ចាប់ពីខែមីនា ឆ្នាំ២០២៣ តទៅនឹងចាប់ផ្តើមរៀបចំទីតាំង ការទទួលចុះឈ្មោះអ្នកសារព័ត៌មាន និងការធ្វើប័ណ្ណសម្រាប់សារព័ត៌មានជាតិ និងអន្តរជាតិ។ នេះជាការលើកឡើងរបស់ ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ និងអាស៊ានប៉ារ៉ាហ្គេម ឆ្នាំ២០២៣ ក្នុងកិច្ចការចុងក្រោយ ដែលយើងនៅសល់ ៨៨ថ្ងៃទៀត ដល់ថ្ងៃពិធីបើកស៊ីហ្គេម លើកទី៣២ ឆ្នាំ២០២៣។
ឯកឧត្តម វ៉ាត់ ចំរើន បានមានប្រសាសន៍ថា៖ «CAMSOC នឹងខិតខំលើកទឹកចិត្តក្នុងគោលដៅឲ្យអ្នកសារព័ត៌មានអន្តរជាតិមានភាពកក់ក្តៅ ក្នុងការលើកកម្ពស់ដល់ការផ្សព្វផ្សាយទៅកាន់ពិភពលោកពីភាពវិជ្ជមាន ការខិតខំប្រឹងប្រែងរបស់យើងនៃមហាព្រឹត្តិការណ៍កីឡាស៊ីហ្គេម-អាស៊ានប៉ារ៉ាហ្គេម ២០២៣ ជាពិសេសគឺសមិទ្ធផលដ៏អស្ចារ្យនៃពហុកីឡដ្ឋានជាតិមរតកតេជោ ក្រោមសន្តិភាព និងការអភិវឌ្ឍ នៅរាជធានីភ្នំពេញ ក៏ដូចជាបណ្តាខេត្តរៀបចំស៊ីហ្គេម ដូចជាសៀមរាប ព្រះសីហនុ កែប កំពត ដែលជាខេត្តគោលដៅទេសចរណ៍ពិសេសៗរបស់កម្ពុជាផងដែរ»។
ឯកឧត្តមបានសង្កត់ធ្ងន់ថា៖ «ដូច្នេះ សារព័ត៌មានជាកញ្ចក់ឆ្លុះបញ្ចាំងពីតថភាពនូវអ្វីជាសច្ចៈភាពរបស់កម្ពុជា នាពេលបច្ចុប្បន្នទៅកាន់ពិភពលោក ដោយប្រជាជននៅលើពិភពលោកកំពុងតែត្រៀមផ្តោតចក្ខុមកកាន់កម្ពុជា តាមរយៈព្រឹត្តិការណ៍កីឡាដ៏អស្ចារ្យនេះ»។ ឯកឧត្តម បន្តថាវិស័យសារព័ត៌មានត្រូវបានចាត់ទុកថាជាកញ្ចក់ឆ្លុះបញ្ចាំងពីតថភាពនូវអ្វីជាសច្ចៈភាពរបស់កម្ពុជា នាពេលបច្ចុប្បន្នទៅកាន់ពិភពលោកឲ្យកាន់តែជ្រួតជ្រាប ដែលប្រជាជននៅលើពិភពលោកកំពុងតែត្រៀមផ្តោតចក្ខុមកកាន់កម្ពុជា តាមរយៈព្រឹត្តិការណ៍កីឡាដ៏អស្ចារ្យក្នុងនាមជាម្ចាស់ផ្ទះការប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ជាប្រវត្តិសាស្ត្រដំបូងរបស់កម្ពុជា ក្រោយរង់ចាំ៦៤ឆ្នាំ។
ឯកឧត្តមអគ្គលេខាធិការក៏បានលើកបង្ហាញពីភាពលម្អិតលើផែនការនេះ ដោយការផ្សព្វផ្សាយត្រូវបានចែកចេញជា២៖
ទី១. គឺការផ្សព្វផ្សាយពីការថតផលិតលើ១៥ប្រភេទកីឡាដែលមានប្រជាប្រិយភាព ដោយផលិតពី ក្រុម ផលិតឯកជន ឬដោយក្រុមជំនាញអន្តរជាតិឲ្យបានក្នុងកម្រិតគុណភាពស្តង់ដាអន្តរជាតិ ហើយបញ្ជូនទៅប្រព័ន្ធផ្សព្វផ្សាយក្នុងស្រុកដោយឥតគិតថ្លៃ។
ទី២. ចំណែកឯច្រើនជាង១៥ប្រភេទកីឡាទៀត គឺផ្តល់ជូនដល់ស្ថានីយទូរទស្សន៍នានា ក្នុងស្រុក ដែលមានលទ្ធភាពគ្រប់គ្រាន់សម្រាប់ការផ្សាយផ្ទាល់។
ក្នុងនោះ ឯកឧត្តមបានលម្អិតដល់ការរៀបចំថា តើទូរទស្សន៍ណាទទួលបានសិទ្ធិផ្សាយផ្ទាល់ប្រភេទកីឡាណាខ្លះ អាស្រ័យដោយការរៀបចំរបស់ឯកឧត្តម ផុស សុវណ្ណ ប្រធានគណៈកម្មការផ្សព្វផ្សាយ និងព័ត៌មាន ក្រោមការឯកភាពពីឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាអនុប្រធាន គណៈកម្មាធិការជាតិ CAMSOC រួមទាំងការឯកភាពពីថ្នាក់ដឹកនាំ CAMSOCផងដែរ៕
ប្រែសម្រួលពី៖ Cambodia 2023
