ឯកឧត្តម ថោង ខុន រដ្ឋមន្ដ្រីក្រសួងទេសចរណ៍ និងជាអនុប្រធានអចិន្ដ្រៃយ៍នៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ មានប្រសាសន៍ថា៖ «ថ្ងៃនេះ គឺជាព្រឹត្តិការណ៍មួយដ៏សំខាន់ណាស់។ យើងដឹងហើយថា អ្នកស្ម័គ្រចិត្ត គឺជា DNA របស់ព្រឹត្តិការណ៍កីឡាដ៏ធំ ហើយកន្លងមកយើងក៏បាន ធ្វើការរៀបចំបែងចែក គឺការចាត់តាំង ការប្រើប្រាស់ របស់គណៈកម្មការស្ម័គ្រចិត្តនេះ ទៅតាមគ្រប់ផ្នែកអស់ហើយ»។
ការលើកឡើងដូចនេះ ធ្វើឡើង នៅក្នុងសន្និសីទសារព័ត៌មាន ប្រកាសទទួលយកអ្នកស្ម័គ្រចិត្តជាផ្លូវការ សម្រាប់ត្រៀមព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ក្រោមអធិបតីភាពផ្ទាល់របស់ឯកឧត្តម និងឯកឧត្តម ហ៊ុន ម៉ានី កាលពីរសៀលថ្ងៃទី១ ខែកុម្ភៈ ឆ្នាំ២០២៣ នៅទីស្នាក់ការ គណៈកម្មាធិការជាតិអូឡាំពិកកម្ពុជា (NOCC)។
ឯកឧត្តម ថោង ខុន បន្ថែមថា៖ «ក្នុងនោះក៏មាននៅក្នុងគណៈកម្មការជំនាញផងដែរ ដោយខាងមុខនេះ គណៈកម្មការជំនាញ នឹងទទួលយកអ្នកស្ម័គ្រចិត្តទាំងឡាយ ដើម្បីទៅចូលរួមការងារជាមួយគណៈកម្មការជំនាញ ពិសេសក្នុងការរៀបចំការប្រកួតគ្រប់ប្រភេទកីឡាទាំងអស់ និងការងារជំនាញ ដែលមានការពាក់ព័ន្ធ»។ ឯកឧត្តមបានដាក់ក្ដីសង្ឃឹមថា កម្ពុជា នឹងបានទទួលនូវការចុះឈ្មោះរបស់អ្នកស្ម័គ្រចិត្តជាច្រើន ដើម្បីចូលរួមបំពេញការងារ ក្នុងកិច្ចការស៊ីហ្គេមរបស់ជាតិ ឱ្យទទួលបានជោគជ័យ។
កម្ពុជាត្រូវការអ្នកស្ម័គ្រចិត្តចំនួន ៦,៩៦៣នាក់ ដែលត្រូវបានបែងចែកជា៣កម្រិតគឺ១. អ្នកស្ម័គ្រចិត្តជា ថ្នាក់ដឹកនាំ, ២. អ្នកស្ម័គ្រចិត្តជាជនបង្គោល និង៣. អ្នកស្ម័គ្រចិត្តទូទៅ ព្រមទាំង៥០កន្លែងសម្រាប់ជនជាតិបរទេស។ លើសពីនេះក៏ត្រូវការអ្នកស្ម័គ្រចិត្ត នៅខេត្តសៀមរាប ចំនួន ១០០នាក់ ខេត្តព្រះសីហនុ ១០០នាក់ ខេត្តកែប ៥០នាក់ និងខេត្តកំពត ៥០នាក់៕
ដើម្បីក្លាយទៅជាអ្នកស្ម័គ្រចិត្តសូមចូលទៅកាន់៖ https://cambodia2023.com/km/volunteer-register
