យោងតាមការចុះផ្សាយរបស់ Sky Sport, Bleacher Report Football សារព័ត៌មាននៅប្រទេសអង់គ្លេសបានចុះផ្សាយថាក្លិបបាល់ទាត់មេឃខៀវ Man City រងការចោទប្រកាន់ពី Premier League ជុំវិញការបំពានច្បាប់ហិរញ្ញវត្ថុជាច្រើនដងចម្លោះឆ្នាំ ២០០៩ និង ២០១៨ ក្រោយស៊ើបអង្កេតអស់រយៈពេលបួនឆ្នាំ។
តើ Man City នឹងជួបបញ្ហាអ្វីខ្លះប្រសិនបើពិតដូចការចោទប្រកាន់ខាងលើ៖
-ផ្អាកការប្រកួត
-កាត់បន្ថយពិន្ទុ
-លេងការប្រកួតមួយចំនួនឡើងវិញ
-ដកឈ្មោះចេញពី Premier League
-ផាកពិន័យជាទឹកប្រាក់យ៉ាងធ្ងន់ធ្ងរ
-លុបឈ្មោះកីឡាករមួយចំនួនធំ
-ជាមួយនឹងទណ្ឌកម្មផ្សេងទៀតដែល Premier League យល់ថាសមស្រប។
ខណ:ភាគី Man City មានការភ្ញាក់ផ្អើលយ៉ាងខ្លាំងចំពោះការចោទប្រកាន់ថាពួកគេបានបំពានច្បាប់ហិរញ្ញវត្ថុជាច្រើនដងនៅក្របខណ្ឌ Premier League។ ប៉ុន្តែ Man City ជឿជាក់ថាពួកគេនឹងអាចឈ្នះរឿងក្តីខាងលើនេះ ដោយសម្អាងថាពួកគេមានភស្តុតាងដែលអាចបញ្ជាក់ថា Premier League បានជូនដំណឹងនេះទៅកាន់ក្រុមសារព័ត៍មាន មុននឹងពួកគេ Premier League ប្រកាសការចោទប្រកាន់នេះជាផ្លូវការ។
លោក Pep Guardiola គ្រូបង្វឹក Man City និយាយអំពីបញ្ហាផ្នែកហិរញ្ញវត្ថុរបស់ក្លិប Man City៖«នៅពេលក្លិប City ត្រូវបានចោទប្រកាន់រឿងបែបនេះ ខ្ញុំបានសាកសួរពួកគេ ហើយក្រុមប្រឹក្សាភិបាលប្រចាំក្លិបបានពន្យល់រឿងរ៉ាវទាំងអស់ប្រាប់ខ្ញុំ ហើយខ្ញុំក៏ជឿទុកចិត្តលើពួកគេ»។
លោក Pep បន្ត៖«ខ្ញុំបាននិយាយប្រាប់ពួកគេវិញថា បើអ្នកកុហកខ្ញុំ ថ្ងៃនោះខ្ញុំនឹងមិនបន្តនៅទីនេះទៀតនោះទេ។ ខ្ញុំនឹងចាកចេញ ហើយនិងមិនរាប់អានអ្នកទៀតដែរ»៕
