សិល្បៈជាតិ៖ តារាសម្ដែង វ៉ាន់ ដេវីត ដែលជាតួ មាណព ក្នុងរឿង «បដាចារ» សម្ដែងជាមួយនឹងកញ្ញា នី មុន្នីនាថ បានចេញមកប្រកាសនៅលើហ្វេសប៊ុកនាពេលថ្មីៗនេះថា លោកបានដាក់ពាក្យបណ្ដឹងភ្លាមៗ បន្ទាប់ពីមានជនអាណាមិកយករូបភាពរបស់លោកទៅប្រព្រឹត្តិអំពើទុច្ចរិតផ្សេងៗ តាមរយៈការបង្កើតគណនីក្លែងក្លាយដើរបោកប្រាស់លុយអ្នកគាំទ្រ។
លោក វ៉ាន់ ដេវីត បានភ្លាប់ខ្លឹមសារថា ៖ « ខ្ញុំបានធ្វេីតាមផ្លូវច្បាប់ហេីយៗ ពាក្យបណ្តឹងដល់ដៃសមត្ថកិច្ចហេីយពាក្យបណ្ដឹងការពារខ្លួនរបស់ខ្ញុំដេីម្បីចៀសវាងពីការយល់ច្រឡំផ្សេងៗ។ សូមបញ្ឈប់ការបោកប្រាស់អ្នកដទៃដោយប្រេីប្រាស់រូប វីដេអូរបស់ខ្ញុំទៀត»។
យ៉ាងណាមិញ តាមរយៈពាក្យបណ្ដឹងដែលលោកបានបង្ហោះ ក៏បានរៀបរាប់ឱ្យដឹងលម្អិតថា លោកបានទទួលដំណឹងខាងលើនេះពីអ្នកគាំទ្រម្នាក់ដែលមានហ្វេសប៊ុកឈ្មោះ ស្រីនាង សៀមរាប ដែលជាជនរងគ្រោះ។ រហូតមកទល់ពេលនេះ មានគណនីក្លែងក្លាយដល់ទៅ ៨ គណនីហើយ បានប្រើប្រាស់រូបភាពរបស់លោក និងធ្វើសកម្មភាពទុច្ចរិតផ្សេងៗ។
ជាមួយគ្នានេះដែរ តាមការលើកឡើងរបស់អ្នកគាំទ្ររបស់ វ៉ាន់ ដេវីត បានបញ្ចេញមតិថា សព្វថ្ងៃនេះពួកគេសង្កេតឃើញមានសកម្មភាពបោកប្រាស់ដោយប្រើរូបភាពតារាល្បីៗ គឺកើតមានជាច្រើនករណី។ ហើយមានខ្លះទៀត បានផ្ញើលុយឱ្យអាយដលរបស់ពួកគេ ទាំងដែលពួកគេមិនបានជួបមុខផ្ទាល់។
យ៉ាងណាមិញ លោក វ៉ាន់ ដេវីត បានដាក់ពាក្យបណ្ដឹង និងបង្ហោះជាសាធារណៈបែបនេះ ដោយសារតែលោកចង់ជូនដំណឹងដល់មហាជនអ្នកគាំទ្រលោកទាំងអស់ឱ្យបានដឹងថា លោកមានគណនីហ្វេសប៊ុកតែមួយប៉ុណ្ណោះ ដែលមានឈ្មោះ Vann David។