សិល្បៈជាតិ៖ យោងតាមផេករបស់សាស្ត្រាចារ្យរបាំបុរាណ ចាប ចំរើនតុលា បានចែករំលែកឱ្យដឹងកាលពីថ្ងៃទី១ ខែកុម្ភៈ ឆ្នាំ២០២៣ កម្ពុជានឹងចូលរួមក្នុងព្រឹត្តិការណ៍ដង្ហែក្បួនឈីងហ្គេ នៅសាធារណរដ្ឋសិង្ហបុរី ដោយការសម្ដែងរបស់កម្ពុជាមានចំណងជើងថា «ក្ដីសង្ឃឹមរបស់យើង»។
ខាងក្រោមនេះគឺជាខ្លឹមសារទាំងស្រុងដែលផេករបស់នាដការីរបាំបុរាណបានចែករំលែកជាព័ត៌មានដល់អ្នកគាំទ្ររបស់ខ្លួន:
នេះជាផ្នែកមួយនៃផ្នែកជាច្រើនទៀតសម្រាប់ចូលរួមក្នុងក្បួនដង្ហែឈីងហ្គេ នៅសាធារណរដ្ឋសិង្ហបុរី នាថ្ងៃទី៣ និងទី៤ ខែកុម្ភៈ ឆ្នាំ២០២៣ ក្រោមមូលបទ «Embrace Tomorrow»។ ដោយឡែកប្រតិភូសម្តែងកម្ពុជា នឹងធ្វើការសម្តែងក្រោមចំណងជើងថា «ក្ដីសង្ឃឹមរបស់យើង»។ «ក្ដីសង្ឃឹមរបស់យើង» បង្ហាញពីក្ដីសង្ឃឹមរបស់ប្រជាជនកម្ពុជាសម្រាប់ប្រទេសជាតិ និងពិភពលោក ឬបានន័យថាកម្ពុជាជាក្ដីសង្ឃឹមរបស់យើងទាំងអស់គ្នា។ ចូលរួមទាំងអស់គ្នាដើម្បីជាតិ និងប្រជាជនកម្ពុជា។ ការសម្តែងនេះ គឺជាការរួមផ្សំនៃរបាំបុរាណខ្មែរ របាំសហសម័យ និងការសម្តែងសៀក។ ទម្រង់ចលនាសម្បូរបែប និងចម្រុះទាំងនេះ ជាការបង្ហាញពីក្ដីសង្ឃឹមរបស់កម្ពុជាក្នុងការរស់នៅប្រកបដោយភាតរភាព សុខដុមរមនា សន្តិភាព និងការអភិវឌ្ឍ នៃមហាគ្រួសារខ្មែរ។តួអង្គនេះជាតំណាងដល់ធាតុមនុស្សមិនថា ស្ថិតក្នុងវ័យ ឋានៈ ពូជសាសន៍ ឬពណ៌សម្បុរណានោះទេ ដែលជាកោសិការសំខាន់មួយក្នុងសង្គមឈានឆ្ពោះទៅអនាគតនៃក្តីសង្ឃឹមរបស់យើង។ ក្បួនដង្ហែររបស់កម្ពុជាត្រូវបានរចនា និងតម្លើងក្បាច់សិល្បៈដោយ លោកគ្រូ ព្រឿង ឈៀង អ្នកគ្រូ សុទ្ធ សុម៉ាលី អ្នកគ្រូ ជ័យ ច័ន្ទកិត្យា និងអ្នកគ្រូ ចាប ចំរើនតុលា ដោយមានការសហការរៀបចំជាមួយក្រុមការងារនៃសហភាពសហព័ន្ធយុវជនកម្ពុជា និងដោយមានការគាំទ្របច្ចេកទេសពីក្រសួងវប្បធម៌ និងវិចិត្រសិល្បៈ។
ប្រភពខ្លឹមសារ: សហភាពសហព័ន្ធយុវជនកម្ពុជា
