អូស្ត្រាលី សម្រេចបន្តកិច្ចសន្យារយៈពេល ៤ឆ្នាំបន្ថែមទៀត ដល់លោក Graham Arnold ក្នុងនាមជាគ្រូបង្វឹកជម្រើសជាតិអូស្ត្រាលី ពោលកគឺអាចដឹកនាំក្រុមឆ្លងកាត់ការប្រកួតដល់ចប់ពាន់រង្វាន់ពិភពលោក World Cup នៅឆ្នាំ២០២៦ ខាងមុខ។ នេះបើយោងតាមការចុះផ្សាយរបស់សាព័ត៌មាន AP នៅថ្ងៃទី៣០ ខែមករា ឆ្នាំ២០២៣ នេះ ។
ការបន្តកិច្ចសន្យារបស់គ្រូបង្វឹកវ័យ ៦០ឆ្នាំរូបនេះ បន្ទាប់ពីលោកបានដឹកនាំក្រុមជម្រើសជាតិអូស្ត្រាលី ឱ្យទទួលបានលទ្ធផលយ៉ាងល្អនៅក្នុងព្រឹត្តិការណ៍ World Cup 2022 នៅប្រទេសកាតា ដែលអាចឡើងដល់វគ្គ ១៦ក្រុមចុងក្រោយ តែត្រូវចាញ់ក្រោមថ្វីជើង ក្រុងជើងឯក អាហ្សង់ទីន ក្នុងលទ្ធផល ២-១។
លោក Graham Arnold បាននិយាយនៅក្នុងសេចក្តីថ្លែងការណ៍មួយថា៖ «ខ្ញុំស្រឡាញ់អូស្ត្រាលី ហើយខ្ញុំស្រឡាញ់កីឡាបាល់ទាត់អូស្ត្រាលី ខ្ញុំសប្បាយរីករាយ និងមានមោទនភាពនៃសមិទ្ធផលរបស់ខ្ញុំ បន្ទាប់ពីបញ្ចប់ព្រឹត្តិការណ៍ World Cup 2022 នៅប្រទេសកាតា»។
គួរបញ្ជាក់ថា លោក Graham Arnold កើតនៅថ្ងៃទី៣ ខែសីហា ឆ្នាំ១៩៦៣ បច្ចុប្បន្នលោកមានវ័យ៦០ឆ្នាំ បានចាប់អាជីពជាគ្រូបង្វឹកដំបូងនៅឆ្នាំ១៩៨៥ នៅក្នុងក្រុមឈុត B ប្រទេសអូស្ត្រាលី។ ដឹកនាំក្រុម Sydney United ចាប់ពីឆ្នាំ១៩៨៩-១៩៩០ ក្លិបNorthern Spirit ឆ្នាំ១៩៩៨-២០០០ និងក្លាយជាគ្រូជំនួនជម្រើសជាតិអូស្ត្រាលីនៅឆ្នាំ២០០០ ដល់ឆ្នាំ២០១០។ នៅអំឡុងឆ្នាំ២០១០ ដល់ឆ្នាំ២០១៨ លោកArnold បានចូលរួមជាមួយក្លិប Central Coast Mariners ឆ្នាំ២០១០-២០១៣, ក្លិប Vegalta Sendai ឆ្នាំ២០១៤, ក្លិប Sydney FC ឆ្នាំ២០១៥-២០១៨ និងចូលរួមដឹងនាំក្រុមឈុតធំអូស្ត្រាលីរហូតដល់បច្ចុប្បន្ន៕