កំពុងបង្ហាត់សិស្សគុនក្នុងទ្វីបអឺរ៉ុបជាច្រើននាក់លោក ធីម សៀងហៃ គ្រូបង្ហាត់គុនខ្មែរ កំពុងរស់នៅ ក្នុងប្រទេសបារាំងបានបង្ហាញការសាទរចំពោះការដាក់កីឡា«គុនខ្មែរ»ចូលក្នុងព្រឹត្តិការណ៍កីឡាស៊ីហ្គេម លើកទី៣២ ដែលកម្ពុជាធ្វើជាម្ចាស់ផ្ទះ។
លោកបានប្រាប់សាព័ត៌មាន ត្រយង តាមរយ:សារហ្វេសបុកថា៖ «ក្នុងនាមខ្ញុំជាអ្នកស្រលាញ់គុនខ្មែរ និងជាម្ចាស់ផ្ទះក្នុងព្រឹត្តិការណ៍ស៊ីហ្គេម ខ្ញុំពិតជាមានអារម្មណ៍សប្បាចិត្តនៅពេលដឹងថា គុនខ្មែរ បានក្លាយជាកីឡាមួយដាក់បញ្ជូលក្នុងស៊ីហ្គេម។ ខ្ញុំគិតថានេះគឺជាឱកាសល្អសម្រាប់កម្ពុជាបង្ហាញពីគុនខ្មែរ ទៅកាន់បណ្ដាលប្រទេសក្នុងតំបន់អាស៊ាន បានស្គាល់កាន់តែជាក់លាក់បន្ថែមទៀត»។
លោកបន្ថែមថា៖ «វាគឺជាជោគជ័យថ្មីមួយសម្រាប់កូនខ្មែរ ដែលបានធ្វើឲ្យមានអ្នកស្គាល់កាន់តែច្រើន ហើយបន្ទាប់ពីចប់ព្រឹត្តិការណ៍ស៊ីហ្គេមរួច នឹងមានបរទេសកាន់តែច្រើនបានស្គាល់ គុនខ្មែរ ថែមមួយកម្រិតទៀត។ លោក បង្ហាញការជឿជាក់លើកីឡាករគុនខ្មែរ ក្នុងការចូលរួមប្រកួតនៅស៊ីហ្គេម ដោយឃើញពីការខិតខំប្រឹងហ្វឹកហាត់របស់ពួកគាត់ដើម្បីចាប់ដៃគ្នារកភាពជោគជ័យជូនជាតិនៅស៊ីហ្គេម ឆ្នាំ២០២៣នេះ»។
ជាអ្នកមានស្រុកកំណើតនៅខេត្តកោះកុង លោក ធីម សៀងហៃ គឺជាកូនខ្មែរសុទ្ធសាធដែលស្រលាញ់ការហាត់ប្រដាល គុនខ្មែរ តាំងពីតូចៗមក ដោយមានឈាមឪពុក និងពូជាអ្នកប្រដាល់ ស្រាប់ក៏បានជម្រុញឲ្យលោកកាន់តែមានដុងក្នុងវិស័យប្រដាល់គុនខ្មែរ។ កាលនៅតូចលោកធ្លាប់បានចូលរួមប្រកួតជាច្រើនទាំងនៅតាមវត្ត រហូតដល់ថ្នាក់ជាតិ និងអន្តរជាតិ។
លោក សៀងហៃ ធ្លាប់ចូលរួមប្រកួតជ្រើសរើសជើងឯកនៅកម្ពុជាជាប់ចំណាត់ថ្នាក់លេខ២ និងធ្លាប់ទទួលបានចំណាត់ថ្នាក់ជើងឯកអរន្តជាតិនៅចិន ចំណាត់ថ្នាក់លេខ៣ នៅដើមឆ្នាំ២០២២ លោកទទួលបាននៅចំណាត់ថ្នាក់លេខ១ ក្នុងការប្រកួតដណ្ដើមខ្សែរក្រវ៉ាត់របស់ស្ថាប័ន AFMT ដែលជ្រើសជើងឯកប្រចាំប្រទេសបារាំង។
ក្នុងអាជីពជាគ្រូបង្វឹកក្បាច់គុនប្រដាល់ លោកបានចាប់ផ្ដើមដំបូងនៅឆ្នាំ២០១៦ ដោយបង្ហាត់តិចតួចជាម៉ោងឯកជនដោយធ្វើការទាតក់ទង់ជាមួយជនបរទេស ដោយខ្លួនឯងនៅភ្នំពេញ បន្ទាប់មកក្នុងឆ្នាំ២០១៩ លោកក៏មានឱកាសបានឈានជើងមកធ្វើជាគ្រូបង្វឹកនៅប្រទេសបារាំងផ្ទាល់ តាមរយ:ម្ចាស់ក្លិបសមាគមគុនខ្មែរ នៅប្រទេសបារាំង។
បច្ចុប្បន្នលោកកំពុងបម្រើសការនៅក្នុងក្លិបសមាគមគុនខ្មែរ នៅក្នុងទីក្រុង បុកដូ ដែលជាកម្មសិទ្ធរបស់កូនខ្មែរកាត់បារាំងមួយរូបដែលជាអ្នកស្រលាញ់ និងចង់ផ្សព្វផ្សាយគុនខ្មែរនៅបរទេស និងកំពុងមានការគាំទ្រយ៉ាងខ្លាំងសម្រាប់បរទេសដែលមកហ្វឹកហាត់ជាមួយលោកផ្ទាល់ ដោយជាគ្រូគុនខ្មែរ៕
រូបភាព៖ ផ្ដល់ឲ្យ
