែនប្រកាន់ឫកពាររឿងតម្លៃខ្ពស់ អាងខ្លួនល្បីឬប្រកាន់ខ្លួនអីទេ ប៉ុន្តែបើគ្មាន២០០ ដុល្លារទេ កុំហត់ចំណាយពេលទាក់ទងលោកផ្សាយពាណិជ្ជកម្មអី ព្រោះមិនចង់ប្រកែកតម្លៃអីច្រើន។ ការប្រកាសនេះ លោកបានបង្ហោះនៅលើហ្វេសប៊ុកផ្ទាល់របស់លោក នៅថ្ងៃទី ២៦ ខែមករា ឆ្នាំ ២០២៣នេះ។
ត្រយងសូមដកស្រង់សម្ដីទាំងស្រុងរបស់ លោក ម៉ា ច័ន្ទបញ្ញា ដែលបានបង្ហោះនិងរៀបរាប់ដូច្នោះថា ៖ « សូមអធ្យាស្រ័យផង បងប្អូន អ្នកទំនាក់ទំនងតួ និយាយត្រង់និងសូមប្រកាសតែម្ដង! មិនមែនខ្ញុំ ប្រកាន់ឬក តម្លៃខ្ពស់ អាងខ្លួនល្បី ឬប្រកាន់ខ្លួនអីទេ។ ចំពោះការងារសិល្បៈពាណិជ្ជកម្ម ផលចំណេញ បើក្រោមតម្លៃ 200 សូមមេត្តា កុំទាក់ទងមកអី! ខ្ញុំពិតជាមិនចង់ប្រកែកទេ។»
លោកបន្តថា ៖ « ខ្ញុំធ្វើសិល្បៈនេះជារបរទីពីរ ទោះមិនស្អាតសង្ហារដូចគេ តែខ្ញុំយកបទពិសោធន៍ ជាង10ឆ្នាំ ចំណេះជំនាញជាច្រើន និងចំណាយ សុខភាពអស់មិនតិចទេ ទម្រាំអាចដើរដល់ទីនេះ។ ម្យ៉ាងបើក្រោមតម្លៃនេះ សុខចិត្ត បរិច្ចាគ ជាការចូលរួមដោយមិនគិតកម្រៃវិញប្រសើរជាង។ ដូច្នេះ សូមបងប្អូន មេត្តា កុំប្រកែប្រកាន់អី ព្រោះ ខ្ញុំមានកិច្ចការក្រុមការងារច្រើន និងមានតម្រូវការចំណាយ រវល់ច្រើន សូមអរគុណ។»
តាមការប្រកាសលោក ម៉ា ច័ន្ទបញ្ញា យ៉ាងច្បាស់ៗអំពីតម្លៃខ្លួននាដើមឆ្នាំថ្មី២០២៣នេះ ត្រូវបានអ្នកលេងបណ្ដាញសង្គមផ្ដល់ជាយោលបល់ឱ្យលោកថា លោកគួរតែមានអ្នកគ្រប់គ្រងត្រឹមត្រូវដើម្បីដោះស្រាយតម្លៃជាមួយដៃគូពាណិជ្ជកម្ម ឬក្រុមហ៊ុនដែលទាក់ទងមកលោក ដែលនោះគឺជាកំណត់ស្តង់ដារតម្លៃជាក់លាក់របស់លោកផងដែរ។ ប៉ុន្តែតារាចម្រៀងប្រុសរូបនេះបានបកស្រាយវិញថា បញ្ញានេះគឺលោកធ្លាប់មានអ្នកគ្រប់គ្រងរួចមកហើយ ប៉ុន្តែភាគច្រើនគឺមានការទំនាក់ទំនងរឿងតម្លៃខ្លួនមកលោកផ្ទាល់ ដែលពេលខ្លះពួកគេគិតតាមស្ដង់ដារតម្លៃខ្លួនចាស់ និងចចារតាមអ្វីដែលអាចធ្វើទៅបាន។
សូមជម្រាបថា ការប្រកាសតម្លៃខ្លួនខាងលើ តារាចម្រៀងប្រុសរូបនេះ គ្រាន់តែចង់បញ្ជាក់ថា គឺជាតម្លៃថ្មីដែលកំណត់មិនមានការចចារ ខណៈកាលពីឆ្នាំមុនៗ គឺមានការខុសគ្នាតែបន្តិចបន្តួចប៉ុណ្ណោះ។ ក្នុងនោះគេមើលឃើញថា លោកមិនមានគម្រោងតម្លើងតម្លៃខ្លួនបន្ថែមទៀតទេ ប៉ុន្តែលោកចង់បានភាពជាក់លាក់ការងារច្រើនថែមទៀត ព្រោះដើម្បីផលប្រយោជន៍ទាំងសងខាងតែប៉ុណ្ណោះ ពោលគឺ រវាងលោក និងដៃគូពាណិជ្ជកម្ម។
