សិល្បៈជាតិ៖ នៅរាត្រីថ្ងៃទី ៥ ខែកុម្ភៈ ឆ្នាំ ២០២៣ នេះ យុវតី គង់ ចន្ទ័ណារីយ៉ា ជាបេក្ខភាពតំណាងឱ្យប្រទេសកម្ពុជា បានដណ្ដើមមកុដពីកម្មវិធី Miss Teen Global International 2023 ដែលបានធ្វើឡើងនៅប្រទេសម៉ាឡេស៊ី។
យុវតីរូបនេះ គឺជាយុវតីកម្ពុជាដំបូងគេបង្អស់ដែលឈ្នះមកុដដ៏អស្ចារ្យមួយនេះ ខណៈដែល 1st Runner Up បានលើប្រទេសថៃ 2nd Runner Up បានលើប្រទេសហ្វីលីពីន 3rd Runner Up បានលើប្រទេសម៉ាឡេស៊ី និង 4th Runner Up បានលើប្រទេសឥណ្ឌូនេស៊ី។
គេអាចនិយាយបានថា ឆ្នាំ២០២៣នេះ គឺជាឆ្នាំមាសសម្រាប់បវរកញ្ញាកម្ពុជាយើង ខណៈដែលយុវតីកម្ពុជាពោរពេញដោយសមត្ថភាព ភាពក្លាហ៊ាន ប្រាជ្ញា អាចដណ្ដើមមកុដពីកម្មវិធីប្រកួតសម្រស់កម្រិតពិភពលោកបាន រហូតធ្វើមជ្ឍដ្ឋានអ្នកគាំទ្រវិស័យបវរកញ្ញាស្ញើចសរសើរពីកម្ពុជាយើងខ្លាំង។
សម្រាប់យុវតី គង់ ចន្ទ័ណារីយ៉ា គឺជាបវរកញ្ញាលំដាប់រងទី៣ Miss Preteen International Cambodia 2022 ហើយបានគ្រងតំណែង Miss Teen Global Cambodia ចេញទៅប្រកួតលើឆាកអន្ដរជាតិកាលពីដើមខែកុម្ភៈ ឆ្នាំ២០២៣ នេះហើយ។ នៅអំឡុងពេលប្រកួត យុវតីតំណាងកម្ពុជារូបនេះបាននាំឈុតតំណាងជាតិ «កុលស្ត្រីនៃសន្តិភាព» នឹងបានឈ្នះពានរង្វាន់ Best National Costume ផងដែរ។
សូមជម្រាបថា យុវតី គង់ ចន្ទ័ណារីយ៉ា ឆ្នាំនេះមានវ័យ ១៤ ឆ្នាំ និងអាចនិយាយភាសាអង់គ្លេសបានយ៉ាងស្ទាត់ជំនាញ។ មកុដដែលបវរយុវតីរូបនេះនឹងនាំមកកម្ពុជាវិញ គឺពិតជាធ្វើឱ្យមហាជនអ្នកគាំទ្ររំភើបចិត្តជំនួស និងរង់ចាំស្វាគមន៍ប្អូនស្រីនាថ្ងៃត្រឡប់មកពីប្រទេសម៉ាឡេស៊ីវិញ។
