សិល្បៈជាតិ៖ ថ្មីៗនេះក្រុមអ្នកស្រឡាញ់សត្វចិញ្ចឹម និងអ្នកលេងបណ្ដាញសង្គមជាច្រើននាក់បានរិះគន់ខ្លាំងចំពោះការសម្ដែងរបស់ នាយគ្រឿន ដោយបានយួរកសត្វឆ្មាហើបផុតពីដី។ ទង្វើនេះពួកគេចាត់ទុកថា ជាទង្វើមិនសមរម្យ និងជាការប្រមាថដល់អាយុជីវិតសត្វឆ្មា។
អ្នករិះគន់បានលើកឡើងថា៖« រិះគន់ដើម្បីស្ថាបនា: ត្រង់ចំនុចបងគ្រឿនលើកឆ្មា កាន់តែខ្សែ រឹតតឹងកឆ្មា សម្រាប់អ្នកស្រលាញ់សត្វមិនល្អមើលទេ ខ្ញុំក៏ជាអ្នកចូលចិត្តមើលកម្មវិធីបងៗដែរ »។
ហើយមានអ្នកខ្លះទៀតបានរិះគន់ថា ៖ « ត្រង់នាទីនេះ សកម្មភាពអ្នកធ្វើ យកខ្សែទាញកឆ្មារឡើងលើ មានគិតអត់ទេ គិតថាធម្មតាៗមែន លើកក្រោយៗសម្ដែង សូមប្រុងប្រយ័ត្នផងចំពោះអ្នកស្រឡាញ់សត្វ ទង្វើនេះមិនធម្មតាទេ ..»។
បន្ទាប់ពីមានការលើកឡើងនូវការរិះគន់ដើម្បីស្ថាបនាចំពោះបញ្ហាខាងលើនេះ គេបានឃើញ នាយគឿន បានបង្ហោះសារសុំទោសទៅកាន់មហាជនអ្នកគាំទ្រ ដោយលោករៀបរាប់ថា ៖ «សូមអភ័យទោសបងប្អូនខ្ញុំដឹងខុសហើយនូវការសម្ដែងលេងយួរឆ្មាភ្លេចខ្លួន នឹកឃើញថាក្រឡៅករឆ្មាធំដែរ យួរមួយភ្លែតវាមិនអី សត្វឆ្មាខ្ញុំមិនស្រលាញ់ក៏ខ្ញុំមិនស្អប់ដែរ បើម្ចាស់ឆ្មាមិនសប្បាយចិត្តប្ដឹងឬឱ្យខ្ញុំសូមទោសឆ្មាក៏ខ្ញុំព្រម តែខ្ញុំអន់ចិត្តមានបងប្អូន ប្រមាថជីវិតខ្ញុំ តែមិនអីទេខ្ញុំធ្វើបុណ្យបានខ្លះដែរ បើមានជាតិក្រោយសូមកើតជាសត្វទៅនៅភពផ្សេង»។
ជាមួយគ្នានេះដែរ ខាងក្រុមការងាររបស់ផលិតកម្ម 9 Colors Production ក៏បានបង្ហោះលិខិតសូមអភ័យទោសមួយសន្លឹក ទៅកាន់សាធារណជនអ្នកគាំទ្រដែលមានខ្លឹមសារទាំងស្រុងថា ៖«ក្រុមការងារផលិតកម្ម 9Colors Production សូមអធ្យាស្រ័យពីទស្សនិកជន ទាំងអស់ចំពោះកំហុសឆ្គងដោយអចេតនារបស់តារាកំប្លែងយើងគឺនាយគ្រឿន ដែលបានកើតឡើងអំឡុងពេលសម្ដែងជាមួយសត្វឆ្មានៅក្នុងកម្មវិធី 168យប់។ តាមរយៈសំណេររបស់នាយគ្រឿន គាត់គ្មានចេតនាធ្វើបាបសត្វនោះទេ សង្ឃឹមថាទស្សនិកជនទាំងអស់នឹងយោគយល់អធ្យាស្រ័យចំពោះកំហុសឆ្គងដោយ អចេតនានេះ។ ក្រុមការងារ របស់ផលិតកម្ម 9Colors Production សូមថ្លែងអំណរគុណ ចំពោះមតិកែលម្អពីទស្សនិកជននិងសូមអរគុណចំពោះការគាំទ្រផលិតកម្មយើង នាពេលកន្លងមក។
សូមជម្រាប បើតាមការកត់សម្គាល់ រហូតមកទល់ពេលនេះ មហាជនហាក់បើកចិត្តទទួលយកការកែលម្អឡើងវិញរបស់ផលិតកម្ម និងតារាកំប្លែងនាយគឿន ក្រោយពីបានទទួលយកគំនិតរិះគន់បែបស្ថាបនា។
សូមទស្សនាវីដេអូខាងក្រោមនេះ ៖
